Гъамувхьайн йигъ ЦIаIхни дерайл'

11 Май 2018
K2_ITEM_AUTHOR  Кьурбан Омаханов

Даlвъийн чин кlаарын хыл' гыргыни цlаlхбышди (йихъбышди) юрдылид гьаlррамишауйн. Манчин хаlдданани хайбышеедын иших кlядхъау. Даlвъээнче къара хабар хъидябына хизан шахъаб авху деш. 

Сувани маlгьалыле, Аlранеече Ватан душманыке къорамишааъас аазырбышиква энки уфтанын, кьуватыкван , сагъын джанан цlаlхбышин (йихъбышин) игит' джегьилер абкlын. Манбышин хаlббананбы даlвъээ батмишивхьа. Сабарабы ичкlыры дена абкlын. Къийнад манбы гябтlуйн ва бастуравъуйн джига ацlа дешёдун. Мани даlвъийн хулейре инвалидне, хьулейре етимне, хулейре сипlырийне гьавъу, садджу Аллагьыкlле ацlа.
Хаlбни Ватанни даlвъээ гъамувхьайн гьайни сенни майни 9-чил' 73 сен быкырхьа. Ман байрам шас йишди дидерше, деккярше эбакайи шиныква къазанмишау.
Сен-сениле ХаIбни Ватанни даIвъээ гъамувхьайн йигъ шаке аIкьана хъехьи. Сен-сениле сагъба авхуйни ветеранаршин сай кIыл'хъехи. Хьебыдле сенна ихъа шахъаб, цIаIхбышихъаб 4 ветеранний: Мирза Мирзоев, ТIагьир Саидов, Шевкет Дабузов, Адил' ГьаIйдаров. Къийна манбышда саджар аху деш. Гыргынбы раIгьматыххъа абкIын.
Ветеранар идявхеейиб,йишин бордж водун гыргыни ветеранаршилхъа раIгьмат къаховуй ва манбышин игитийваллабы йикIел' хъаляуй. Манбыше джон джанбы йишин ешайиш, геледжагъыл' югун ихьеджинва даlвъээ гиххьы! Манчихъа гора ши ветеранаршини гьаIкIее гьийд одкIунийн макьаалебы мед текрар гьаъас. Къийна шас едигарыс манбышике джон шикыл'бы ва гьаIйкалбы аху.
Майни 8-9 чил' Сувал'ни маIгьалыл'ни цIаIхбышди хиваршее Гъамувхьайни йигъыс кIассырыйн « Бессмертный полкбы» илгъечIу. Мани йигъыл' джамаъаIт хыле джони даIвъээ вухьайни баба-дидершин шикыл'бы алеетIу майдамбышеехъа хъигъебчIу. Мааъад митингбы илгъечIу. Хивни администрациебышее мактаббышиква саджигее гьабтIуйн ветеранар йикIелхъалявъу, манбышилхъа раIгьмат хъахову. Гойне ушахарше, чIакIынбышиква саджигее тIетIбышин тIуччер гьаIйкалбышилхъа (памятникбышилхъа) гиххьы.
9 май хъалессе гьихъа ЦIаIхее, Мишлеше, Муслагъа, Миххьейе, Гыл'мецIа ХаIбни Ватанни даIвъийн гьаIйкалбы абрелхъа хъаляъу : кираджбы, ширбы ыIхы, гьаIйкални гьийдын падамбы бадалау, йивар, тIетIбы эзу. ДжинаIгъни хивни джамаъаIтын джони хивна ХаIбни Ватанни даIвъийна гьаIйкал тезелемишавъу, абрелхъа хъавалявъу. Мишлеше ыхьайни йигъынджагъбышее РФ-ни Ахтыни погранотрядни эскерарше иштырак гьау. Манбыше хаIйбышеехъа автоматбышиква салютбы авгьу.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree