Миллетна игит гьаммаше йишди йикIее ихьес

Ноябрьни 20-чил’ МагьаIчкъалайни шагьарее Украинайл’ аIлгьааIни спецоперацие душманаршди хылеке раIгьматыххъа аркIынна АIгьмадов Ренат НурмагьаIммадна дих ахрейни йаIххъылхъа еласалмишау.

Ренат АIгьмадов 1987-ъесди сен июнни 6-чил’ едике Астарханни вилаетни Енитаевск районни Ивановка донани хивее едике ыхьа.  Амма манкъуна кок ЦIаIхийни хивеенче вобна. 

Зас къийнийнхьинне йикIел’ водун Ренат едике ыхьайн йыгъ. АIгьмаIдовар  Агъезийни хивее йишин къоншибы вухьа. Мана уфтанна хабар хъабыйинкъаI, манбышиква саджигее, шинаб джон къоншибы, щадеебхьайнбы.  НурмагьаIммад чоджийний  Гуляра баджийн ман цIеддийн ушах ыхьа, ва манбы манъкуле гуянмишоохьи вухьа. 

Ренате Ивановкайни хивеедын йыIкьнекиин мактаб таамауйле хъийгъа, Воронежни шагьаре МВД-ни инистутейхъа иккичу. Ман институт таамауйле хъийгъа мана са сена Астарханни шагьарее участковыйна ишлемишхьа. Гойне эскерейхъа хортул. Эскрийвалла тамавъу, 2015-ъсди сен манкъве контракт одкIун Абхазиейни республикайл котрактыка эскерийвалее  къуллух гьааъа гиргъыл’. Мана Россиейн гьараIкатыква Украинайн халкь азгъунувхьайни миллетчершике темизяаъасдимее гидгъылни спецоперациехъа хъортул. Мааъар цlеддийни йигъыке танке къуллухааъа ыхьа ва душманаршин оlги алятlасдимее сержент Реннат АIгьмадове джукани достаршиква хаlбна иш къооджи вухьа. Манбыше дагъамийвал’бышихъа ил’дяаккы, душманарше аххъыйн шагьарбы ва хиваар сакlалаъас чалышмишоохьи вухьа.

Манкъвее гьаlкlени игитис аваакlыйн ишбы къеджи ыхьа ва душманаршиква мубариза вуккейкка вухьа.  

Херсонни   вилаетыл’ Шевченко донани хивни кIане аIл’гьаани вурушбышее манкъун танк душманарше къитIокIалаъу ва  мааъад Ренате дюнйе бадалауйин.  Джуни экипажна са эскер сагъра аху, авхуйнбы къаIгьраманар хьинне гьабтIуйнбы. Манбыше аIхрейхъамее командирарше гьувона амыр быкыравъуна.

Ренате джуни дидее хьинне, нацистершиква вуккейккани мубаризее иштиракаъу, джан гьуво. Манкъуни дидее АIгьмад  АIгьмадове  ХаIбни Ватанни даIвъэ иштыракау ва мана 149 стрелковой дивизие сапер ыхьа. АIгьмад дайи Украине, Польше, Чехословакие ва Германие вурушмишхьа. Мана Одерни дамайке цIерра илгъичIу, мааъад плацдарм аххъы. Ман плацдарм аххъахъанкъаI манкъвее сабара немецар гябтIу ва манбышда кьоIйре есирна аляртIу.  Мани къаIгьраманийвалис А. АIгьмадовыс ЧIаIрана хаIнейн орден гьуво.

Ренат уфтанни цывул’ни къуIмани йыгъыл’ Хушетни някъвбышее, мусурманни динни аIдатбышиква, джаIмаъаIтын бастураъу.

Ренатыс дженнет гьелен, джуни къоIни балайс, джуни хьунащейс хыллийна ыIмыр Аллагье гьевлена! Деккис, едис, делесынбышис йикIес сабырбы гьеленбы! Ренат ва вуджхьинне джаванба гьабтIуйин йишин игитеер гьаммаше йишди йикIбышее ва фыкырбышее вухьес. Амин!