Манзик-мадраса къуIмахъавъу

29 Январь 2018
Author :  

Шукур Аллагьылхъа, цIаIхбышда (йихъбышда) кIоран таарыхнана ЙыIкьнекна манзик - мадраса аанче игитерше аIдатыйба къуIмавъуна.

ЦIаIхбышди(йихъбышди) йыIкьнекна манзик хаIбна архитектур бинаа вобна. ХХ асырни аIхрее ХХ1 кьома мана абрелхъа абчу: яныл' мураалий алявъу, манзикна чардах бадалавъу, ааIнче къанче суваагъбы гьаъу, тезе къулеббы гихьы, манзикын китабхана хъаъа, гиджаIраIхий аляатIан джига хъаъу, къадын акка бадалау, маIгьаллеехъа плита кIяъу, пIолбы тезелемишау, халчебы гедчу, аанче безягеехъа абчу. Ман гыргын ишбы Аллагьни кумагыква йишди чубабыше къадже. Аллагьыке диляг гьеххъа, ман ишбы манбышис суваабыс одкIуний. Анджах, гьале гьаъасын ишбы хаIдда водунбы. Масалан авгъаани суракин баруг чаттамышхьа водун. Ман гьыIгъаккарассе «чIакIынбыше» чара къавджес вуккан, нейид иш гьааъас вукканни инсанаршис мешатаъас ыккан деш. Манчихъа илдяаку, цIаIхбышди (йихъбышди) джегьилершини ташкилатни кумагыква манзикеени къуIмаалайква, къуIмани хьинека багълыбанана дагъамийвалла январьни вуза гьаIллавъуна.
Юххьан, къыIлина, цывылихъа манзикни абна гьаваа гейб мыкIаба воохьи деш. УIл'джуман ва шаIгьдын кубар гьаъас дагъамийвалла ва даркашийвалла воохьи деш. Анджах кьыIд'мына мааъад не пешт'бы, не отопление дехьайхъа гора, кубар гьаъан инсанар мыкIаалин авхъаахъа. АIсас манчихъа гора ешлибы, кьаIсинбы кьыIд'мына кубаршис абайли деш. Аллагь шале разийра ахвана, мана дагъамийвалла къийна аIреенче абкIынна.
Джегьилерше джоке аIхан пылбы саъу токIана маIгькамна шуныр, 25 кв.м. къуIмани полан алищу манзикни джилилхъа гедчу. Гойне ман шунырыква къуIмани котёлыххъа гицIын. Ман ишбы гьаъасдимее хаIбна устадыйвалла ва манчин ацIаал' ыккан. Ман ишбы гьааъас МаIгьачкъалеенче, джун хаадын ишбы гьассыр, АIгьмадов Фируддин гьаIджий ары. Манкъвее джамаъаIтни кумагыква кьоIни уIлджумни аIрее къуIман пол гедчу ва къуIман хьян ахъа цIыцIаъу. Ман Аллагьын хав къуIмааъасын ишбы гьаъасдимее кумаг йишди джаван чубабыше: АIлий (Видад) АIгьмадове, Фируддин АIгьмадове, Эл'ман Сафарове, Руслан Лелаеве, АбдураIгьим Алхасове, Саид Маллееве, МуIгьаммаде (Эл'чине), Ривазе кумаг гьуво. Манбышди кисайс барака гьевлена.
ЦIаIхни дерайни имамни Эл'дар гьаIджийни увгьойка, Сувал'ни маIгьаллайл'ни гыргыни манзикбышее къуIмаалла дешда. ХаIдданани манзикбышис аIдатый ремонт лазымда водун. Шахъаб ман ишбы гьаъас аIхасын инсанар гыргыни хиваршее вобунбы. Инсаныхъад пыл ыхьай, вар-девлет вухьай гьунар дешёдун. Гьунар ман водун, агар хыл' ачухда, йикI темизда ыхьай. Садакьайхъад хаIдын - кIылин эйхьен дешки. Манзик, йыIгъ, гарма аляъуй, йаIхъ гьавъуй ман эн хаIдын сувааб водун. Гьеленар, аляатIанар Аллагь ворна.
Мана эстафета алебтIу, медни хиваршеедын манзикбы абрелхъа адчее лап югда ихьес.
«…Аллагьни йаIххъехъа атдым гьаъани инсанаршис зы гьаммаше хайир доъаI гьоохъа»,- ЦIаIхни дерайни имамее эйгьи.
Шинаб, «Нур» кIазетни редакциейн заIгьматбы гьауйни инсанаршис джанана сагъвалла аIрзуламишааъа!

121 Views
Super User
Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree