Гьар сен, июнни 27-чил’ Россияйл’ джегьилершис къассырийн йигъ алгъайгьи. Мани ыIмырни оIл’чеехъа I6-30 ешеебын инсанар гябакIа. Манбышди аIреейиб хаIббананбы телябабы вобунбы.
ОIлкайн экономика, адын ва къадын сиясат, маданият, хъаIдхъий, хивын тасарруфат гьаIракатеехъа абадчена гудж – джегьилер вобунбы. Агар гьоIкуматын къийхъийн йигъ шадын ва болун ихьес ыкканхьее, манке джегьилершикIле ачухна ва хъобкуна йаIхъ гьаагвас вуккан; манбышыквана миз тIабалааъас вуккан.
Йишди гьоIкуматыл’ Дагъыстан эн джегьилер хаIббанана республика вобна, гьамыб иш джига кIылбанана республика вобна.
Йишонааъас ишбышди ва къуллухбышди гьаIкIее. Иш, ыIмыр гьаIракатеехъа абаччен лышан водун. СанаъаIт сечмишаъассе гьихъа, гьаарункъукIле джун гьаIракатбы ацIахьес ыккан.
Къийна ишилхъа эчIесдиме, къуллухылхъа илгъечIесдимеега, не югун «калле», не югна дайий, нейид «кокун джиб» ыккан. ЦIеббыйна йаIхъ текасейракни джегьилис кьисматоохьи. Иш ваацIанкъус оIгеехъа ааIсда йаIхъ дешда. ОIгее чIакIын дагъамийвал’бы илёдзыр водунбы. Къийна ушах бахчейле гидгъыл, чIакIни ташкилатбышехъамее рушватын, коррупциейн манбы алищу водунбы. Нимеега манчикван вуруш ыкейид, чараа гьиняа воохьи деш. Инсанни фыкреехъа хъайли деш, яныл’ джуле гьаIракатыкванбы, баджарагъыкванбы, гуджнакванбы воохьива. Мисала вобна: «Къуллухыле бадалааъас дёохьенбы, воохьенбы дешки». ГьоIкуматна иш джуни «деккинчилхъа» сивийкIал. Агар вахтале вахталхъа, «джига къуIмаъабкIаъассе», къуллухчер бадалавъээ, бел’ки сыкIылда коррупциейн оIги даянмишаъас аIха.
Гьаар инсане джун яшайиш ыIмрени аIхреехъаме лайикьука ыккеес ыккан. Манкъухъад камын-кесирын ыхьес ыккан деш. КьаIсхъыхьа ишлемишхьес дяхаIни инсаныс гьоIкуматын гыргын шарааитбы яратмишаъас ыккан. КьаIсинбышда гьуIрмат гьид’вааджени джигее джегьилеершихъаб геледжагъыл’ барака вухьес деш. Анджах ешеени инсанни напсехъабыб кьараал’ вухьес вуккан. Пенсиеехъа хъигъечIуна инсан магьаIрна инсан ворна, манкъуке иш быкырба быкырааъас вааIха деш, йаIъни мана гьааъас джанан муфлат гьооли деш. Йишди увгьойка, пенсиеехъа гьирхьыл’на инсан къуллухыле, гьоIкуматни ишиле аIл’гьаас ыккан. Шавусджад акьвахатир гьаъас ыккан деш. ХаIббанани пенсионераршихъад джон хав-уджагъ водун, ушахаршисын джигабыд къаджейнбы, гьоIкуматын гьелен пенсиебыд аляатIанбы, ишиле доннухбыд къат-къатна джегьилершиле гьеххан аляатIанбы, къуллыхыхъаб тиканхьинне идвийкьананбы, джегьилершиле къел’бы къадчу, медын ишбыд гьаъанбы. Гойнеб шас вукканна сакитна ыIмыр. ГьоIкуматын, аIсас йишди республикайн мани сарданын сиясат бадалдехье, наразийваллабы ахвасынбы. Хиваршее, районее, республикее иш девхьайхъа гора йишин, цIаIхбышин джегьилер, Урсиятни шагьарбышеехъа ишлемишивхьес аIл’гьаа вобунбы. ХаIббанани джегьилерше эскерна къуллу гьаъас кантрактбы одкIун. Хивар кьаIсинбышис аху, сувабыйий чIалагбыд ваIгьщи гьаIйванаршис. Хивар веранхьамее, миллетна мизиб, маданиятыд аIрайле ааIсынбы. Манбы адкIынмеега миллетыд батмишхьесын.
Анджах закIле къавджес вукканий къуллухбышил’ баджарагъукан, ацIааликван, «кIаарни» ишбышее къарышмишдевхьайн джегьилер. Джегьилер гьоIкумат гьаIракатеехъа адаччена гудж вобна. Къийна ши манбы хъобкуни йаIххъылхъа гявгьее, ишебашеехъа авъээ, инам гьаъан гьоIкумат къийхъа гьаIракатеехъа хъалесын. Зас ыкканан йишди цIаIхбышди джегьилершед джон зор, джон гьаIракатбы, джон гьунарбы чIакIни къуллухбышил’ гьагуй. Манчилхъа зы инам гьаъан.
АIхреени вахтал’ йишин джегьилера кIылба-кIылба «чичис уIвхийха» гибгъыл’. Манбыше джурабаджур фондбы ачмишаъы. Манчина макьсаб дагъамийвалеехъа гябкIуйни инсанаршис, етимба авхуйни ушахаршис, инвалидаршис кумаг гьувой вобна. Манчиле гъайре , гьар хивни джегьилерше джони хивни аIреедын ишбы гьаъасын фондбы ачмишаъы. Манчини гьаIкIее ши кIазетее макьалебы гьувойнбы.
ШакIле къеджен гьаIшде гьиджойий соцсетьбыше эхьи. Гивийгъаланбы югни мислягьаIтбышиква , илгъебачIенбы гьыIдчатбышилхъа. Гьаарункъвее джулхъа ёргъан цIыцIааъа. Ихтелет’бы хаIдда, ишбы кIыл’да. Ман карбы джегьилершикIле къаджемее, йикIдена хъоохьи. Миллетни сардан къеджени ишбышди къуллухбышилхъа гогьагьариваликва, тохумбышиква, джибни цIобаликва деш, амма аIкеликва, ацIааликва сечмишааъас вуккан. Шахъаб гьаIкIебаб маIгьбын джегьилер гьар хиваршеенче хъигъебчIуйнбы вобунбы.
Имкам гибхьыйхъа гора, « НУР» кIазетни редакциейн джегьилер джони Йигъыква табрикааъа! Югна ыIмыр ва джанана сагъвалла манбышис аIрзуламишааъа!
