Дагъыстанни ХааIрынкъулхъа Сергей Меликовылхъа республикайни шагьарбышенче ва хиваршеенче хъадыйни суалбышин хаIддананбы ишыгъбышди, йаIхъбышди, илегъани хьянбышди, инвалидаршди ва сабара медни дагъамийвал’бышди гьаIкIей ыхьа.
Гьелбедти гыргыни хъадыйни саулбышис джаваб хъелес мумкум вухьа деш, амма манбы гойне топламышау назерейхъа алятIасва джуваб гьувойн.
Мани ачухни гафеехъа гьувойни суалбышин сабарабы шасыд ааидда водунбы, няъас увгьое йишди хиваршее хаIдда дагъамийваллабы водонбы.
Масалан, сувал’ни хиварешее, Бабаюртни кутанбышее ишыгъена, хьинена, йаIхъбышда дагъамийвалла вобна. Манчини ва медни шас ыкканни карбышди гьаIкIедын суалбы гьувайбыхьий, писда ихьес дешди.
Сабара йишди миллетни дагъамийвалабышди гьаIкIее Сергей Меликовулхъа оIтиргьауйн суалбы шас ашкархьайнбы. Манбы миллетихъа джан гедхьанни инсанарше гьуво.
Ман суалбы шахъар республикайни парламенте депутат дехьй, сабара республикабышди министерствабыше ва ташкилатбышее йишин инсанар девхьай, Сергей Меликов Бабаюртни кутанбышейхъа арыйнкъаI вуджее гьувойн тапшырыгъбы быкыр гьидяуй, сувал’ ва Бабаюрдни кутанбышее газын, ишыгъен, йаIхъбышин, хьинен дагъабийваллабы ыхьайни гьаIкIей ыхьа. Сабара суалбы Динденче йаIхъ ашмишавуйнй, Кусурхъа йахъ цIыцIавуйни, Мишлешни хивее ишыгъен подстанция, больница гихьыйни, йишди дамабышил’ мини-ГЭС аляуйни, хиварше туризм инкишаф гьайни гьаIкIее ыхьа.
Сабара районбышенче гьувойн суалбы шасыд ааидда ыхьа.
Масалан, ЦIунтIайни районенче Сергей Меликовылхъа ишигъбышин диракбы тезелемишаъас ыкканва мураджият гьаъу. Мана дагъамийвалла йишди хиваршеейиб вобна. Диракбы оIтмишхьайни асырни 70-ъэсди сенбышее гихьыйнбы водунбы. Манбы ЦIунтIайни районе джад деш, гыргыни сувал’ни районбышее бадалаъас ыкканва, манкъвее увгьо.
«Республикайл 100% ишыгъен диракбыйисее хъыхьа водунбы. Сувални хиваршени инсанаршда мана геейбна дагъамийвалла вобна, няъас увгьуе манбышихъаб хайбы адкваъас, ишыгъеле савагьийба, мебна чара дешда»,- республикайни ХааIрынкъве увгьо. Манкъвее «Россети» компаниейни чIакIынбышилхъа сувал’ни районбышее ишыгъен диракбы бадалаъасда мумкум тIабалеъэва тапширмишау.
Меликовылхъа гьувойни суалбышди санчини гьаIкIейид зас эгьес ыккан. Ман Украинее аIл’гьаани СВО гьабтIуйни эскераршис аидда водон. Манкъуни увгьойква, мааъаб гьабтIуйни эскераршин до ши гьуваджес ыккан ва манбы йикIеливхан гьааъас вуккан деш. Манбы гыргынбы йишин къаIгьраманар вобонбы. Йишди хиваршейиб маIхуIбын къаIгьраманар вобонбы ва шинаб манбы йикIеливханааъас вуккан деш ва манбышин добы мактаббышис, кучебышис, медни ташкилатбышис гьелес ыккан.
Умуд вобна, Дагъыстанни ХааIрынкъулхъа гьувойн суалбы джулхъа гьихьарасынбы ва йиджбы гьалаъасын тадбирбы къаджесынбы!
