. Къийна ши СВО иштырак гьаъани йишди эл’ни эскераршике хабар гьооли, манбышди игитийвалике ойкlан. Манчиле савагьийда, мобилизациейхъа гябкlыйни джаванаршини хизанбышейхъа гьавайкlан, аилебышее горушбы алгъайгьи, манбышди вазиятыка делесвалейнче танышоохьи.
Гьини элес йишда мухбир мобилизациейхъа гирхьуйни Цlаlхыйни хивейнчена Сакит Камазовни хизаныка хъызаххы. Манкъуна дек’ Гьаlджиэфендий чоджее, ед’ Ханым баджее гадейкен хъидгlынбы гьаъанкъаl дурустна гаф гьавъу.
— Гаде СВО иштыракаъан хил’дже вахт вобна. Мана йишди хивни гадебышика саджигее ворна. Манбыше гьадкьурийн, харабхьайн техника хъаъа водун. Саките экlда-экlда зенгбы гьаъанбы. Манкъуни увгьойка, вазият писба дешобна. Одхьунийкейий, аляъани палтарыкена кеситийвалла дешда. Гьар йигъыс къуlман одхьуний вахтале вахт-вахталхъа гьелен. Манкъухъаб гьалекийс зигаара дешда. Ханым баджийни ихтилетыс кьувва гьооленкъаl, Гьаlджиэфендий чоджей увгьойн, къийна джос гьар суракен кумаг водун. Гьокуlматын кlеливханааъа деш. Йишда вазият ваацlавхьес абыйнбыб вухьайнбы. Манчиле гъайре, гьокуlматын манкъус гьар вуза гьелен кумагыд чини вахтал’ гьихьараъан. Гыргыба сагъба гьааъанбы. Йишди хизанын ненкеджад манбы гозетяъа деш. Шас сагъра-саламтра вудж хаахъа хъарый ыккан. Джукасана горушмишувхьай вуккан. Гьар йигъыс куб гьааъанкъаl, ши СВО таамхьеджинва Оорункъуке дилегбы гьеххъа. Гыргыба мааъаб вобун джаванар джони деккяршисахъайий едяршисахъа сагъба -саламтба хъабы вуккан. Йишди цlаlхбышди миллетыхъаб мааъаб хаlбба джаван гадебы вобунбы. Гыргыба манбы хайбышейхъа зарар дена савкlаланбы.
Сакит Луганскни республике къуллух гьааъа. Манкъуни джомардийвалис, игитийвалис командирарше ахтына кьиймат гьооли. Мана Цlаlхыйни хивейнче джука саджигее хъобтlулни гадебишика ворна. Манбы са чуба хьинне вобунбы. Гьар вахтал’ сана-санкъус кумаг гьелес гьаlзирба вобунбы.
Са кьоlдле кал’ма джурайда Гьаlджиэфендий чоджийни гьаlкlее эгьес ыккан. Манкъуна дек’ Урудж дайий Хаlбни Ватанни даlвъыйна иштыракчий ыхьа. Мана хаlдда сенбына кlолхозее чалышмишхьа. Гьаlджэфендий чоджийир, деккини йаlххъын аркlын. Мана хаlдда сенбына едике ыхьайни хивее джурабаджура ишбышил’ ишлемишхьа. Манкъуни ыlмырена хаlббанана вахт шофирийвалайка багълыба. Манкъвее къийнийни Цlаlхыйни хивни гьаlкlее гаф гьааъанкъаl, увгьойн: «Цlаlхый гьихъа хаlбна хив вухьа. Къийна мана йицlни элеес кlыл’ хъувхьа. Джаванарше иш девхьайхъа гора, гьин джигабы тарг гьау. Гьаlшде Цlаlхыйни хивын таарых гьуваджесдимее, водун югун аlдатбы гьуваджесдимее, абыйн мигьманар къаршиламишааъасдимее хив къалебчес вуккан деш. Хивее авхуйнбыше ата-бабабышда юрд гьуваджесдимее джоке ахаlн гьаъан. Къийна хивее ешайишисын гьарджура имканбы водунбы. Малкъара гьуваджесынкъус, тасарруфат ыккейс ахаlнкъус камын гьиччудджад дешин. Шокlле къеджен, къийнийни Цlаlхыйни хивни джамаъаlтыхъад югун имканбы вод, раlгьатийвалла воб. Гьаlшде инсанаршихъад сибыкын ешайиш ыккейсдимее хайбышее гьар джура имканбы водунбы. Амма иш девхьайхъа гора, джаванар аахва деш. Къийнийна хивна дагъамийвалла эле гьамана вобна. Шагьарбышее дагъамба ешемишоохьенбы, юрдылхъа сабкlылний йишди ихтелетчее дилегбы гьеххъы. Хивеехъа сабкlылыйнбышис вуджее ахаlн кумаг гьелесынва Гьаlджиэфендий чоджее джуваб гьуво.
Гаф гьаъа летти, манкъве Сакит гьинчиле сабара сенбына гьихъа растына хъарыйни дагъамийваликеб юшенау. Манкъве увгьойн:
«Йизда гаде эскерейнче хъарыйле хъийгъа кьоlдле сенна контракт окlанас ийкыр. Амма мана делес хъау деш. Манчихъа ил’дяакы, мобилизация гидгъылмее, манкъус повестка цlедда хъады. Мана гьаlкlена адамий хьинне, Ватаныс бордж хъелес аркlын. Мани карбышее йишди регьберарше назарат хаlдхъаъас ыккан».
Ханым баджийни увгьойка, джо хивее ешемишоохьен йихьцlалиле агъаллан сенбы водунбы. Мани сенбышее йигlыйре ушах чlакlы хъавъу, манбы эвле-атта гьавъу. Даватбы гьаъасда садджу Сакит ворна аху. Иншаллагь, манар эскерейнче хъарымее, манкъусыд даватбы гьаъасынбы. Ушахаршиле манбы нимеехье разийба вобунбыва агъмишау. Манбы гьар сен хизанбышика истирагьатыс абайленбы. Къыlл’ адкlын невабыше джо гъара гьаъанбы.
Заквана гаф манбыше гьинаlгьаlдни кал’мабышиква быкыравъу. Манбыше увгьойн: «Хивейдын ешайиш джос кьабыл’да водун. Джо хаlббанани джигабышее вухьа, амма хивее хьинне няаджаб динджиба вухьа деш. Нена наlъар ворхьей сагъба саламатба вухьенбы. Йишдимее юрд аlзизба вобна».
Зынад йизди сурале манбышис югна хошна, хылийна ыlмыр аlрзавъу. Гаде эскерейнче хъарыйнкъа, зы меер айресдава джуваб гьуво. Саламаттамишхьа, йаlххъылхъа хъигъечlу.
