Сувал'ни маlгьалылхъа йизбы гёгъу

29 Январь 2018
K2_ITEM_AUTHOR  Юсуф Бабаев

Сабара гагьна гьихъа сувал' гёгъуйни йизбыше, инсанаршис хаlдын дагъамийваллабы гьуво. Инсанаршини увгьойка, цlеддыйни йигъбышее манчина ахтывалла 80 см гьибхьыр. Цlаlхийни хивейнче шабахъа машинена йаlхъ вухьа деш. Хорайни гомайле абыйни ыкlейкlын машынбышин ийкырый явашау.

Дагъамна вазият Самурыке алидни хиваршее яранмишувхьа. Атталнийий Кlуссурни хиваршиква алакьабы дешинбы. Хивар акьаlнада ыхьайхъа гора, гьабкlыний-хъабый сыкlылдад дагъам хъыхьа.
Кьыlдмына маlгьдын йизбы Сувал'ни маlгьалыл' дехьен хаlдда сенбыний. Гьайни сен сувалхъа гьаlкlен кьыlдым хъады. Са-кьоlдле йигъна хиваршини аlрейдын инсанаршин ивийкырый явашхьайн. Адамерше ивийкарасын джигъырбы темизяъас хаlбна заlгьмат гьавъу.
Гёгъуйни йизбышиле садджу хаlбба ушахар шадувхьа. Манбыше йизыл' мыкбы гьау, гурубы гьуваагы, хайбышейхъа савайли вухьа деш. Санкlабышика гьивгlанас хъигъебчlыйнбышди аlрее чlаlкынбыб кlылба деш вухьа.
Къийна кlылда-кlылда йизбы эрмишехьи водунбы. Машинен йаIхъбыд трахторун аахъыйнбы. Амма манчихъа ил'дяакы, синоптикарше сувабышил' тезедан йизбы ихьесын хабар гьуво. Манчиле савагьийда, гьихъа гёгъыйни йизбышике ыкlейкlбы адлесын гичlбы водунбы. Манчихъа гора, республикайни МЧС-ын мани карее инсанар аlгьтият гьувааджес хъоотlал. Ыкlейкlыке къорху водни джигабышее, кlылба ивийкрева мыслягьаlт гьуво.
Хьойикни хивее ишлемишехьени МЧС-ни ташкилатни хааlрынкъуни Аlгьмад Раджабовни увгьойка, Гыл'мецlни хивни авуд, Цlаlхийни хивни йыlкьнейкни гомайл', Муслагъни хивни гьийд, Самурани дамасана, ивийкаранкъа айыхба вухьес лазымба. Сувабышиле ыкlейкl аблес гичl вобна.
Йизбышике хиваршее воохьени инсанаршди тикинтибышис, малкъарайс зиян хъетlу деш. Мактаббы, ушахаршин бахчебы ва сабара медын социал объектбы чини къайдайл' ишлемишхьа.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree