«Нур» кlазетни редакциейн районни йыlкьнекни мактаббышика югун алакьабы гьуваджи. Къийна мактаббыше ыккекани ишбышиква танышувхьайнимее, джигайл’ воохьи ва манбышди дагъамийвал’бышди гьаlкейий югни суралхъани бадалхьайбышди гьаlкlее хабарааъа. Гьайни йигъбышее ши йишин аlдат гьуваджы Бабаюртни бинабышил’ни йыlкьнейкни мактаббышее вухьа. Гьини элесда йишда сафарий Теземуслагъни йыlкьнекни мактабехъа вухьа. Мактабни директоре Наврузов Сафар Муслимни духее гьавъуйни ва геледжагыл’ фыкрее аххъыйни ишбышди гьаlкlее ихтилет гьау.
— Сафар маъаlллим, гьихъа мактабын аккабы ачухданий эйхьенбы. Къийна ши мактабни магьаlллейхъа иккебчlессе къаравуле къаршиламишавъу…
— Ши аlрсее гьавъу абыйни мигьманаршис йишин аккабы гьаммаше ачухда водунбы. Гъу гьаlкlера ворна. Гьихъа йишди мактабын гьар сура селлимданий. Мактабни магьаlллейхъа иккебчlес-хъигъебчlес дагъамда дешдий. Гьаlшде мани сураке районни хъаlдхъыйни управлениейн сабара бадалыйваллабы ыккы. Шокlле къеджен къаравулин утагъ тезе аляуйн водун. Мааъар хаlм- йигъна инсан гийъар. Макатбейхъа оlххъаlна инсан, манкъве къаршиламишаъа. Гойне хьинне манкъве шас хабар гьооли. Аккас къаравул’ илёзарауй къийна оlлкее яранмишувхьайни дагъамни вазиятыква багълыба. Шокlле шагьарни мактаббышее аlхырейни вузаршее яранмиишувхьана вазият залеб югба ваацlа вухьес. Мактаббышис динджиба иш вуккейс гьавайсар деш. Гьар йигъысди ыккеккани эвакуациейбыше дарсбышин пlланбы пызмышаъанбы. Шахъад мани саягъылин дагъамийваллабы дехьейид, ши гьийгъанче гьихъа йишда къооджена.
— Мактабейхъа хъавайлени шыгыртарше югун ацlаал’ алятlасдимее, манбышихъад нишикенаджаб дагъамийвалла вухьес вуккан деш. Гьаlшде гьаваабы мыкlа хъыхьа. Гьийгъанче кьыlдим хъооl. Манчисда гьаlзирийвалла вобнане?
— Мактабни сыныфбышис къуlмаала гьооли октябрыле гибгъылыйнбы. Манчисын янаджагъ гьихъаджад ши хъады ыхьа. Къаейна гlадыр, осбы мактабыхъад гьеххаалика водунбы. Кьыlдим нимее мыкlан хъадейид, шас гичl дешда. Гьаlшде шыгыртар сыныфбышее оодун палтарбы дена гивийъар
— Къийна Правительствайн хъаlдхъыйни министерствайка саджигее ушахаршин хъаlдхъый гуджламишаъасдимее хаlдда джурабаджура программабы ишилхъа адаччи. Манчини аlрайл’ сайиб дагъайдни сыныфбышейхъа хъавайлени шыгыртаршис гьелени къуlмани одхьунийка багълыба.
— Ушахаршис гьелени къуlмани одхьунийка багълыданан суал йишдимее гьаммаше кьомадын водун. Мани карас гьокуlматын хаlбна фыкыр гьооли вобна. Мани сардан зарада-зарада ёхламабы эйхьи. Санэпидстанциейни дохтурарше одхьунийс, кар гьаlзирааъани джигайс гуджнан назарат ыккекка. Гьихъа шахъад сабара дагъамийваллабы ыхьайнбы. Гьаlшде гыргыда манбы аlрейнче алятlу водунбы. Ушахаршис къуlман одхьуний гьелен буфет водун. Хорагбы хъохьарасдимее вахт-вахтына районейнче тадарукбы алятlанбы. Манчикена кеситийвала дешда.
