Къийна Россиейн Украинее ыккеккани спецоперацие хаlбба цlаlхни халкьын эскерар вобунбы. Манбыше джони джомардийваликва, игитийваликва йишди миллетын до авхуйнбышди аlрайл’ ахты хъаъа. Командирарше манбышди гьийд гиххьыйн тапшырыгъбы быкыраъанбы.
Сабара вахтна гьихъа хизанбышейхъа истирагьатбышис цlеббыйн эскерар хъооl гибгъыл. Манбышда геллесда истирагьатбы гьауйле хъийгъа, меб джони частбышилхъа савкlалас. Манчихъа ил’дяакы, хивни джамаъаlтын манбы хаlдни тетенкйква къаршиламишаъа. Манбы сагъба-саламатба хъабыйхъа гора, садакьабы гьели, шадлыхбы алгъаъа.
Гьинчиле сабара йигъбына гьихъа, хаlдын тентенейкван горуш Гыл’мецlни хивее илгъечlу. Мани йигъыл’, хивын джамаъаlт, джони спецоперациейнче хъабыйни эскераршини гьихъа хъигъебчlы. Йихьыбле вазна Украинее ыхьайни Байрамов Мубаризый Исрафилов Уммахан хъабыйхъа гора, шадваллабы алгъавгьу. Хивна хааlрна-кlыл’на эскерейнче хъабыйнбышди гьихъа хошгелдийс хъигъебчlы.
Мубариз джуни гьамбазаршика спецоперцаий гидгъылни цlеррийни йигъылее мааъар ворна. Манбыше Херсонни вилаетын Великая Александровка шагьар миллетчершике темизяаъани джурайни операциее иштиракау. Манкъве увгьойн: «Цlеддыйни йигъбышил’ мааъад хаlдын вурушбы адкlын. Миллетчерше аххъыйн торпахбы йыlкьаlлхъа сакlалас ыккыйкын деш. Амма ши манбышиле гъамувхьайнбы. Къийна ши воохьени шагьарее вазият манмеегаб йыlкьба дешобна. Манчихъа ил’дяакы, ши боще хъоохьи деш. Чалышмишоохьенбы темизяуйн торпахбы гьуваджес. Махъа милетчер савкlаласгьидяасарас. Гьаlшде миллетчершини сурал’ хаlдын кьуваббы илёдзур водунбы. Манбышис гьар суракен ярагъыкваний техникайн кумаг хъооl. Миллетчершини сурал’ медни оlлкабышин эскерарыб вобунбы. Манчихъа ил’дяакы, ши нишиледжаб хъаlвайкьан деш. Чалышмишоохьенбы миллетчершина кок къацlакlванас. Спецоперация аlхырейхъамее ыккейсын шахъад гыргын имканбы водунбы».
Мана Россиейни миллет’ гвардиейна эскер ворна. Мана спецоперацие гьагуйни игитийвалике командирарше грамотабышис лайикьау. Манчиле гъайре, манкъус «За проявленный доблесть» медал гьуво.
Мубаризый Уммахан сана-санкъус делесин инсанар вобунбы. Манбы джурайни частбышил’ эскерийвалее вухьейиб, йигъбышди са йигъыл’ мааъаб горушмишувхьайнбы. Уммахан контрактника ишлемишехьен хаlдда сенбы водунбы. Манкъве гьагуйни джомардийвалис гьамбазарше ахтына кьиймат гьооли. Мана чалышмишехьена гыргыни джигее цlеррийна ихьес. Командирарше манкъуни гьийд гиххьыйн гыргын тапшырыгъбы уфтанда аlхырейхъамее быкырааъас.
Къийна манбы истирагьатыс хъабы едике вухьайни хивее вобунбы. Сабара йигъбышике манбы мееб частбышилхъа савкlалас. Манбыше эйгьен: «Истирагьатбы экlда таамхьа, амма ши гьамбазаршини яныл’ нимеехьей югба ихьес. Манбыше ши гозетяъа вобунбы».
Гьаlшде Мубаризый Уммахан хьинне садджу Гыл’мецlни хивейнче Украинее алгъааlни спецоперациее йигlни джаванын иштыракаъа. Манбышике истирагьатыс хъидябыйнбы вобунбы. Манбышди гыргынбышис джанана сагъвалла аlрзааъа. Экlда спецоперация таамхьа, хайбышейхъа савкаlаланбы!
