ЫIмыр маъаIллимийвалис къабсыр

МаъаIллимын санаъаIт гьаый, сечмишавъуйни инсанаршик’ аваакы. Манкъуни ишина дараджа, ваджибыйвалла  гьаммаше ахтыба вухьа. Амма кьиймат манкъуни ишис гьар ваахтал’ са саягъыл’ гьувы.МаъаIллимын санаъаIт гьаый, сечмишавъуйни инсанаршик’ аваакы. Манкъуни ишина дараджа, ваджибыйвалла  гьаммаше ахтыба вухьа. Амма кьиймат манкъуни ишис гьар ваахтал’ са саягъыл’ гьувы.

 

МаъаIллимна гьуIрмат гьидвааджени оIлкайхъад, не югун ешайиш, не гьаIракатеехъа аIл’гьаан геледжагъ ихьес деш. МаъаIллимый дохтур Аллагье дюнйейлхъа къахувыйн санаъаIтбы водунбы. 

Къинийна йишда макьаале ЦIаIхни мактабни завучни АIгьмадхан КIамазовни гьаIкIеена вобна. Гьайни йигъбышее манкъун 70 сенийн юбилей ыхьа. Манкъвее джуни ыIмырен 40 сен  маъаIллимни санаъаIтыс къадсыр.  

КIамазов АIгьмадхан Уруджна дих 1953 сенни январьни 18-чил’ ЦIаIхни хивее ХаIбни Ватанни даIвъийни ветеранни хизанее едике ыхьа.  ЙыIкьнекин мактаб ЦIаIхни хивее 1970 сен таамау. Манчиле хъийгъа са сенна ЦIаIхни йыIкьнекни мактабее лаборантна ишлемишхьа. 1971 сенни майни вузаке 1973 сенни майни вузеехъаме  Ватаныс бордж хъели эскерийвале къуллух гьавъу.

1973–1975 сенбышее ЦIаIхни мактабе физкультурайн дарсбы ушахаршис гьувы. 1975 сен Дагъыстанни девлет педагожи институтни гьазирааъани шоIъбе хъаIдхъы, хъигьни сен институтни хурни сыныфбышис маъаIллимар гьазирааъани факультетехъа иккечIу.  1982 сен ман аали мактаб таамау, маъаIллимна ишлемишхьес ЦIаIхни мактабеехъа хъары. Гьамани сениле хъийгъа, аIра гьидёву, мана хурни сыныфбышда маъаIллимна ишлемишехьи. АIхреени сенбышее мана  гьамыр мактабна   завуч ворна.

ЦIаIхни мактабее ишлемишехьени вахтал’ АIгьмадхан маъаIллиме дагъайдни сыныфбышин хаIдда выпускбы къайиккы. Манкъвее цIеддыйни йигъыке джаб джуна иш къулайква вуккекка гиргъыл. Ушахаршиквана миз’ манкъуке тIабалааъас ваIвхуна. Манкъуни методиквайн югун натийджабы гьагу. АцIаал’ ва тербие янашеда манкъвее ушахаршис гьувы. Ушахаршис «акьва» гьувы деш : дарсбы хъыIдядаххъанбы, шулыхбы гьаъан ушахар  манкъуни сыныфее вухьа деш. 90% манкъуни  сыныфын ушахар аIълада хъаIдаххъанбы вухьа. Анджах манкъвее мысаджаб ушахар кIяцIахалавъу деш, йиздайий–йигъна гьаы деш. Гыргыни ушахаршис барабарын ацIаал’ гьувы ва манбышди билигыс сикIына кьиймат гьувы.  Къийна манкъвее дарсбы гьувойн ушахар гьар джура чIакIни  къуллухбышил’ ишлемишоохьи вобунбы. Манбыше джони маъаIллимни ишис кьиймат гьооли ва сагъул-варул эйгьи.

АIгьмадхан маъаIллиме садджу югда дарсбыджад деш гьели, манкъвее гьаммаше алаакьабы ушахаршини деккяршиквайий едяаршиква гьуваджи, манбышис мислягьаIтбы гьели ушахаршини нишилхъайи фыкыр гьевлес.  Манкъвее вудже-вудж цIерра чечнайс гийхьи.  АIгьмадхан маъаIллиме гьаммаше кумаг, мислягьаIт тезеба хъабыйни джегьил’ маъаIллимаршис гьели. Джуни хылеква манкъвее мактабее дагъайдни сыныфбышин кабинет гьазираы. Махъа пособиябы, шикыл’бы, таблицабы гивадхын. Манкъун кабинет чечнайс гиххьес эхьи. 

А. КIамазовыхъаб хаIбна гьуIрмат районни хъаIдхъийни управлениее вобна. Манбыше мана медын мактаббы ёхламишаъас, нягьаIдый мааъад дагъайдни сыныфбышее дарсбы ыккекка, къихели. Джуни кьулайква маъаIллимар танышааъа ва манбышин методик къулай джус аляатIа. Джуна маъаIллимна дараджа ахтыхъааъасдимее, манкъвее маъаIллимын курсбы хьуленихье элейс илгъечIу.

Гьел’бедти, АIгьмадхан маъаIллимни ишис хивни джамаъаIтын, вуджее дарсбы гьувойни телябабыше, мактабни ишчерше, районни хъаIдхъийни управлениейн, ДР-ни хъаIдхъийни ва ыIлимни министерствайн ахтыйна кьиймат гьувы ва гьаIшдеб гьооли вобна.  

Мана, ДР-ни хъаIдхъийни ва ыIлимни министерствайн  « Халкьни таIгьсилна аIълачий» лышаныс, РСФСР-ни таIгьсил’ни министерствайн шарафни грамотайс лайикьра къадже. Манчиле гъайре манкъухъад хаIдда районни хъаIдхъийни управлениейн, мактабын гьувойн дипломбыйий грамотабы водунбы.  Манкъуни меега, эн хаIбна джус гьувына кьиймат, вудже къавуккыйн ушахар вобунбы. КьоIдкъатна мана шадехьена манке, агар манбышике камалыкван, билигыкван  инсанар хъигъебчIее.

Джуни телябе , гьаIшде Саратовни шагьарее ешемишехьени Артур ГьаIджиеве , маъаIллим юбилейква табрикаъанкъаI увгьойн :

«.. Югна маъаIллим шамык’ акар. Мана нимеега югба гёбхьанхьее, манчин мебынбышда ыIмрена  йаIхъ ачухааъа. АIгьмадхан  маъаIллим, зы вас аIрзуламишаъан сагъ-саламатна, шадна , хыллийна ыIмыр.  Гьасре йигъни шамын хаIдданан сенбына йыIкьале хъооIни архабышда йаIхъ ачухееъэджин..» .

«Нур» кIазетни, «Лачын» журнални  редакциебыше АIгьмадхан Уруджна дих 70 ешеехъа гьирхьылийква табрикаъа ва манкъус гьаIракатыквана  ыIмыр аIрзуламишааъа!