— Йизди ихтилетике вас хатир имахваджин. Сабара вахтна гьихъа сыныфбышейни мебелихъад са дойий. Гьаlшде шакlле югни суралхъан бадалхьайбы къедженбы.
— Гъу гьаlкlера ворна. Йишди мактабын мебель бадалгьидяъан хаlдда сенбыний. Аlхырейни сенбышее манчихъаб гьаlл авху дешдий. Гьар сен манбы ши ширрамишаъа ыхьа. Районни хъаlдхъыйни управлениейс шахъад водун дагъамийваллабы агъмишаъа ыхьа. Аlхырки гьайни сен манбыше шас тезе партабыйий истолбы гьувойнбы. Манчиле гъайре мактабыс медын тезе хъалесын карбыд водунбы. Манбы китаббы саъан ишкlабыйий истолбы водунбы. Маныд эгьес, мактабын йиссе хъыхьайн мебель бадалаъасдимее гьокуlматын шас 483 аазыр манат пулына гьуво. Мани карее ши хъаlдхъыйни управлениейс, министерствайс миннатдарийвалла агъмишааъа.
-Манчихъа ил’дяакы, мактаббышихъад водун гыргын дагъамийваллабы аlрейнче айкlан деш. Сабарабы ахванбы…
— Манбы дехьесдимее хаlдын ишбы ыккейс ыккан. Къийнийна йишди дагъамийвалла мактабна магьаlлла абрелхъа абчыйка ва мактабын фойе тезелемишаъасди ишбышиква багълыба. Сабара сенбы водунбы фоейхъа кlяуйн кафель темизда хъодуйн. Манчина сабабыб мактабни делесвалейна хьинена арх вобна. Мани ишбышис управлейнче алава кумаг гьеххъы. Умуд вобна, шаке ман ишбыд гьаъас ахаlсынбы.
— Сафар маъаlллим, гьийдни сенбышее вушди мактабей ахуйни мактаббышихъа иляаканкъаl ушахар хаlббайий. Гьайни сенийна вазият вацlавхьес вукканий?
— Мани сардан хаlдын бадалхьайбы дешинбы. Манбышин сай сыкlылда кlыл’ хъыхьа. Гьаlшде мактабее 92 шыгыртын ацlаал’ алятlа водун. Манбышди аlрайл’ 9 ушах гьайни сен тезеба мактабейхъа хъабыйнбы вобунбы. Маныд эгьес ыккан, Теземуслагъни мактабее саджу йишди бинайл’ воохьен ушахарджаб деш, къырагъыле хъабайленбыб вобунбы.
— Дора сыкlыл’на гаф мактабни коллективни гьаlкlее гьааъас. Мактабыхъаб гыргыни передметбышин маъаlллимар вобунбыне?
-Мани карее шахъаб дагъамийвалла дешда. Гыргыни предметбышин маъаlллимар вобунбы. Садджу английскний мизена маъаlллимный деш. Гьайни сен мана мисалаб аlрейнче алябтlуна. Гьаlшде мани предметын дарс делесни хивейнче хъарайлени маъаlллиме ыккекка.
Йишин ихтилет таамхьайле хъийгъа, Сафар маъаlллиме ши агъмишауйни суалбышика багълыдана ишбышика танышавъу. Зы джукасана мактабни сыныфбышее, ушахаршис къуlман одхьуний гьелени буфетее ва сабара медни джигабышее ыухьа. Закlле мааъад ыккыйн бадалхьайбы делесвалейнче къаджыйнбы. Горушни аlхырее зы Сафар мааъаlллимыс вудже хаlбвалла гьааъани коллективыс угъурбы аlрзау.
