Ыlмырен 60 сен мактабыс гьувона маъаlллим

22 Январь 2018
Author :   Юсуф Бабаев

Югна ацlааликвана маъаlллим хаlбна девлет вобна. Мана гьаммаше чалышмишхьесда мактабын, хивын, джамаъаlтын до ахтывалее гьуваджес. Къийнийна йизда гаф манбышди санкъуни гьаlкlее вухьес. Мана хаlдда сенбына Камбулатни мактабее маъаlллимийвалла гьавъуна Мамедов Раджаб Мамедна дих ворна.

Р. Мамедов 1935-ъэсди сен Муlхаlхни хивее едике ыхьа. Манкъуна ушахийвалла сувабышил' илгъевчlы. Манбы геед дагаъамын сенбы ыхьа. Гьар сурал' касибыйваллайий ёхсулыйвалла вухьа. Хиваршее ешемишоохьени инсанаршин доланаджагъ гьуваджени тасарруфатыке, малкъарайке асылыда ыхьа. Чlакlынбышиква саджигее ушахаршед мани санаъаlтыс къуллух гьааъа вухьа. Муlхаlхбышин гудмиш ивхьай, Хаlбна Ватанна даlвъый гибгъылыйнкъаl сыкlылбаб йыlкь хъувхьа. Хивын хаlббанан адамейр, джаванар фронтейхъа абкlын. Хааъанайий къабна иш ушахаршилхъайий едаршилхъа авху. Водни дагъамийвал'бышихъа ил'дяакы, Раджаб Мамедовее хъаlдхъый таргау деш. Манкъве хъаlдхъый таамауйле хъийгъа, хивни мактабее дарсыбы ыккекка гиргъыл'. Сабара сенбына мааъар ишлемишхьа.
Раджаб Мамедовна хъийгъыйна ыlмрена йаlхъ Бабаюртни Камбулатни хивни мактабыка багълыба. Сувал' воохьени инсанаршихъад эзасын, кьыlдмина малкъара гьуваджесын имканбы дехьайхъа гора, манбышис Бабаюртни торпахбышил' джигабы гьели гидгъыл.
Мухаlхбыйийий кlуссурбы кlылба-кlылба Камбулатни бинайлхъа кочмишоохьи гибгъыл. Манке тезеба кочмишувхьа хъабыйнбышди ушахаршис хъаlдхъый гьелесдимее тезе мактаб аахъы. Мааъад ушахарше ёкьудъэсди сыныфейхъамеени хъаlдаххъа. Мактабыс маъаlллимийвалла гьааъас Раджаб Мамедни духайлхъа тапширмишавъу.
Бабаюртхъа ишлемишхьес хъарыйни сенбышике гаф гибхьыйнкъаl, манкъве эйгьен: «Тезера кочмишхьа хъарыйн сенбы дагъамынбы ыхьа. Манке Рутул районыхъад Бабаюртни зонал' са Быршни хивее ишлемишехьен мактабый. Гыргыни бинабышиле ушахар махъаний гьавайкlан. Камбулатни бинайле махъа гьабкlын-хъабый акьаlнада ыхьайхъа гора, хивее дагъайдни сыныфбышин мактаб аахъасди кьарарейхъа хъабы. Цlеддийн сен мактабейхъа ёкьуйре ушахар хъабы. Аlрейнче сенбы адкlынийле мактабейхъа хъавайлени ушахаршин сай хаlдхъыхьайн. Манке мактаб молюдъэсди сыныфнан хъау. Гойне хьинне манчике йыlкьнекин мактаб хъыхьа».
Р.Мамедовни ыlмрена хаlббанана вахт мактабыка багълыба. Манкъве 60 сен ыlмырен мактабыс къассыр. Мани сенбышее манкъус аали мактабыд таамаъасын имканбы гьувойнбы. Раджаб маъаlллимее биологиейний химиейн факультет таамаъу. Магьаlр мана дагъайни сыныфбышике алидни сыныфбышилхъа илгъечlу. Манкъве сабара сенбына мактабыс директорийваллаб гьавъу. Манкъуни увгьойка, манбыд сибыкын сенбы ыхьа деш.
– Директорни къуллухылхъа хъарийнкъа, зы Быршни хивни мактабейиришлемишехьенаний. Йыlкьыlгьлийлхъамее дарсыбы шааъадний гьеленбы. Манчиле хъийгъа гьиняхъаний хъарайлена. Къуллухылхъа хъарымее, Быршни хивеена иш таргавъуна. Иш хаlб хъувхьа. Манке экlда-экlда мактаббышейхъа комиссиебыний адайленбы. Манбыше мактабее вуккеккани ишилхъа,маъаlллимарше гьелени ацlаалилхъа, ушхаршини хъаlдхъыйлхъа хаlбна фыкырний гьоолена.
Гьаlшде Раджаб Мамедни духе тербие гьувойн ушахар ахтыйни ишбышил' ишлемишоохьи. Манбышда гьарна са санаъаlтна ийесси ворна. Йаlхъ гибхьы хивейхъа абыйнкъаl, манкъусахъа саламыс иккеебачlи. Гьаlлзюгар ваацlоохьи. Акьаlнанбыше вахтале-вахталхъа манкъуна вазият ваацlавхьесдимее зенгбы гьаъа.
Къийна Р. Мамедов, истирагьатее ворна. Мана мактабее ишлемишехьи деш. Амма манчихъа ил'дяакы, вардиш акlанаъа деш. Уlлджумее са элесхьеее мана махъа саламыс иккечlена. Мактабни ишиква танышехьи, гьамбазаршика горушмишехьи. Манбышис наlсиятбы гьели. Манкъве эйгьен: «Гьаlкlена маъаlллим джуна иш баджитба ваацlана, джун санаъаlт ацlана, йикlейнче ишис делес хъехьена, хаlдни муlгьубыка ушахаршис билиг, тербие гьелена инсан ворна. Иш дурустба вуккейсдимее, маъаlллимыхъад хаlбна устадийвалла вухьес вуккан, няъас увгьое ушахаршис ацlаалийна бине манбыше гивийхьи. Цlедда мактабеехъа хъадыйни кул'фатыс, хъаlдхъаlс, окlанас манкъвее хаlдхъаъа».
Мана къийна ешбышее ыхьейир, динджира гийъар деш. Хааъад гьуваджени тасарруфатыка маlшкьулехьи. Иш дешди вахтал' «Нур» кlазет хылехъа алятlу хъаlдаххъаl. Йихъбышди таарыхике, манбышди адабиятыке, къийнийни йигъыке марахланмишехьи.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree