Кьудратыквана устад

17 Февраль 2017
K2_ITEM_AUTHOR 

Дербент са эн йиссейни ва кlоран таарыхнани дюнйейл'ни шагьарбышди сыранеехъа гёохьа. Манчин кlаджарбы аазырбышиква сенна гьихъа гиххьы. Къийна ааlлимаршини аlрее са хъобкуна Дербентни ешни гьаlкlеена мислягьаlт дешда. Сабаранбыше эйгьен манчихъад 5 аазыр сен водун, шенисанбыше эйгьен 2 аазыр сен водун.

 

2006-ъэсди сен ЮНЕСКО-йн Дербент Россиейна эн толерантный (мислягьаlтукана) шагьарыс лайикьавъу. Мааъаб суlлгьыква, мислягьаlтука саджигее 60 миллетин инсанар ешемишоохьи. Манбы сана-санкъука урусни мизел' йишон гьааъа. Дербент 110 аазырыле агъаллан джамаъаlт ешемишехьи. Манбышди аlрее цlаlхбыб (йихъбыб) вобунбы. Мааъаб хьебни диныс – иламыс, христянствайс , иудаизмайс ыlбадат гьаъа; мусурманер, хачбаразар, джуlгьутIер саджигее ешемишоохьи.

Дербентхъа хаlбба ааlлимар, таарыхчер, архитекторар, географар, ёлчер, шааирар, генералар абы абкlын. Махъа ары-арыйнкъус вуджее тlабалаъан авайку. Гыргына Дербентни аlшкьыс есир ыхьа. Дюнйейни доюкани шааире, цIаIхийгъалий (йихъий) Низамий Гянджяве джусда хьунаще Афакь Дербентгъанче алертlу. Манкъуни асарбышейид Дербентни гьаlкlеедын маlълумат гьели водун.

Эн хаlдын Дербентын ярашугъ Нарын-къала водун. Манчихъад 2 аазыр сенийн еш ва таарых водун. Манчини гьар къаейхъад, дарвазайхъад, баругыхъад, зинданыхъад, гармайхъад, гьаlмамыхъад сирыкван таарых водун. Нарын-къалайле шагьареедын йиссейн магьаlлбы, дарын кучебы, гьаlшдийн тезе бинаабы, манзикбы, кил'сабы, сенагогабы хылени кlонекик хьинне къеджи. Мана эн къорамишааъани таарыхни абидабышди сыранеехъа гёохьа. 2015-ъэсди сен Дербентын 2000 сен кечирмишау. Дербентна Нарын-къала йиссейни либасылхъа цIаIхийгъаIлий АIриф УIмаровни тикли ташкилатын хъавалявъу.

Гьаlшдед мана йиссейни абырелхъа хъаляаъан ишбы алгьааl водунбы. Мааъад ишбы гьаъани устадаршини аlрее йишин цlаlхбыб (йихъбыб) вобунбы. Манбышда сайир мишлешелий Мусаев Сулейман ворна. КIыл'валикеджад манкъухъад тиклийни ишилхъан хаIдын гьавас ыхьа . Мана хивеенче кочмышхьа хъары, Дербент юрд абчы. ГьаIшде мана ерри дербентлы ворна. Дербентын юбилей алгъагьас гьазироохьенкъаI, Сулейман цIеррыйни йигъыкве джар шагьар абрелхъа абадчени ишилхъа эчIу, йаIъни тиклибышее устадна ишлемишехьи гиргъыл'. Манкъвее гьааъана иш къавдже, Сулейманылхъа энки вааджибын, дагъамын тиклийн ишбы тапширмишау. Мана джуни дихыква Селимыква Нарын-къала абрелхъа хъааъани биргадее ишлемишхьа. Деккейий духее хаIбба заIгьмат махъа гивхьу. Маадын ишбы таамхьайле хъийгъа, мислягьаIтеехъа хъабыйнбы Нарын-къалайни дёлесийвалее хаIбна «Ревает къала» («Башня легенд») аляаъас. Мана ишыб устад Сулейманылхъа ыIгьтибаравъу. Къийна манкъвее джуни дестейква манчина къае гивийкIан вобна. Сулейманни регьберийваликва мани биргадее джуни хивынбы, чоджар - Шарафий Муъмин, Сейфуллагьий Зейнуллагь ишлемишоохьи. Манбы биргадайн оIзяг водун. Инам гьаъан, манбыше алявъуйни «Ревает къалайн» Дербентыс мыджагна либас гьевлес. Гьасре манбыше джон устадын гьаIракатбы, гьунарбы садджу югун-югун бинаабы, гьаIйкалбы, хайбы , аабидабы аляъас ишлемишаъанбы. Мааъад къазанмышаъан гьалалын доннух, гьалални къыкыс ишлемишаъан!

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree