Хыл’ сибыкнана дохтур, камалукана шааир.

29 Июнь 2018
K2_ITEM_AUTHOR  Камиль Шамхалов

Сабара гагьна гьихъа йишди миллетни лайикьыквани инсанаршини санкъун, хыл’ сибыкнана дохтурун, камалукани шааирын калелий Магьмудов Магьмуд Гъази-МагьаIммадни дихын 70-л’ сен быкырхьа.

М. Гъ-М. Магьмудов I948 сенни июнни 18-чил Рутул районни Калел’ни хивее едике ыхьа. Магьмудыс уфтанна ушахийвалеенана ыIмыр гьааъас кьисматдевхьана. Няъас увгьее, дек, Гъази-МагьаIммад, раIгьматыхъа аркIын. Хизанна гыргына йыIкьвалла едини мыгабышилхъа хъабы. МаIнкъее Магьмудыле гъайре, йишбаб къелил'хъа хъавъу.
Магьмуд мактабее югда хъаIдаххъани шигыртаршини джаргее ыхьа. Мани вахтал’ манкъвее гуджнакана фагьам биологиейни, химиейни дарсбышилхъа гьооли вухьа. Мани сабабыхъа гора, манкъве мактаб таамау, медтехникумеехъа кьабыл’хьа. Угъадукана ман техникум чIаIвау, Магьмуд сабара гагьна фельдшерна ишлемишхьа. Амма манкъуни фыкрее джуна ыIмыр дохтурни пешейс къабсырий вухьа. Манчини аллар мана Дагъыстан девлет медицинайни институтеехъа иккечIу. Йихьыдле сенна мааъад хъаIдхъийле хъийгъа, мана Орловни вилаетеехъа стажировкайс къахову.
Дохтурни санаъаIтни дипломукана Магьмуд Гъази-МагьаIммадна дих хизанысахъа саркIыл'. Мани вахтал’ хизан Галахъа кочмишувхьа вухьа. Дохтур Магьмуде 40-ни сенна меега Закаталайни районе хирургийвалла гьавъу. Манкъве кумагаийни инсанаршихъа сай-гьыIсаб дешин. Дохтур Магьмуд манбыше гьаммаше югвалис кIел’хъаляъа. ГьаIшде мана пенсиее ыхьейир, манкъве пешейна кьува авакIанааъа дешда, арыйни инсанни дердес дарман гьидявъу къекка деш.
Гыргынчиле гьихъан адамийн далы хизанобна. М. Магьмудове ыIмырни елдашиква, Байрамхатун Джумайни йищеква, хьойре ушахар чIакIы хъавъу, эвле-атта гьавъу. ГьаIшде манбы джони хизанбышин саIгьыбар вобунбы.
Дохтур Магьмуд халкьни арайл’ утIумни дин-иманукана инсан хьиннер ацIа ворна. Сабара сенбына гьихъа мана Маккайлхъа гьаркIын, гьаIдж къилмишавъу. Аллагьни йаIххъехъан садакьа гьувой гьаммаше манкъуни фыкрее водун. Мани сардан дохтур Магьмуде джуни харджийква манзик алявъу. ГьаIшде Чей совхозни халкьын мааъад зикырбы гьаъа, медын маджлисбы алгъайгьи .
Калелий Магьмуд Гъази-МагьаIммадни дихни гьаIкIеедын одкIуний манкъус Оорункъве гьувойн талант агъмыш гьидеъэй быкырын ихьес деш. Дохтур Магьмуд камалукана шааир ворна. Манкъве джурабаджурни вахтбышил’ одкIунийни шечIбыше цIаIхни миллетни адабиятее лайикьыквана джига авхъаахъа. Йизди увгьойка, манкъве одкIунийн шечIбы саджигеехъа сау, китаб къайиккее югда эйхьийий. Манбы къайдалхъа адчес «НУР» кIазетни редакциейн ахаIн кумаг гьелесынний.
Дохтур Магьмуд миллетни меега джан гёйхьанна инсанорна. Манкъве йишди халкьыка багълыдани ишбышис хыл' авхъас гьаммаше гьазирра ворна. "Нур" кIазетисыд манкъун кумаг хаIдын ыхьа. ГьаIшдед дохтур Магьмуде редакциейкван сыхын алаакьабы гьуваджи водунбы.
Дагъыстанэе ешемишехьени цIаIхни джам­аъаIтын Магьмуд Гъази-МагьаIммадна дих йикIеенче 70-л’ни сенни юбилейиква табрикаъа. Джус джанана сагъвалла, йикIена шадвалла, хизанее саламатыйвалла аIрзуламишааъа.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree