Ватан къорамишааъас абкIынийн джегьилер

ДаIвъийна либас:  оIлум, эб, мысвалла , хаджалат водунбы. Анджах мани фаляакатыке саджар къорамишхьа дешёрна. Инсанаршике даIвхийнбы ешемишивхьес ачухни хаIйбышик авуб, таарыхын дарсбы экдаджад манбышике кIелийхананбы.

Украинее  спецоперацие алгъааIн ючIуIбле ваз быкыроохьи. Манчина метлеб Донбасс ешемишехьен урусни мизел’ юшенаъан джамаъаIт укранацистаршике къорамишауй вобна. 2014 ъэсди сен Украинее кьаанун дешин чапхын ыхьа. Манке джамаъаIтын сечмишавъуна гьуIкум къатмишавъу. Донбасс ешемишехьени джамаъаIтыс ман кьабыл’хьа деш. Мааъад митингбы, наразийваллабы  гидгъыл. Инсанар мислягьаIтеехъа хъабыйнбы, Украинайни къурлушеенче хъигъебчIес. ГьыIдчатбы садкIылыйнбы даIвъий-дарамабышилхъа. Украинайни армиейн ва медни силагь ташкилатбыше Донбасс ешемишехьени инсанаршилхъа ярахыква басхынаъа гидгъыл. Мани цIаехъа кьыш Авропайни сабара оIлкабыше Америкайква саджигее кIяъы .

Гьел’бедти, Росссияйныд Донбасс ешемишоохьени инсанаршин тераф аххъы, манбы къорамишааъа гибгъыл. Сен-сениле мани къаламакъалын сергьатбы чIакIы хъыхьа. Хурын алдабхьынийбы даIвъийбышилхъа садкIыл. Эгьес эйхьи , дюнйе кьоIни суралхъа хъыхьа. Авропайний , Къузайлин Америкайн джони НАТО-ни къошунбышиква Украинайс ярахыква кумаг гьели гидгъыл. ДжитIада, манбыше Украинайн джамаъаIт Россияйква вурушмишхьес аликкы. Къийна Украинайс хаIбвалла Америкайний Авропайн гьааъа вобна. Манчихъа ил’дяаку, референдумыле хъийгъа, Россиейн Донбассын республикабы ( Донецкна, Луганскна) ва Запорожиейний  Херсонын вилаетбы джони таркибеехъа аккяы. ГьаIшде, Россиейни кьаануныква, Украинайни армиейн Россиейн чIиебы водунбы аххъы. Россиени армиейн, росгвардиейн, джони раазиваликва даIвъийеехъа абкIынни адамерше, едарше манбы душманаршике темизяъа водунбы.

Украинее аIлгьаани спецоперацие иштыракаъанбышди аIрее цIаIхбышин джегьилерыб кIылба дешобунбы.  Манбыше джон бордж Ватанни гьийдын игитерше хьинне хъели.  Ши чалышмишоохьенбы, гьар « Нур» кIазетни нумрабышее манбышди гьаIкIеедын маIълумат гьелес.

Къийнийна гаф ЦIаIхни хивеенче моблизациейква абкIынни джегьилершини гьаIкIеена вухьес. 

РФ-ни Президентыни амурыква гьайни сенни октябрьни вуза йишди оIлкайл’ къаIйиххыйн мобилизацие гидгъыл. Украине аIлгъааIни спецоперацие иштыракаъас 300 аазыр резервеебын, ненхъухъадый военныбышин санаъаIт, джегьил’ адамер хъобтIул.  Махъа хъоотIаланбышди аIрее йишди миллетын адамераб вухьа. Контрактыква эскере  къуллух гьааъанбы, зы эйгьи деш, няъас увгьее манбышин сай хаIдда водун.

ЦIаIхеенче ёкьуйре джегьил’ : Мусаев Адам Айдынна дих, ГьуIсейнов Нурсултан  МаIгьаммадсаламна дих, КIамазов Саакит ГьаIджиэфендийна дих, Сулейманов АIлий АIббасна дих мобилизациейква  абкIын.

Са вазна манбы гьар джура Россиейни военныбышди  полигонбышее гьазиравъу. Къийна манбыше гьийдни даIвъийни линейл’  ярахыква Ватан къорамишааъа вобна. Махъа вуIххъассе гьихъа, гадебышихъад джон иш джигабы ыхьа. Манбыше къуIванан мебел’ни гьаъа, хивни тасарруфатын ишбыни гьаъа, шофирыйваллани гьааъа. Ватан дареенанкъаI, манбыше ишбы гьадсыр хылехъа ярах алеетIу.  ЦIаIхбышди джегьилершини фондын манбышис махъа ааIссе гьихъа къуIман палтар ва фронте лезимехьен  карбы алищу. ГьаIшде манбыше спецоперацие военныбышин техника гьеъэекка ва душманарше ыIхийн  техника хъаъа. Манбышди хьебыйре эвлемишдевхьбайнбы вобунбы, амма Сулейманов АIлийхъаб хизан: хунаще , кьоIдле ушах водун.

Хаабынбыше хаджалат гьимааъаджинва, манбыше аIрабирда фронтеенче зенгбы гьаъанбы. Манбышин бабадидераб ХаIбни Ватанни даIвъийн ветеранар вухьа.  Саакитый АIлий даёгълийий мамогълий сана-санкъус воохьи. Манбышда дидей КIамазяана  Урудж дайий хьебни — финаршиквани, немецершиквани, японаршиквани даIвъийбышда иштыракчий ыхьа. 1938 сениле 1946 сенилхъамее мана Ватаныс бордж хъели ыхьа. Хьуленихье элейс яраламишхьана. Мана са вурушее батмишхьанава хаахъа карын кагъызыд хъадыйн, анджах манкъун аIджал манке гьидхьыр ыхьадеш. Джанеени яра-парайква мана хаахъа хъары. Урудж дайийни гьаIкIее гьаIшдед югун хабарбы ющенаъа. Мана мигьманар вукканна, къабыляаъана инсан ыхьа. Манкъуни хааъад гней идёдхьунна инсан ыхьа деш. КъыIл’-кьыIдим манкъуни хааъар мигьман камехьена дешдийки. Урудж дайийхъад кокси гяцIыйн орденбыйий медалбы ыхьа.

Къийна Саакитнийий, АIлийни дамарбышее Урудж дайийна эб ивийкар вобна. Инам гьааъан , манбы джона дидейхьинне, укранацистаршиле, фашистаршиле,НАТО-ни къошуныле гъамувхьа хивеехъа савкIаласынбы.

Спецоперацие иштыракаъани гыргыни цIаIхбышди джегьилершис садджу югун гьеххъа, мыкIана чара хъиздяахана, сагъба-саламатба гъамувхьа хизанбышеехъа савкIалас кьисматаъан! Манбышди едяршис, деккяршис, хьунащершис , ушахаршис сабыр гьелен! Аамин !