Рак йыlкьна чlирывалла вобна

02 Февраль 2018
Author :  

Аlхыреени сенбышее доюкани медицинайни ааlлимаршини увгьойхъа гора, онкологиейна чlирывалла дюнйейни акьвал' гуджнаба еймишоохьи гибгъыл.  Къийна манчин оlги алятlасдимее, хаlдданани оlлкабышее джурабаджура клиникабы, марказбы, институтбы ишлемишехьи водунбы. Амма манбышди гьаlракатбыше гьалекийс гозетяъан натийджабы гьели дешинбы.

Къийна мани чlирывалике растына хъарыйни инсанее хаlбба дагъамийвалла цlыцlааъа. Манкъука саджигее чlыриыкъун делесинбы акьубее воохьи. Сениле-сенилхъа гуджламишехьени онгологиейни чlирывал'бышике гьар сен аазырбышиква инсанар гьабатlа. Дохтураршини увгьойка, къийнийни йигъыл' мана чlирывалла ешлибышика саджигее джаванаршини аlрайлиб растына хъавайлена. Манчиле гъайре манчике вукlаран ушахарыб кlылба дешинбы.

Россиейл' онкологиейни диагнозыка, гьар сен 400 -500 инсан чlиры хъехьи. Манчиква мубариза вуккеккани джурабаджура ташкилатбышди гьувойни маlълуматхъа гора, йицlыдле сенна гьихъа Россиейл' кьоlни милйон инсаныхъабний магьаlбна йыlкьна чlирывалла. Гьаlшде гьар сен манбышин сиягьый хаlд хъехьи водун.
Мани сураке Дагъыстанейиб вазият югба дешобна. Республикайни сагъламийвалла гьуваджени министерствайн гьувойни маlълуматыхъа гора, сениле-сенилхъа онкологиейна чlирывалла инсанаршини аlрайл' хаlб хъоохьи. Гьаlшде Дагъыстанее гьар 100 аазыр аlгьаалийке 71 инсан манчика чlирыра ворна. Шацыйни сен, республикайни 11 районее 1385 инсаныс манчикен маалидже гьуво.
Онкологиейна чlирываллайка вуккеккани, мубаризайн югун натийджабы гьели деш. Гьаlшдийлхъамее мани чlирываликена дарман авайкы дешда. Манчихъа ил'дяакы, дохтурарше эйгьен, гьийгъанче-гьихъа диагноз гиххьыйнкъаl, манчин оlги явашаъасын чlирынкъухъад имканбы водунбы. Манчихъа гора, манбыше инсанаршис экlда-экlда ёхламишувхьес мыlслягьаlт къооджи.
Онкологиейни чlирынбышис кумаг гьагвасдимее, гьар сен февральни вузани ёкьунчил' дюнйейни акьвал' манчиква мубариза вуккеккан йигъ алгъайгье. Мани йигъыл' онкологиейни чlирываллабышис къассырыйн джурабаджура йигъынджахбы, ыlлимын конференциебы илгъечlи.

Яндекс.Метрика
We use cookies to improve our website. Cookies used for the essential operation of this site have already been set. For more information visit our Cookie policy. I accept cookies from this site. Agree