Ед’ни никнеква хъадыйн хъаlдхъийлхъан гьавас

20 Январь 2017
K2_ITEM_AUTHOR 

Гьаар инсанна ыlмыр джурбаджур сана-санчике аlслыданани гьыlссабышиква багълыда. Мааъад йыlкьнекна джига телябавалла гьааъани вахтын авхъаахъа. Январьни 25-чил йишди оlлкайни телябабыше джон байрам – Татьянайн йигъ алгъагьас. Мани сабабыхъа гора, йишда мухбир мигьманна кьоlйре телябабынани хизанее ыхьа.

 

Гыл'мецlни хивеенчена Мирзоеваршина насыл гееб хаlбна насылобна. Манбышди сабаранбыше Магьаlчкъалайни шагьарее юрд абчу. Аlбдуллайна дих Гьаlджимагьаlммад Дагъыстанни марказее ешемишехьен хьебцlалиле гьеххан сенбы водунбы. Мани манзилее манкъве Мирзайна йиш Тамилайка хизан къурмишавъу. Гьаlшде манбы хьебни сана-санчиле уфтанни, камалнани, гъирйатнани ичершин деккий ед' вобунбы. Къийнийн йизын ихтилет теляба ичершини – Луизайнийий

Фатимайни гьаlкlеедын ихьес.

МирзоеваЛуиза Гьаlджимагьаlммадна йиш Магьаlчкъалайни шагьарее едике йихьа. Къизлени медалыка 38№ гимназия таамау. Мактабее хъаlдаххъаlнкъаl джар геледжагъыл' джена ыlмыр дохтурни санаъаlтыква багъламышаъас ыхьай маlнкъыс аlйанхьайн. Луизайс мани пешейлхъан гьавас, аlшкь Чеховни, Булгаковни асарбышике хъады. Гьаlшде Луиза Мирзоева Дагъыстан девлет медицинайни университетни педиатриейни факультетна 6 курсна теляба ворна. Ниятее ушахаршина невропатолог йихьай вод. Манкъыlни увгьойка, энки къорамишааъасын, кумаг гьелесын инсанар ушахар вобунбы». Къийна ши манбышди балее аlдатыйба авхъее, къийхъа юзиагъба вухьес. Гьаlшдийна кlыл'ни балабышдимеега гьавъуни заlгьматын къийхъа бар гьевлес. Оlлкайн гьихъа адкlыний гьарвахтал' джан сагъдани инсанаршиква багълыда ыхьа, манчихъа кlорааленче фыкыр гьевлес вуккан», - Луизее агъмышау.

Акьвани хьинен джад нягьаlрна ачухни йикlеквана инсан ыхьай, нени хассиятбышда есси ыхьай ацlахьяъан. Луизайни йишойн, фыкырбышди кlораалин, гьаар суракени ацlаалин йизди йикlее хошна джига гьавъу.

Луизайква гаф гьааъани вахтал' утагъеехъа къоlръэсда йиш Фатима иккейчlу. Зы маlнкъыкед йизди суалбышис джаваббы хъувой хайишау. Фатимее, хааlрни йичее хьинне, Магьаlчкъалайн 38№ гимназия таамау. Маlнкъеейид мактабее аlълада хъадхъыl. Мааъад хъаlдаххъаlнкъаl обществознание, таарыхни ва медни гьуманитар предметбышилхъа хаlдын аlшкь ыхьа. Мани сабабыхъа гора, мактаб чlаlв гьауйнчиле хъийгъа, маlнкъее документбы Дагъыстан девлет университетни юридический факультетеехъа хъуво. Гьаlшде Фатима Мирзоева мани факультетни 3 курсна теляба ворна. Ф.Мирзоевайни гафыке маlнкъее ман санаъаlт гьавагьийда сечмишауй дехьай зас баштахьайн. Фатимайни увгьойхъа гора, гьайни дюнйейл' хаlдда аlдалат дешин, хъичlодкурийн, нягьаlкьийн ишбы эйхьи водунбы. «Гьаар оlлкайхъад нени къайдабышиква ешемишивхьес лазымба вухьай одкlуйнийн кьаанун водун. Манчикlле Конституция эйгьен. Джамаъаlтыныд ман гозетяуй, ман аххъый бордж водун. Амма сабаранбыше кьаануныле къел' къадаччи. Аlдалатука ешемишоохьен инсанаршин ихтиярбы гьуваджесдимее, нягьаlкьни инсанаршике къорамишааъасдимее диванчер, вакиляр, прокурорар вуккан…»

Дагъыстанни суд-диванни гьаlкlее гаф гибхьыйнкъаl, Фатимее увгьойн: «Йишди республикайни инсанаршин ихтиярбы гозетяъани ташкилатбышин геллесын къуллухчер напс темизин, джони ишин гъаlкlеен санаъаlткарар вобунбы. Манчихъа ил'дяакы, до бед'ням гьаъанбыб арайле хъигъейбачlенбы. Кьаанун гыргынкъус одкlунийн водун. Ман ахтыйни къуллухыл'ни къуллухчершед, вар-девлетиквани ва касибни инсанаршед гозетяъас ыккан.

Луиза ва Фатима джанан йичибы вухьейиб, манбышда джураалла вацlоохьийий. Луиза закlле къыlвнана, наш хъехьени хассиятукана, раlгьимукана, джегьил' хьинне къайдже. Фатима хьиннени гьаракатыквани хьывыл'ни касбышди гъаlкlее урусаршини шааире Н. Некрасове увгьойн: «И коня на скаку остановит, и в горящую избу войдет».

Ичершикехъидгlынбы-алидгlынбыгьауйнчиле хъийгъа, зы маlгьбын абыр-гъириатукан, камалукан кул'фатбы хаlб хъавъуни, тербие гъувойни деккисий едис миннатдарыйвалла агъмышавъу. Кlыл'ни Сабинайс хааlрни йичибышиква барабарийхьес ва манбышиле гьихъа хъийхьес аlрзау.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree