Дженнетна ихье

30 Январь 2018
K2_ITEM_AUTHOR  ВаIгьид' Мирзоев

ВаIгьид' Мирзоев

Муса Фаррухни едигарыс

 

Алеетlу йигъын зы китаб хылехъа,
Эб кlяпlкlынна тlянкlбышика йикlеехъа.
Шааир башда эйхьи Шааирни джувабылхъа,
Джуваббышта устад Дженнетна ихье!
Раlгьмат Муса Фаррух, Дженнетна ихье!

Дюнйе мысийбатна, даlвъийна бала,
Герман фашист Адольф Гитлерке алла.
Етимийваллаб, мысваллаб, мыкlааллаб,
Васыб пай гьибхьырна, Дженнетна ихье!
Раlгьмат Муса Фаррух, Дженнетна ихье!

Кlыл'валее ыхьавор мыссына етим,
Етим ыхьайинкъукер эхьиее бютун.
Ыlмырна йаlхъ вухьа воб дагъамба, четин
Йаlхъ аляагьас ваlвху, Дженнетна ихье!
Раlгьмат Муса Фаррух, Дженнетна ихье!

Хъаlдхъий кьисмат дехьа, вакьаlххъа гьоргьур,
Сыраныл' гидюъур, берееъар гюъур.
Мина баджее ывхуl кьисматыс амыр,
Тlатlаа хылехъа хъуву, Дженнетна ихье!
Раlгьмат Муса Фаррух, Дженнетна ихье!

Архаджбы хав ыхьа, ёргъан - литыке,
Гёгъыйбы хъигъечlу къатба-къатыке,
Къадархьунийике, гьаракатыке,
Джанаке коозхьана, Дженнетна ихье!
Раlгьмат Муса Фаррух, Дженнетна ихье!

Сюрий гёку ухьан, кьатlай къырагъыл',
Ямаджбы вод солыл', былахбы - сагъыл',
Ойкlанор гъу гиргъыл', эйгьивор гиргъыл',
Сувабышда Шааир, Дженнетна ихье!
Раlгьмат Муса Фаррух, Дженнетна ихье!

Мугьуlббатна дастан Аlслийий Керам,
Керам йихъый ыхьа, Аlслий джуна шам.
Гъунаб дастан охьбий, пиялайна джам.
Керамхъа гёйхьанан, Дженнетна ихье!
Раlгьмат Муса Фаррух, Дженнетна ихье!
Заlгьмат авгу дешоб, дих вахъар ыхьа,
Валегьва до гиххьы, игит хаlрхъыхьа.
Духайис аlшкь хъуво, джукер Шааир ыхьа
Канаареехъа агъайшу, Дженнетна ихье!
Раlгьмат Муса Фаррух, Дженнетна ихье!

«Мугьуббатна гуджва» китаб хъигъечlу,
Хьуленкъуни йикlеехъа джуваббы кlечlу,
Гадебы, ичеера- джегьил' дастан джо.
Алышмыш ыхьайни Дженнетна ихье!
Раlгьмат Муса Фаррух, Дженнетна ихье!

Ман йигъын джуваббы гьидхьыр халкьеехъа,
Гаф, соlгьбатбынани маджлисбышеехъа,
Гьекlуй, гетуйнани маlъракабышеехъа,
Хаlбна кьиймат гьооли, Дженнетна ихье!
Раlгьмат Муса Фаррух, Дженнетна ихье!

Йихъбы,- цlахурара – кlылин миллет, эл',
Цlаlхбышин хиваара Гыл'мецl, Сувагыл',
Гъу кlорана Шааир, зынар йигъна кыл'.
Хъихье гъу оlгеехъа, Дженнетна ихье!
Раlгьмат Муса Фаррух, Дженнетна ихье!

Вахъад ыхьа дешод гьин бынагь Дюнйе,
Зынар вак' акарна, йигъни сыранее.
Йизда Йихъистанее, йигъна Аlранее
Ыlмырбы йыlкьдахьа. Дженнетна ихье!
Раlгьмат Муса Фаррух, Дженнетна ихье!

Гьаlзратий Мусайис къонший гъу ихье,
Гьаlзратнийий Ыlсайни кlанеъар ихье,
Магьаlммад (с.аlл.в.) пейгъанбарыке шафаъаlт ихье.
Сираатlна йыlгъ илгъевчlе, Дженнетна ихье!
Раlгьмат Муса Фаррух, Дженнетна ихье!

Шааирва джанееад - ман гёйхьанан цlа,
Шааирын гёрхьуний, Шааирыкlле ацlа,
Ыlмырбышин сирбы Аллагьыкlле ацlа.
Дюнйе къидеджуна, Дженнетна ихье!
Раlгьмат Муса Фаррух, Дженнетна ихье!

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree