Дюззида са сенна гьихъа, февральни 24-чил, Россиейн Украинайл’ СВО гидгъыл’.
ОIлкайни таарыхе хаIдда йыIкьын гьаадисабы ыхьа. Гьелбетте, манчини аIрее йыIкьнекна джига ХаIбни Ватанни даIвъийн авхъаахъа. Манчиле хъийгъа хил’дже вахт абкIынеейиб, дюнйейл’ саакитийвалла дешда.
Совет гьуIкумат дагъылмишхьайле хъийгъа, дюнйейни ийессийн борджбы, шавукеджад хъидгIындяу, Америкайн гарданахъа алятIу. Мани оIлкайни къулдурни сиясатын дюнйейл’ни джурбаджурни континентбышее ешемишоохьени халкьбышилхъа баляабы адляу.
США гьаракатбы гыргынанкъаI илгъечIенбы. Агар джони ишбышиква раз’дёохьенбы вобхьее, манбы хъаIвакьанааъа гивийгъал. Украинайлиб Америкайна тIубдевхьанахьий, ненкеджаб кьоIни делесни халкьбыше сана-санкъукана даIвъий гьааъас дешдий.
23 февраль Россиейл’ Ватан къорамишааъанбышин йигъ водун. Гьайни сен аазырбышиквани игитни духйебышис ман адамершин байрам Украинайл’ СВО аIлгьаани джигабышее хыле ярахыква алгъагьас кьисматхьа. Манбышди арее йишди миллетын игитерыб кIыл’ба дешобунбы.
Гьайни йигъбышее кьоIни элейс СВО зонайл’ ыхьайни Муминов Бахтияр Сайдумни духайква хъызаххы. Б. Муминов 1993 сен Калел’ни хивее пешекарни хизанее едике ыхьа. Вахт хъабымее, Бахтияр хивни мактабни цIеддыйни сыныфехъа аркIын. Ушахнимее мана хаIбна шадвалла вухьа. Анджах манкъун едике ыхьайни хивеедын хъаIдхъый са сенна цIыцIахьа. Хизан Бабаюртхъа кочмишивхьа ва Бахтияре ацIаал’бы артмишаъа Калел’ни йыIкьнекни мактабе гиргъыл.
Тезе мактабе мана экIраджар къулайлхъа гирхьуна ва сабара вахтале югда хъаIддаххъани ушахаршина са ыхьа. Манкъус кьабылехьени предметбышди джаргее кьомана джига биологиейн авхъу. Манчилхъа джегьиле хаIбна фагьым гьооли гиргъыл. Биологиейлхъан маарах гьавагьийн деш ыхьа, няъас увгьее БахтиярыкIле джун геледжагъ дохтурни пешейква къеджи ыхьа.
2012 сен Б. Муминове Калелин йыIкьнекин мактаб югни кьийматбышиква таамау. Гьаманиджар сен мана Астарханни медицинайни колледжейхъа иккечIу. Маъадыд югни хъаIдхъыйква, темиз’ни гьаракатбышиква Бахтияре маъаIллимаршини, гьамбазаршини арайл’ хаIбна гьуIрмат къазанмишавъу. Манчини аллад, колледже хъаIдаххъанкъаIджар манкъус больнице фельдшерна ишлемишхьес ыIгьтибарау.
2016 сен Бахтияр Муминове чIаIрани дипломыква колледж быкрау. Манкъус Кировни доюл’ни Астарханни шагьарни хьебыдъэсди больнице ишлемишхьес теклифау. Са сенна мана мааъар фельдшерни къуллухыл’ чалышмишхьа.
Бахтиярни ыIмрен хъийгъыйн хьебыдле сен Тюменни вилаетни Сургутни шагьарыква багълыда ыхьа. Мааъар мана скорый помощил’ ишлемишхьа.
2020 сен Б. Муминове Чечен Республикеени частбышди санчее контракт одкIун, эскер-дохтурни къуллухыл’ ишлемишехьи гиргъыл.
2022 сенни февральни 24-чил, СВО гидгъылыйнкъаI, Бахтияр гьамбазаршиква Крымыл’ ученибышее ыхьа. Манчиле хъийгъа манбы Херсонни, гойне хьинне Запорожьейни вилаетбышехъа къахову. Мааъаб манкъве хьобле вазна вурушбышее яраламишивхьайни гьамбазаршис медкумаг гьуво. Манкъуни увгьойка, дохтураршилхъана хаIбна гудж СВО гидгъылыйни цIеддыйни йигъбышее хъабы. Манке яраламишивхьайнбы гееб хаIбба вухьа. Манчихъа ил’дяакы, ши йишда иш саламатба гьааъаний.
КьоIъэс Бахтияр СВО аIлгьаани зонэхъа 2022 сенни октябрыл’ къахову. Гьини элеес манкъве гьамбазаршиква Запорожьейни вилаетыл’ къуллух гьавъу. Гьайни йигъбышее мана сагъра-саламатра хаахъа саркIыл’.
Бахтияр Муминов кьоIни ушахна дек’ ворна. Манкъве ыIмырна ёлдаш Динарайка кьоIйре дих чIакIы хъааъа. Вагьабна йищ Динарее Астархан девлет университетын фармацефтикайн факультет таамау. ГьаIшде ушахаршини тербиейква машкьулра ворна. Кул’фатбы хаIбхъувхьамее, ниятее хаIдхъыйни саIнаъатни ишил’ ишлемишийхьай водун.
Бахтияре гьаммаше джус гьалалын къык охьанас йаIхъ гьаагуйни, эвле-атта гьавъуйни деккилхъа Магьмудна дих Сайдумылхъа, ед’ Карымна йищ Айшеханумылхъа алхышбы гьаъа, миннатдарийвалла агъмишааъа.
Геледжагъыл’ни пIланбышди гьаIкIее гаф гибхьыйнкъаI, Б. Муминове увгьойн: «Захъаб сайиб гьааъасда ишобна. Зас Петербургни шагьаре военный медицинский академиейхъа иккечIес теклифау. КъыIлина зы манчина башара къавджесда.
Горушни аIхрее Бахтияре йишди миллетин вугIулин кас Ватан къорамишааъанбышди йигъыква табрикау.
Шинаб мани адамершини байрамна барака гьааъа, Оорункъуке Украинаил’на даIвъий таамувхьай дилягбы гьеххъа.
