Мусурманаршин аIзизын байрам

14 Июнь 2018
Author :   газета "Нур"

Рамандин ХаIдын йигъ (Ураза-байрам ваяхуд Ид-ал'-Фитр) мусурманаршин аIзизын байрам водун. Исламни кIалендарыква ман Шаввал' вузани цIеддыйни йигъыке, Рамандини вузан аIхреедын сив ачухауйле хъийгъа, гийгъал. Ман ХаIдын йигъ хьебыдле йигъна илгъечIи.

ХаIдданани мусурман оIлкабышил' 2018 сен Рамандини вузан аIхреедын сив июнни 14-ни эхьал' гьихелес. Мани хаIмдийле Рамандин ХаIдын йигъ гийгъал. Ман ХаIдын йигъ Пейгъанбар МуIгьаммад (с.аIл.с) сагъвалее, 624 сен алгъайгьи гидгъыл.
Рамандини вуза Исламын динылхъан инам, иман, утIумаъас чалышмишоохьи: Аллагьыс ыIбаадат гьаъа, Кьуръан къаагьа, сивар аххъаххъа, кубар гьаъа, фитIра къещи, фыкырбы, напсбы гьаIрамыке ва кьадагъа гивхьуни карбышике гьуваджи, мизесый йишоныс саIгьыбийвалла гьааъа. Рамандини вуза гьаIкен мусурманар чалышмишоохьенбы дёлесни инсаныс, етимыс, касибыс кумаг гьелес. Мани вуза сана-санкъулхъан муIгьуб, раIгьам, аIшкь къат-къатна гьехха эхьи. Рамандини вуза фарзыле ( Аллагьни гьийдын инсанын бордж) гъайре сунна ( суваабы гьауй) гьавъуй лазымда водунбы. Рамандини вуза гьар хаIмде таIрмыгь манзикбышее гьавъуй мани вузан хаIдын лышан водун. Рамандини вуза Кьадир геджейна хаIм хъабайли. Мана ниятбы, доъаIбы кьабыляъана хаIм вобна.
Рамандини ХаIдын йигъ мичIеедыйн кубар манзике гьауйле хъийгъа гийгъал. Ман хьебыдле йигъна айкIан. Мани байрамыс мусурманар гьале хаIмде гьазироохьи гивийгъал. МанчикIле ХаIбна ХаIм эйгьи. Гыргыни инсанарше мани йигъыл' хаIдын гиджараIххийбы аляатIа. МичIеед тезе палтар аляъа. Адаамер кубаршис манзикехъа гьавайкIан. Манчиле хъийгъа мусурманарше сана-санкъус баракабы гьаъа. Баракайс кьаIсди деккисахъайи едисахъа, гогьарбышаанкъаI, къоншибышаанкъаI гьава­йкIан. Мани йигъыл' гыргынкъуни хааъад ачухын ,болун суфрабы эйхьи. Ушахар акка-аккал' байрамыка табрикааъа ивийкар. Мани йигъыл' чIырынкъулхъа гьал'джаахвас, горханабышилхъа инсанар гьавайкIан. Мани йигъыл' йишон сана-санкъука гьидяаъанбы, цимисинбы барышмишоохьи. Инсанар чалышмишоохьенбы джанее кIейъурыйн кир, пахылыйвалла, оIдж, ,писин напс йикIенче темизяъас.
«Нур» кIазетни редакциейн гыргын мусурманар Рамандини ХаIдни Йигъыква табрикааъа. Аххъыйн сивар, гьауйн кубар, гьеххъыйн дилягбы , гьауйн ниятбы къайищуйн фитIрабы Аллагье къабыляъанбы! Аамин!

 "Нур" кIазетин редакция 

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree