В. Васильев республикайни журналистаршиква горушмышхьа

19 Январь 2018
Author :   Камиль Шамхалов

Январьни 13-чил, россиейни чапни Йигъыл', Дагъыстанна Хааlрна Владимир Васильев республикайни СМИ-бышди эл'чершиква горушмышхьа.

Санаъаlтни байрамука табрикавъуйле хъийгъа, ДР-ни Хааlрынкъве Дагъыстанни югни суралхъани бадалыйвал'бышеена журналистаршина заlгьмат агъмышавъу. Манкъуни увгьойка, регионе югвалис эйхьени ишбышда хабар халкьылхъа журналистарше гьивхьарааъа.
Горушее дагъыстанни парламентни спикере Хизри Шихсаидове, премьер-министре Аlбдусамад Гьаlмидове, ДР-ни Хааlрынкъуни ва Гьуlкуматни Администрациейни регьбере Владимир Иванове ва мебни къуллухчерше иштыракау.
Кьоlни санаъаlтна цlыцlахьайни журналистаршиквани ихтилетее В.Васильеве регионни джурбаджурни сферабышис ааидни суалбышис джаваббы хъуво.
Сабара вааджибни суалбышис хъувойн джаваббы гьеле.
– Владимир Аlбдуаlлиевич, гъу республикайни хааlрынкъуни къуллухыл' ишлемишехьен ваlш йигъ быкырхьа. Йигъын Дагъыстанни гьаlкlеедын цlеддыйн фыкырбы?
– Оlгийл' закlле Дагъыстан югда ацlава зы фыкырний гьааъа. Няъас увгьое, ишиква багълыда зы гьиняаъар хьулехьейр ыхьана, захъаб хаlбба гьамбазар вобунбы. Гьаlшде закlле мебна вазият къавджу. Республике къайда-кьаанун яратмишаъас чалышмыш вухьайнбышди гьийб вукlул' кlёозарааъас…
Манчихъа ил'дяакы, хаlдда гьаlллаъасын ишбыд вод. Энки хаlбна дагъамийвалла налокlбы сауйка багълыба. Налокlбы саъас ыккан ва халкьни хайирыс ишлемишаъас лазымда.
Захъад республикайни аллан хошун фыкырбы водунбы. Гьиняаъаб гееб югун, раlгьымыкван, мигьманаршис гьуlрмат гивийхьен инсанароб гуд'мишоохье.
– Къийна чапын Йигъодон. Республикайни СМИ-бышди гьаlкlее гьиджо эгьес ахаlе?
– Няаъар ишлемиш ыхьеейир, зы гьаммаше журналистаршис хаlбна гьуlрмат гивхьу. Мани дагъамни санаъаlтыс къуллух гьааъанбышис зас сагъулва эгьес ыккан. Йизди увгьойка, шахъад югун алаакьабы ихьес. Сана-санкъус кумаг гьуво Дагъыстанеедын месалабы гьаlллаъас.
Горушее един мизяар гьуваджесди гьаlкlеейиб гаф вукку. Манчис джаваббы хъеленкъаl В. Васильеве ман Дагъыстанниме вааджибын суал водунва ва манчини аллан тадбырбы къаджесынбыва увгьо.
Манчиле гъайре горушее ДР-ни Хааlрынкъулхъа журналистарше экологиейква, экономикайква, таlгьлюкайква багълыданан суалбы гьуво.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree