Умуд гьоолена пегьливан

17 Февраль 2017
K2_ITEM_AUTHOR 

Гьайни делесийвалей «Нур» кlазетейхъа сайиб шадна хабар хъабы. Маскlавни шагьарее илгъечlуйни ММА донани сачаахаранбышди чемпионате хьойиккелий Шамил’ Раджабовее цlеббийна джига авхъу.

 

Февральни 10-12-чил' Маскlавни шагьарее ММА/Ориентал сачаахаранбышин Россиейн чемпионат илгъечlу. Мааъад Россиейни хаlдданани регионбышейнче абыйни спортсменарше иштырак гьау. Дагъыстанейнче чемпионатейхъа «Стронг» донани клубын спортсменар гьабкlын вухьа.

Са кьоlлле кал'ма йишди чемпионни гьаlкlее эгьес ыккан. Шамил' спортука маlшкьулехьен хаlдда сенбы водонбы. Мана цlерра залейхъа арыйнкъаl, мактабни дагъайдни сыныфее хъаlдаххъаlна шигыртний. Кlыл'валихъа ил'дяккы, манкъве мысаджад тренировкабы къекка ыхьа деш. Гьаммаше чалышмишехьенаний мааъад югна кьуват алебтlас. Манкъун спортулхъан гьавас йыlкьнекин мактаб быкырауйле хъийгъа, сыкlылдад хаlдхъыхьа. Къийна мана Дагъыстанни девлетни техник университетни хьебыдъэсди курсна телеба ворна. Мана хъаlдхъыйка саджигее спортыкар маlшкьулехьи ворна.

Чемпионатее Шамилее геед югун натийджабы гьагу. Мана кьоlни джурабаджурайни версиебышее сачархыл'. 71 кило чекей Шамил' ММА элит (микс-файт) версиее сачахарас хъигъечlу. 72 кило чекей мана ММА элит (шут-файт) версиее чыхышау.

Кьоlни сана чекей манкъве ахтына джига авхъу. 71 кило чекей Шамил' хьебни элейс сачахарас хъигъечlу. Мана цlерра дагъыстанейнчени спортсменыка сачархыл'. Манкъуле гъамхьайле хъийгъа, Ставрополни крайиле арыйни спортсменыка горушмишхьа. Манкъулер Шамил' гъамхьана.

Шамил'ни увгьойка, энки дагъамын горуш финалейдын ыхьа. Мааъар мана Перьмни крайгъанче арыйни спортсменыка сачахарас хъигъечlу. Сачабхырый хыллийн ыхьа. Шамил' чалышмишхьана йыlкьаlл' идяхвас. Финални аlхырейни дакьикьабышее манкъуке вудже-вудж хылехъа саъас аlхына. Са манзилее гьамбаз гьигъаlккарауна.

72 кило чекей Шамилее са горуш алгъавгьу. Мааъадыд йишди чемпионее джун гьунар, баджарух, такьат гьагуйн.

Манкъуна тренер Магьаlммад Набиевни увгьойка, Шамил' геер югра сачархыл'. Манкъве йизда заlгьмаlт харабавъу деш. Чалышмишхьана, гьам йишди клубын, гьамыд республикайн до ахты хъаъас. Манкъуна йаlхъ дюнйейни чемпионатейхъа ачухба вобна.

Къийна Шамил' гуджнара майни вузее Италиейни Сан-марино шагьарее илгъечlесди дюнйейни чемпионатейхъа гьаlзирехьи ворна. Мааъад дюнйейни джурабаджура оlлкабышейнче абыйни гуджнаквани спортсменарше иштыракаъас. Дюнйейни чемпионатылхъа вахт кlыл'ба авхуйхъа гора, мана хаlм-йигъ тренировкабышее ворна.

«Нур» кlазетни редакциейн Шамилис угъурбу аlрзуламишаъа. Умуд гьааъана, манкъве маайид йишди халкьын, Дагъыстанын до ахты хъаъасын.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree