Пограничникаршини йигъыс къассырыйн оIюнбы

01 Июнь 2018
K2_ITEM_AUTHOR  Кьурбан Омаханов

Гьар сен майни 28-чил' Россиейни Федерациейл' Пограничникаршин йигъ джурабаджур йигъынджагъбышиква, маджлисбышиква, военно-спортни  оIюнбышиква алгъайгьи. Пограничникар гьоIкуматын сергьатбы къабни душманаршике къорамишаъан эскерар вобунбы. Гьар гьаммаше цIеббыйна душманна гьIуджум манбыше джолхъа алябатIа. Йишин сакитын ешайиш манбышди хыле водун.

 

Манчихъа гора, манбы вааджибын эскераршини къошунын джура водун. Манбышихъад джон кIоран аIтрафлы таарых водун. Вахт маIгьаб хъабы , шас маIгьад кьисматхьа , Совет гьоIкумат дагъылмишхьайле хъийгъа , йишин халкь кьоIна хъыхьа. Сабарабы Россияйл' авху, сабарабы Азербайджаныл'. ГьаIшде ши гьини суралиб, шени суралиб гьоIкуматбышди сергьадеедын миллет водун.
Майни 28-чил' Ахтыни погран дестее Ахтыни ва Рутул районни мактабни шигыртаршини аIрее Пограничникаршини йигъыс къассырыйн военно-спортын оIюнбы илгъечIу. Мани йигъынджагъбышее Сувал'ни маIгьалыл'ни мактаббышди ушахаршед хаIдын иштырак гьаъу. Ман оIюнбы дестебышикванбы( командныйбы) ва текынбы (индивидуальныйбы) ыхьа. Ушахарше джони аIрее баIстбы гьар оIюнбышее гьаъу. Манчини аIрее къадабхьуний, кандир цIыцIауй, автомат хъобтул савъуй, гранатын муляжбы авгьуй, ОБЖ-йн усулбы ацIахьай ва медынбы. Мани военно-спортни оIюнбышее Мишлешни йыIкьнекни мактабни ушахарше , кьома мактабни ОБЖ-бы гьелени ГьаIфиз Къубалыевыква, 2-ъэсда джига алебтIу. Манбышис Ахтыни пограндестейнисураке грамотабы, медалбы, кубок ва медын пайбы гьуво. Офицерарше ушахаршини гьаIракатбышис ва ацIаал'бышис хаIбна кьиймат гьуво ва манбышилхъа хаIдын иням ва ыIгьтибар бил'дираъу.
Мишлешни мактабни директорни Ислам Ибрагьимовни увгьойка, джони мактабни шигыртарше гьаммаше маIгьадни йигъынджагъбышее иштырак гьаъан. « Йишди мактабни къаршее Пограничникаршина застава вобна. ГьоIкуматын байрамбынанкъаI ши махъа ушахар вуккекка, эскераршин гювъур-сугъоцый, ыIмыр гьаагва. Манбышди ешайишиква , къуллухыква танышоохьи. Сасса вахтал' ши эскерар, офицерар мактабеехъа ушахаршис насигьаIт, тербие гьелес хъооIтал. ДжитIада , йишди аIрее югун алаакьабы водунбы къурмишхьа. Гьел'бедти , ман аIрабы йишди маъаIллиме ГьаIфиз Къубалыеве артымишаъа. Мани сардан манкъвее хаIбна иш вуккекка вобна»,- И.Ибрагьимове увгьо.
ОIюнбышин екунбы ыккыйле хъийгъа, саджигее едигарыс шикыл'бы цIыцIаъу.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree