Инсанааршин ихтиярбы къорамишааъанбышин Йыгъ

МагьаIчкъалайни шагьарее Россиейн тегьлюка гьиваджени органбышди йыгъыс къадсырийн тадбырбы илгъечIу.

 

ЦIебба ноябрьни 8-чил’ тегьлюка гьиваджен органбышин ишил’ гьабтIуйн  ишчеер йикIел’хъавалявъу. Ман йыгъ Россиейни МВД-ни ХааIрынкъве 15 март 2017-ъэсди сен къавуккуни №135 –ъэсди амыруква къейдьаъа гидгъыл. Мани йыгъыс къадсырни тадбырбышее республикайни Правительствайни ХааIрынкъве АIбдулмуслим АIбдулмусимове, МВД-ни министрее АIбдурашид МагьаIммадове, Дагъыстанни прокуроре Алексей Ежове иштиракаъу ва манбыше  Ленинский Комсомола донани паркейни абидейлхъа тIетIбы гиххьы.

Гойне, 500 гьабтIуйни тегьлюка гьивааджени ишчеершди ушахарше джони деккаршин шикылбы хыле алятIу Ленинский Комсомола донани паркысее МагьаIчкъалайни марказни майдамылхъамее ивийкар хъабы. Манбышква  саджигее  АIбдулмуслим АIбдулмусимов, МВД-на министр АIбдурашид МагьаIммадов, прокурор Алексей Ежов ва мебын махъа абыйин инсанарыб вухьайнбы.

АIбдулмуслим АIбдулмусимове Расул Гьамзатовын донани проспектенче алгъаIнкъа гьабтIуйни МВД-ни ишчеершис къабсырни мемориалылхъад тIетIбы ги[хьы ва манбы йикIел’хъавалявъу.

Мемориалысане Почетный Караул илезараъу  ыхьа.

Гойне ноябрьни 10-чил’ адни ишбышди ташкилатбышди ишчершин йыгъ къкйдаъу.

 Дагъыстанни республикайни ХааIрункъве Сергей Меликове джони ишиква алаакьани байрамыква гьоIкуматын  адын ишбы ыккеккани силагь ташкилатбышин  ишчера ва ветеранар табрикавъу.

Манбы байрамыква табрикааъанкъаI, С. Меликове джуни чыхышее увгьойн: «Таарых кIелийханаъас ыккан деш. Ноябрьни 10-чил’ кьуватыквани рыIгьынани, зирингни,  къорхуйле хъыIдяаIкьанни инсанаршин байрам алгъайгьен 60 сен быкырхьа. Манбыше джона ыIмыр гьоIкумат абни къорхуйке къорамишаъас ва ваадждын миллетын дагъамийвал’бы ва суалбы гьаIллаъас къабсыр вобна..

Шу, вушди ишин джамаъIатни аIреена сакитыйвалла гьувааджи, республикайн экономика артымишаъасын имканбы яратмишаъа, дагъыстанлыбышин ихтиярбы , диндж гьуваджи. Шу гьааъана къуллух мысаджаб сибыкна вухьана деш, гьаммаше нягьаIкьни ишбышиква, гьаIракатбышиква мубаариза вуккекканбышди гьийбни джаргее вухьа. Республикайн кьаанун гьуваджы ва инсанаршин ихтиярбы ва борджбы къорамишау. Шу къирагъылее хъооIни къорхуйле хъыIдябкьын ,  гьоран, сихын, рушватбышин, хъоIхъийн, нягьаIкын ишбы гьаъани  инсанаршин оIги ыIхы.  Абни ва къабни душманаршис Дагъыстан дагъылмишаъас гьадсыр деш.

Вушди гыргынкъус зы утIумна джанана сагъвалла, баракат, суIлигькван хаIйбы аIрзуламишааъа! Гьасре дагъыстанни миллетын сагъул-варул, ыIгьтибар , раазивалла шос, вушди дагъамни ишис пайна вухьеджин».

Гьамани джар йигъыл’, Дагъыстанни Правительствайни садрее АIбдулмуслим АIбдулмуслимове  иджазабы къорамишаъани ташкилатбышди гьабтIуйни ишчершини рыIгьыс гивхьуйни , ДР-ни МВД-ни бинаани гьийбни,   гьаIйкалылхъа тIетI’бы гиххьы. Мани йигъынджагъ байрамыква алаакьа гьаы. Мани маджлисее иштыракаъани инсанарше, гьабтIуйни ва гябтIуйни ишчершин едигар 1 динджини дакьийкьайква йикIел’хъаляу.