ГьуIрматукан цIаIхбы!
«Нур» кIазетын 2023-ъэсди сенийсын одкlуний (подписка) гидгъыл водон. Кlазет миллетын акьва водун, ва ман гьар хаахъа иккечIес ыккан. КIазетни одкIунее гыргыни джамаъаIтын иштsрак гьаъас ыккан. Къийна ши гыргынкъве эйгьен шахъад район, депутат, ахтыни къуллухейбын инсанар дешва. Ман карбы шахъад ихьесдимей цIебба ши сана-санкъве авхъас вуккан, лазымни джигей кумагбы гьелес ыккан, миллетын до къеджени ишбышиква ахътыхъаъас ыккан. Ман кар шахъад дехьее шахъаб районе, республикайл гьуIрмат вухьес деш.
Гьоlкуматын йишди миллетыс «Нур» кIазет, джамаъаIт саджигехъа саъасва гьуво. Миллетын до ахтыхъаъасдимее, йихъбы гьишубы вухьай дюнйейни акьвал’ ацIалаъасдимей «Нур» кIазетын хаIбна иш вуккейка вобна. Гьаlшде кlазетни кумагын манбы няаъаб ешемишувхьай, гьиджо ишбы гьаъа ыхьай, шахъаб няхуIбын ацIаал’нан ааIлимар, шейхар вухьай хаlббананабышикIле ацlа водун ва йихъбышин до дюнйейлхъа еймишау водон. Мааъад ойкlанан хаlдданан материалбы йихъбышди таарыхыс, манбышди къийнийни йигъыс, гьаъани ишбышис, экономикайс кьадсырыйнбы водунбы. Манчиле савагьийда, кlазетни сайфабышее йихъбышди ааlлимарщис, ишкар инсанаршис, заlгьматкараршис, джаванаршис, шаираршис къассырийн материалбы гьеххалика растына хъайленбы.
«НУР» кIазетын ишчера, чалышмишоохьенбы аIхани къайдайл’ йишди миллетни гьаIкIеедын маIълумат гьелес, манбышин сес республикайни, гьоIкуматни регьбераршилхъа гьихьараъас, йишди халкьыни аIрее ыхьайни югни ва писди гьаIдисабышди гьаIкIеена хабар хъобкуба шолхъа гьивхьарааъас, йишди халкьын аIдатбы, адабият, миз, маданият саламатда гьивааджес ва Дагъыстанейий Азарбайджан ешемишоохьени цIаIхбышин алакьабы маIгькамаъас. Йишди ишис кьиймат садджу шоке гьевлес вааIхас, няъас увгьее йишда иш шокIле къоодже вобна. КIазетис кьиймат манчин акьва къидеджуйни инсанарше гьооли. Гьел’бедти, шахъадыд саIгьвбы эйхьенбы. Вахтал’ гыргыни джигеехъа вуIххъас усылоохьи деш. Сабара инсанаршис, ишбышис хъобкуна кьиймат гьевлес вааIха деш. ГьуIрматыс лайикьын инсанар, фагьам гьидёву «аIхъээ» аахва. Шу шакIле йишин нукьсанбы эгьес ыккан, шакасана гаф джигайл’, ваяхуд редакциехъа абы гьааъас вуккан. Манке ши хъобкуни мислягьаIтеехъа хъавалесынбы.
Редакциейна энки хаlбна макьсад — ед’на миз’ гьувааджий, манчис инкишаф гьаъас имканбы яратмишауй воб. Имканбы шахъад гьаманке ихьес, шу кIазет одкIунее ва манчис кумаг гьувее. Россиейни джурабаджура джигабышее ишлемишоохьени ищкар инсанарше кlазетна иш юг хъааъасдимее джоке ахаlн кумаг гьелен. Анджах манбышин сиягьый манмеегад хаlдын дешодун. Мани ишее авхуйнбыб къырагъыл’ илёозарас вуккан деш. Йихъбышин къийхъыйн йигъ югун ихьесдимее джоке ахаlн кумаг гьелес ыккан. Водни дагъамийвал’бышихъа ил’дяакы, «Нур» кlазетын гьар сен мактаббышее хъаlдаххъани ушахаршини аlрайл’ ед’ни мизекен конкурсбы алгъайгьи. Манбышди аlрайл’ едни мизелхъан аlшкь, гьавас хаlд хъаъа. Югун билиг гьагуйни щигыртаршис пайбы гьели. Пандемиейхъа гора манн конкурсбы даянмышхьани, ИншаАллагь хъооIни сен мед давамаъасынбы.
Гьар сен подписка гидгъылыйнкъаl, редакциейн ишчер сабара четинийвал’бышика растына хъавайли. Манбы акка-аккана ивийкыр подпискабы гьаъа. Хаlббананбыше подпискабы гьаъа деш. Манбыше джурабаджурайн багьнабы тlабалаъа. Сениле-сенилхъа подписка гьаъанбышин сай кlыл’хъехьи. Къийна мани суракена иш сибык хъааъасдимее редакциейхъар подписка гьаъана ишчий ворна. Мнна шу увгьойни джигеехъа айрес гьаlзирра ворна. Шохъаб подписка гьааъасда вахт дешхьее, редакциейка алаакьа аххъе.АIзизын йихъбы, гьуIрматукан йишин халкь, дора «Нур» кIазетис хъооIни сенийсын подписка гьаъас! «Нур» кIазетын гьар хаахъа, хизанейхъа ишигъ ыккекка. Ман йишин, йишди миллетын акьва водун.
Дора йишин акьва нуруква гьуваджесдимее саджигейхъа савалес, кlазетыс подпискабы гьаъас.
Ненкъусе кIазет окIанас ыккан, гьайни адресылхъа ва телефонулхъа мураджиет гьаъас аIхаI:
Телефон: +7(8277) 65-02-84, 8960 -420-06-61. Электронный адрес. nurzz@yandex.ru.
