Ши журналистаршини йигъыква табрикавъу

Январни13-че  журналистаршин йигъ алгъавгьу ва мани йигъыл’ республикайни кIазетбышее, журналбышее ишлемишоохьени ишчершис хаIдда табрикбы хъады.

Манбы  джони йигъыква Дагъыстанни хаIрынкъве Сергей Меликове, Халкьни Иджласни садрее Заур Аскендерове, Правительствайни садрее АIбдулмуслим AIбдулмуслимове, ва сабара министерствабышди ва ташкилатбышди чIакIынбыше табрик гьавъу ва мукафатбы гьуво.

Дагъыстанни Правительствайни садрее АIбдулмуслим AIбдулму­слимове республикайни чапни ва информациейни Агентствайни ишчершиква горушее журналистарше вуккейкани ишис сагъулва увгьо ва манбышис угъурбы  арзуламишау.

Мани горушее манкъве республикайни СМИ къеджен ишбы гьалед югда ыхьайнимее гьиджоо тадбырбыйий къаджес ыккан, ва республикайни сурале къеджен ишбы джамаъатылхъа вахтал’ гьихьараъас ыкканва увгьо.

«Агентствайн «Дагъыстанни Республикайни СМИ инкишаф гьаъуйc» къабсырна гьоIкуматна программа быкыравий вааджибда вдон.  ишлемишувхьай водон. Мани програмайква асасан республикайни спутникни  канале РГВК «Дагестан»  4520 саъаIтна верлишбы къайиккы, манчике 1050 саъаIт дагъыстанни миллетбышди мизел’ ыхьа.   Радиойн верлишбышин сай  2 аазыр саъаIтыле гьеххада ыхьа, манчин 486 саъаIт миллетбышди мизел’ ыхьа. 2022-ъэсди сен издательствабыше 94 китаб чапау. Мани программайна сайиб макьсад йишин маданият, аIдатбы, гивъур-сугъоцийни гьаIкIее одIкуний ва манбы инсанаршилхъа гьихьараий водон. Шу къооджени ишике хаIдда кар асылда водон ва мана иш вушди гыргынкъве югба вуккейс вуккан», — манкъве увгьо.

АI. АIбдумуслимовни увгьойква аIхреени вахтал’ республикайни кIазетбышеt, журналбышее, телевидениее ва радиое республикайни суракке къеджени ишбышди гьаIкIее, миллетбышди аIдатбышди, маданиятни, йишди кьаIгьраманаршди гьаIкIее кIылда маIълуматбы гьелива увгьо ва мани карбышис хаIбба фыкыр гьевлес вуканва увгьо.

Гойне мани горушее сабара кIазетбышин, телевидениейн редакторар, журналистар юшонувхьа ва манбыше джо къооджени ишее гьиджоо дагъамийваллабыйи вод ашкар гьаъу.

Масалан, РГВК «Дагестан» канални хаIрынкъее Камила Гьамзатовае журналистаршин маъашбы кIылда, амма джо къооджена иш хаIбхъивхьа ва увгьо.

 «Ши вушин танкьыт кьабыляъан, няъас увгьое сабара карбышее шахъадыд тахсир водон ши манбы гардана алятIанбы, амма журналистарше къоoджена иш гейб хаIбхъивха ва дагъамувхьана. Манбышин маъаш кIылда ыхьейид, дагъамийваллабы хаIдда ыхьейид чалышмишоохьенбы къооджена иш югба гьааъас ва шахъад хаIдда югун материалбы эйхьи. Шахъад са хаиш водон, зы эйгьенче гьайняа гивъурийн гыргын редакторар разийба вухьес, журналистаршин маъаш хаIдхъаъас  кумаг гьеъэ»- К. Гьамзатовfе увгьо.

МанкъыIхъа кIыры гьувойле хъийгъа АI. АIбдулмуслимове Агентствайни хаIрынкъус Абдуразак Джамалутдиновыс тапширыгъ гьуво журналистаршин маъашбы хаIдхъаъасын тадбыр къаджеджинва, ва ман тадбырбы вахтал’ республикайни Правительствеехъа гьихьараъас ыкканва увгьо. Иджласыле хъийгъа, АIбдулмуслимове сабара журналистаршис мукафатбы ва Грамотабы гьуво.

Журналистаршини йигъыл’  «Нур» кIазетни редакциейс хаIдда табрикбы хъады. Масалан, Росгвардиейни хаIрынкъве Александр Орехове джуни дойиле Грамота ва пай къахувы, Россиейни Госдумайни депутате СултIан Хамзаеве телеграммайква табрик къахуво, Дагъыстанни миллетбышди сиясатни ва динни ишбышди министерствайни хаIрынкъве Энрик Муслимове, Хасавюртни шагьарни хаIрынкьве К. Карголиеве табрикаъан кагъызбы къахуво. Манбышле савагьийда шас  йишин кIазет хъаIдаххъанбышикед хаIдда табрикбы ыхьа. МанбышикIле ши сагъулва эйгьи ва  ши чалышмишувхьесынбы  джо къеджени ишбышди гьаIкIее уфтанын материалбы окIанас.