Мани йигъыс къадсырыйн йигъынджагъ Максим Горькийни дойил’ни урусни театре илгъечlу. Мааъад ДР-ни Правительствайни хааlрынкъвее Аlбдулмуслим Аlбдулмуслимове, министрарше, халкьни маджлисни депутатарше, абыйни мигьманарше,заводни чlакlынбыше, ишчерше иштиракау.
Гьаlшде М. Гьаlджиевын завод, республикее ишлемишехьени ташкилатбышди аlрайл’ хаlдын водун. Ман 1932-ъэсди сен аахъы. Къийна заводун хаlдда джурабаджура ыlгьтаджбы гьазираъа. Манчин хаlддананбы судостроительствее ишлемишаъа. Заводни цехбышейнче хъигъечlуйн ыlгьтаджбы, Россиейлхъа айкlан , хаариджи оlлкабышейхъа масса гьели.
Заводни юбилейка Правительствайни садрее Аl. Аlбдулмуслимовее Республикайни хааlрынкъуни доюле мааъаб ишлемишоохьенбы табрикавъу. Манкъве увгьойн: «Цlедда Дагъыстанее чугун вушди цехбышее эрмишаъа гидгъыл. Ючlал’ни сенее заводын республикайни экономикайс хаlдын кумаг гьуво. Къийнад мана иш явашувхьа дешобна. Заводус хаlбвалла Абдулвагьаб Папалашеве гьааъан хаlдда сенбы водунбы. Аlхырейни сенбышее растына хъавайлени дагъамийвал’бышихъа ил’дяакы, заводун вуккеккана иш илезарау деш. Маны карее манкъвее хаlбна иш вукку.
Гойне хьинне Правительсвайни садре Аl.Аlбдулмуслимовее республикайни хааlрынкъуни доюле хъадыйн табрикааъан кагъыз хъаlдхъы. Югба ишлемишоохьенбышис республикайни сураке медалбыйий горамотабы гьуво.
Заводни директоре Абдулвагьаб Папалашове джуни чыхышее увгьойн: «Къийна завод гьаlракатыка ишлемишехьи водун. Сабара вахтаке завод тезе джигейхъа илгъечlес. Гьаlл гьазыре маъад цlеддыйн чугун эрмишаъан цех ишлемишехьи водун. 2022-ъэсди сенни аlхырейхъасее кьоlдъэсын цех истифадейхъа хъелес. Манчиныд алава иш джигабы аахъас. Джуни чыхышее А. Папалашове заводун ишчер 90-сениква йикlейнче табрикавъу. Манбышис геледжагъыл’ югун угъурбы аlрзау.
Заводухъад хаlдын коллектив водун. Мааъаб ёкьуд аазырыле гьеххана ишчий чалышмышехьи. Манбы токарар, монтёрар слесарар, станокбышин операторар ва сабара мебынбы вобунбы. Манбышди аlрайл’ цlаlхыйни миллетынбы вобунбы.
Манбы монтажник Абдулкьадир Аlлиев, токарь Шаlъбан Аббасов, технолог Рамазан Кавузов, нормировщик Аlбдурагьман Наврузов, бухгалтер Мерджамат Наврузова, электрик Сулейман Магьмудов, оператор Рафаель Аlбдуллаев, оператор Самир Аlбдуллаев, искlладчий Анжел Магьмудова ва сабара мебынбы вобунбы.
Рафаель Аlбддулаев заводе ишлемишехьена 38 сен водун. Мана къийна энки дагъамын ыlгьтаджбы гьаlзираъани станокна оператор ворна. Манкъуни ишис, гьаlракатыс, баджаругъыс заводни чlакlынбыше ахтына кьиймат гьооли. Югба иш вуккухъа гора, Р. Аlбдуллаев заводни сураке гьелени джурабаджура мукафатбышис лайикьра къаджы.
Манкъвее закани ихтилете увгьойн: «Зы заводейхъа тезера ишлемишхьес хъарыйн сенбы югда йикlел’ водунбы. Манке заводухъад хаlдда цехбыний. Манбы кьоlдле-хьебыдле сменабына ишлемишхьа. Совет гьоlкуlмиат дагъылмишхьайква завод дагъамийвал’бышика растына хъады. Хаlдданан цехбы утlумхьайнбы. Манчиква саджигее ишлемишоохьени ишчершиныд сай кlыл’ хъыхьа. Къийна ши гьаlзирауйн ыlгьтаджбы джурабаджура джигабышее ишлемишаъа. Манбы геллесынбы корабыльбышис лазымехьи». Р. Аlбдуллаеве вудже сечмишауйни санаъаlтылер нимеехье разийра ворнава ихтилетни аlхырее агъмишау.
Заводни юбилейс къадсырни йигъынджагъее ахтыйни добышис лайикьба къавджуйнбышди аlрайл’ сайир заводни кьоlдъэсди механосборочный участокна хааlрна Бахтияр Бабаев ыхьа. Мана Дагъыстан республикайни «За доблестный труд» орденыс лайикьра къаджы. Б. Бабаев заводе ишлемишехьена 18 сен водун. Мана джаван санаъаlткар ворна. Амма манчихъа ил’дяакы, мани сенбышее манкъвус вуккеккани ишнин азыбы югда хаlдхъыхьа. Гьаlшде Бахтиярын до заводни югни ишчершини джаргее водун. Джуни участокни ишчерше манкъус хаlбна гьуlрмат гивийхьи. Манкъуни джувабеенче хъигъебачи деш. Манбыше гьар сен пlлпнее гьагуйнчиле гьеххада маlгьсулбы гьаlзираъа.
Йишди редакциейн гыргыба Магьаlммад Гьаlджиевни заводе ишлемишоохьенбы юбилейква табриаъа. Бахтияр Бабаевыс алятlуйни орденна барака гьааъа. Авхуйнбышис угъурбы гьеххъа!
