Украинайл’ спецоперацие гидгъылыйн сен быкырехьи. Россиейн ман къоншу гьоIкумат водун. Мааъаб хаIбба урусни мизел’ йишонааъан инсанар ешемишоохьи. Амма Совет гьоIкумат дагъылмишхьайле хъийгъа, мани гьоIкуматын сент Авропайлхъа садкIыл. Чикасана фашистаршин, нацистаршин сиясат еймишехьи гидгъыл.
Сен-сениле Россиейкван аIрабы пис’хъехьи гидгъыл. Манчисда «шишиб» Америкайний сабара Авропайни оIлкабыше гьавъу. 2014 сен Украине гьоIкуматын чапхын ыхьайле хъийгъа, вазият лап пис’хъувхьа. Крымыл’ ва Донбасс ешемишоохьени инсанарше чапхын кьабылёд гьидяува, манбы басхынааъа гибгъыл. Маайиб ешемишоохьен хаIббанан инсанар урусар вобунбы.
Россия маджбырба вухьа джон дёлесин инсанар къорамишааъас. Манчихъа гора, шаца, феврале, Россиейни Президентни Владимир Путинни амурыква спецоперацие гидгъыл. Украинеехъа йишин эскерар эбчIу. Манбышис кумагаъас контрактыква эскерна къуллух гьааъан росгвардейцар эбчIу. Украинее быкырын мобилизацие гидгъыл. Хаариджий Авропайни ва Къузайни Америкайни оIлкабыше Украинеехъа ярах, наемникар оIтирааъа гибгъыл. Мани багьнайка, манбышда мураад Россия дагъылмишауй вобна. Манчинимеега ярахыле, инструктораршиле ва наёмникаршиле гъайре, экономик санкциебы Россияйс эксинадын кьабыляъу. Анджах Россияйн экономика, дагъамийвалла вухьейиб, илёзарас аIхийн. Агар шас гъамувхьес вукканхьее, фронт джад деш, тылыд маIгькамын ихьес ыккан.
Шаца цывлихъа, эскераршис кумаг гьелесдимее, спецоперациее иштыракаъас 300 аазыр джегьил’ адамер Россиейл’ мобилизовать гьавъу. ГьаIшде манбышин сабарабы гьийдни фронте вобунбы, сабарабы тылыл’ полигонбышее гьазироохьи вобунбы.
Къийна мани спецоперациее хаIббанани дагъыстанлыбише иштыракаъа водун. Манбы усулывхьайнбы джона игитийвалла гьаагвас. МаIгьабна хизан яраб вухьее, джона дёлесна, гогьар мааъар дешда. Гьел’бедти, Рутул районеенче спецоперациее иштыракаъан хаIбба джегьилер вобунбы. Манбышди аIрее Ватаныс джан гьувойнбыб вобунбы.
Рутулни, Бабаюртни, Къызларни районбышеенче, Россиейни шагьарбышеенче хаIбба цIаIхбышин джегьилер спецоперациее иштыракаъас гьабкIын. Манбыше джона игитийвалла джони гьунарбышиква ва гьаIракатбышиква гьаагва. Манбышин хаIббананбы гьоIкуматни медалбышис ва орденбышис лайикьавъу.
Гьел’бедти, фронтеени эскерыс тылыл’ни инсанарше кумаг, хыл’ авхъас вуккан, няъас увгьее манбыше йишин диндж, йишди ушахаршин геледжагъ къорамишаъа . Эн хаIдын кумагыд эскерылхъан ыIгьтибар, иням ва муIгьуб водун.
Мани гьаIракатбышин сайид «Эскерылхъан кагъыз» акция водун. Къийна Россиени мактаббышее хъаIдаххъани ушахарше фронтеехъа эскераршилхъа миннатдарийвалла агъмишаъан кагъызбы ойкIан ва басиркIабы оIтираъа.
Дагъыстанын мани акциейна эстафета цIеббаджаб алебтIу. ЦIаIхбышди мактаббышин ушахарыб мани джаргее вобунбы. ЦIаIхни, Мишлешни, Муслагъни, ДжинаIгъни, Гыл’мецIни, Миххьейни, Лекни, Хьойикни, Теземуслагъни, Калел’ни , Камбулатни мактаббышди шигыртарше фронтеехъа эскераршис басиркIабы саъы. Манчеехъа ширинныгъ, турсбы. къурун чуры, хьахьалийбы, къел’-хыл’ темизяъасын салфеткIабы, къуIман гурт-вахчегбы, дошлугъбы, шарфбы, папахбы, дарманбы ва медын эскерыс лазымехьен карбы оIтирау. Чикасана эскераршилхъа кагъызбы одкIун. Ман гыргын басиркIабы саджигеехъа саъы, машинбышиква йишди эскераршис Украинеехъа оIтирау. Ман басиркIабыд, кагъызбы джигайлхъа гьидхьырийнбы. Манчини гьаIкIеена хабар видеороликбышиква фронтеенче эскерараше гьувы. Манбыше ушахаршис, джони едяршисый деккяршис, маъаIллимаршис миннатдарийвалла агъмишавъу ва сагъул- варул увгьо. Сагъба-саламатба, гъамувхьа хъавалесынбыва, джуваб гьуво, Гьайни дёлесийвалее эскерарше ЦIаIхни йыIкьнекни мактабни 7 сыныфни шигыртни АIлиев Русланни ва 4 сыныфни ушахни ГьуIсейнова Сабинайни кагъызбышис видеоджаваб хъувы ва оIтирауйни басиркIабышис ахтына кьиймат гьувы.
ГьаIмагьдын джад видеоджаваббы Теземуслагъни мактабни ушахаршис вазна гьихъа хъувы. Манчин шакIле эйгьен, басиркIабы гьийхьаранбы ва одкIунийн кагъызбы эскерарше хъаIдаххъа водунбы. Гьам эскераршис югда, гьам ушахаршин кайиф кокехьи. Мана вааджибна иш вобна.
Декабрьни вуза « Нур» кIазетни редакциейн «Эскерылхъан кагъыз» конкурс эъланау. Манчин екунбы февральни аIхрее гьелес. Манчин югун, марахыкван кагъызбы , йишди фырее водунбы , эскераршилхъа оIтирауй. Конкурсе гъамувхьайни шигыртаршис пайбы, грамотабы гьелес. Гьалекийс редакциехъа кьоIдле – хьебыдле маIгьдын кагъыз ушахаршике хъады водун.
Ушахар, маъаIллимар шос хааишаъа, мани ишее гьаIракатыкван иштыракбы гьеъэ!
