Ед'ни мизекен олимпиада

22 Январь 2018
Author :   Курбан Омаханов

Гьаар сен Дагъыстанни хъаIдхъийний ва ыIлимни  министерствайн республикее ед'ни мизяаршикен ва адабиятыкен олимпиада алгъайгьи. Манчина метлеб ушахаршин гьавас, аIшкь дагъыстанни миллетбышди мизаршилхъа, адабиятылхъа, таарыхылхъа, маданиятылхъа гьаIракатеехъа адчий вобна. Ман хьебни  девырылхъа (этапылхъа)  пайлемишехьи.

ЦIеддыйн этап мактаббышее илгъечIи. Мааъаб гъамувхьайн, югун ацIаал', билиг гьагуйн шигыртар кьоIдъэсди туреехъа илгъеебачIи. КьоIдъэсын олимпиадайн тур районбышее илгъечIи. Мааъад 1, 2, 3 джига авхъуйн ушахар республикайни марказеехъа, МаIгьачкъалеехъа, джон ацIаал'бы бил'дираъас абайли. АIхреени 10 сенни аIрее йишди цIаIхбышди ушахаршед мани олимпиаде иштырак гьауйн ва джос гьувойн маъаIллимарше ацIаал' къелик' авхъа хъау деш.
Гьиджон мани олимпиадайн ушахаршис гьели? ЦIеддыйке, республикайни турее гъамувхьайн ушахар конкурс дена ДДУ-ни филоложи факультетехъа, ДДПУ-ни дагъыстанни мизаршини факультетехъа кьабыляаъа. КьоIдъэсыд, джос дарсбы гьувойни маъаIллимаршина, мактабна дараджа ахты хъоохьи.
Дагъыстанее цIаIхбы аIсас кьоIни районе ешемишеебаххьи– Рутулнийий Бабаюртни. Рутул районе цIаIхбышихъад йихьыдле йыIкьнекин мактаб, са ючIудле сыныфнан мактаб, 5 дагъайдни сыныфбышин мактаб. Бабаюртни районе кьоIдле йыIкьнекин темизда цIаIхбынан мактаб, сайид аварбышиква аливкийн йыIкьнекин мактаб водун. Бабаюртни районедын йишин ушахар хъаIдаххъан йыIкьнекин мактаббы ( Калелин, Муслагъын, Камбулатын) ГКУ РД «ЦОДОУ ЗОЖ» гядакIва.
ХаIдданан йишин мактаббы Рутул районни Сувал'ни маIгьалыл' водунбы. Эн хаIбба ушахарнан цIаIхбышин мактаб Сувал'ни маIгьалыл' Мишлеше водун. Манчихъа гора, мизеква багълыданан йигъынджагъбы хаIббанани вахтал' мааъад илгъечIи. Гьайни элеес ед'ни мизяаршини олимпиадайн 2 этап ( муниципальный этап) Мишлешни йыIкьнекни илгъечIу. Ман 7-11 сыныфбышди телябабышди аIреедын ыхьа. Олимпиадее ЦIаIхни, Муслагъни, Мишлешни, ДжинаIъни мактаббышди ушахарше иштырак гьау. Манбышин ед'ни мизекен ацIаал' ёхламышаъасдиме Дагъыстанни регионын хъаIдхъий артымишаъани институтын (ДИРО) гьазирауйн тапширыгъбы оIтирау. Манбы гьаIшдийни хъаIдхъийни тIабалбышди стандартбышиква уйгъунын тестбы, диктанбы ва сочинениебы ыхьа. Мизекен тапширыгъбы медынбы ыхьа, адабиятыкенбы медынбы. Олимпиадайни комиссиейни жюрие Рутул районни хъаIдхъийни управлениени методисте Керим Лелаеве, мактаббышди директорарше - АIбдулгьаIмыд Гьаджиеве (ЦIЙМ), Ислам Ибрагьимов (МЙМ), Нажмуддин ГьаIджиеве (ДЙМ), Мишлешни мактабни ед'ни мизяаршин дарсбы гьелени маъаIллиме Арсен Мурадове иштыракау. Ушахаршин джаваббы, олимпиадайле хъийгъа, сау ёхламышаъас Керим маъаIллиме Рутылхъа хъыккы. Ненкъвее нена джигайий авхъу, ши хъалесди кIазетни нумрее гьелесынбы.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree