Ватанни гьийдын бордж

Украинайл’ СВО гидгъылыйн сен быкырхьа. Мааъаб хил-дже цlаlхни миллетын игитериб вурушмишоохьи вобунбы. Манбышди аlрайл’ махъа мобилизациейка хъобтlулыйнбыб вобунбы. Къийна йишди элике моблизациейхъа гябкlыйни джаванаршини аlрайл’ сайир Гыл’мецlни хивейнчена Дадашев Казбек Абдураlгьимна дих ворна.

Казбекилхъа эскерейхъа хъойтlалан кагъыз хъадымее, мана воекомотейхъа гьаркlын.  Мана гьамбазаршика саджигее сабара гагьна Каспийскни флотилиейл’ гьаlзирийвалла илгъевчlуйле хъийгъа, СВО-хъа аляртlу.

Казбек 1981-ъэсди сен Гыл’мецlни хивее едике ыхьа. Манкъве едике ыхьайни хивее югни кьийматбышиква йыlкьнекин мактаб быкырау, эскерийвалейхъа  аркlын. Манкъве джун Ватанни гьийдын  кьоlдле сеннан бордж Амурни вилаетил’  хъуво. Эскерейнче хъарыйле хъийгъа, манкъве санаъаlтбы Дагъыстанни маъаlллимар гьаlзирааъани педагъожи университетейхъа хъуво.Мана психологиейн санаъаlткарар гьаlзираъани факультетейхъа иккечlу. Казбекее хъаlдаххъа летти, гьамыр  мааъар ишлемишхьана.

Россиейл’ мобилизацие 2022-ъэсди сенни сентябрьни вуза гидгъыл. Повестка хъадыйнкъаl мана ишил’ ыхьа. Гьаманиджар йигъыл’ мана военкоматейхъа гьаркlын. Вудж эскерейхъа ал’гьааlс гьазирра ворнава увгьо.  Дёлесинбышди увгьойка, манкъуква саламаттамышувхьес джаб гьибхьыр деш. Хъийгьни йигъыл’ мана джуни гьамбазаршика саджигее эскераршини джаргее илерзыл’ ыхьа. Каспийскни шагьарее сабара гагьна гьаlзирийвалла вуккуйле хъийгъа, мана Ватан миллетчершике темизяъасва аркlын.

Гьаlшде Казбек Запорожьейни вилаетил’ ворна.  Манкъве Россиейни эскераршика саджиге шагьарбы, районбы, хивар азаад гьаъа.  Манкъуни гьаlракатыс, джомардийвалис частни чlакlынбыше ахтына кьиймат гивийхьи.  Манбы Казбекни дирибашийвалиле нимеехьей разийба вобунбы.

Казбек эскерийвалее ыхьейир, манкъуна хизан гьокуlматын кlеливханаъа деш.  Магьаlчкъала шагьарни Ленинни районни администрациейн  ишчер манкъуни хизаныква экlба-экlба горушмишоохьенбы.   Манбышис кумагбы гьеленбы.  Манчиле гъайре шагьарни джурабажурани ташкилатбышейнчед манбышилхъа зенгбы хъадайленбы. Гыргынбыше манбышис кумагбы теклиф гьаъа.

Казбекыс повестка Рутул районейнче хъады. Амма мана шагьарее ыхьайхъа гора, гьинче аркlын. Манчихъа гора,  хивейхъа деккисахъайий едисахъаб районни администрациейче абайленбы воохьенбы. Манбы ешайишике марахламишоохьи, эскерикен хъидгlынбы гьаъа.

Манкъуни деккини, йишда доюкана шааир Аlбдураlгьим Дадашевни увгьойка, гьокуlматын  джос гьагвани къайгъуйква  нимеехьее разийра ворна. Манбыше гьар вахтал’ Казбекын хъидгlынбы гьаъанбы. Шинаб кlеливханааъа деш.  Маныд йишдимее хаlбна иш вобна. Няъас увгьое,  шакlле къеджен гьокуlматыс йишин игитер кlелибхын дешоб.

Эскерни гьаlкlее гаф гьаъанкъаl манкъве увгьойн: «Казбекее вахт вухьайнкъаl зенгбы гьаъанбы. Гьалзугар йишонааъана. Манкъуни увгьойка, къийна джухъаб нишикенаджаб кеситийвалла дешда.   Манчиныд йишин йикl сыкыlлда джигайлхъа хъаляаъан. Манчихъа ил’дяакы, йишди джанее сакитийвалла дешда. Хаlм-йигъна ши манкъуна фыкыр цlыцlааъана. СВО экlда таамхьа, хаахъа саркlылий йишда мурад вобна».

Къийна Казбек Запорожьее текра дешда.  Манкъуква саджигее мебын йишди элин мобилизациейхъа гябкlыйн джаванарыб вобунбы.  Манбы экlба-экlба растына хъавайленбы, саджигейхъа савайленбы. 

Къийна Казбек хьинне, мааъаб хаlбба йишин джаванар вобунбы. Манбы шаке акьаlнаба вухьейиб, ши манбы кlеливханааъа деш. Манбыше йишин диндж гьуваджыйхъа гора, гьар вахтал’ югун дилягбы гьеххъа. Манбы сагъба-саламатба хизанбышиква, делесынбышиква, гьамбазаршиква горушмишувхьес  аlрзаъа.

Гыргыба эскерар, мобилизациейхъа гябкlыйн джаванар «Нур» кlазетни редакциейн 23-ъэсди февралыква табрик гьааъа. Манбышис джанана сагъвалла аlрзааъа.