Миз’ миллетын диб водун

Февральни 21-чил’ дюнйейл’ едини мизяаршин Йигъ алгъайгьи. Инсан дюнйейлхъа арыйле хъийгъа, манкъус Аллагье едина миз’ едини никнека саджигее гьооли. Гьар инсанын бордж водун мана ыIмрени аIхреехъаме гьувааджий, юшенавъуй ва джуни ушахаршисхъа саламатба гьивхьаравъуй.

Миз’ дешин миллет эхьен дешки. Джуна миз’ кIеливханавъу, медни мизаршис хидмат гьааъана инсан миллетни сыранеенче хъигъечIуна  инсан ворна, мана едини улыхеенче хъигъечIуна инсан ворна. Гьел’бедти, хаIдда мизяар ацIахьай югун кар водун, анджах едина миз’ мани мизяаршини аIрее кьома вухьес вуккан. Ед’, Ватан, едина миз’ акарни маIънаакван джуваббы водунбы.

Дагъыстанее 30 агъаллан мизяар водунбы. Мани мизяаршини тIуче сайиб цIаIхна миз’ вобна. Сенис феврал’ни вуза йишди республике джурабаджур майданбышил’ едини мизяршис къадсырыйн конференциебы, маджлисбы ва медын йигъынджагъбы илгъчIи. Дагъыстан миллетын аIдатбы гозетяъан республика водун.  Гьар миллетыхъад джона миз’, джон маданият ыхьейид манбы са кокнан халкь водун.

Февральни 17- чил’ ДР-ни миллетни сиясатни ва динни ишбышди министерствайн  Едини мизяршис къадсырыйн иджлас алгъавгьу. Маъад аIлимарше, сиясатчерше, депутатарше, язычерше, шааирарше художникарше, журналистарше иштыракау. Маджлисеехъа сабыйнбы мизяршини байрамыква  минстре Энрик Муслимове табрикавъу. Гойне манкъве сабыйнбы министерствайн вуккеккани ишиква танышавъу ва миллетбышин сана-санкъукван алаакьабы маIгькамаъасдимее  гьиджо ишбыйий къадже юшенау.  Министрни увгьойка, аIхреени сенбышее ДДУ-ни един мизяар гьуваджени Марказыква саджигее дагъыстанни мизяршилин джурабаджур китаббы къайиккы. Манчини аIрее ушахаршисын, мизени , адабиятни, маданиятни, фольклорни гьаIкIеедын китаббы водунбы.

Манкъуни чыхышиле хъийгъа, чапыке къайиккыйни китаббышин презентацие илгъечIу. Китаббы одкIунийнбы юшенавъу. Мани китаббышди аIрее цIаIхни мизеква алаакьан китаббыд ыхьайнбы.

Февральни 20-чил’ Дагъыстанни  хъаIдхъий артымишаъани институте   11  сыныфни телябабышди аIрее  республикайн конкурс  «  Лучший чтец произведений  дагестанских  авторов на родных языках»  конкурс илгъечIу.  Манчина метлеб джегьилершин гьавас едини мизяаршилхъа ва адабиятбышилхъа  артымишауй вухьа.  Мани конкурсе цIаIхбышди джегьилершед джон гьаIракатбы гьагу. Гьайни сен мани адабиятни маджлисее Теземуслагъни мактабни шигыртарше: Наврузова Майрам Сафарни йище, Баширов Башир Сейфуллагьни духе  ва МаIгьачкъалайни 1 мактабни 11 сыныфни ичее Новрузова Айна Семедни  йище  иштыракбы гьаы. Джегьилерше джон аIшкь йишди адабиятылхъан ва едини мизелхъан гьагу. Манбыше йикIеке друстда цIаIхбышди шааираршин – Дабуз Шавкатна шечI «Дюнйе», Кьурбан Омахановна шечI «Ватан», Ширингул’ Рамазановайна шечI «Йишин игит’ балабы»  — хъаIдхъы.  Ман конкурс онлайн- формате илгъечIу.

Гьар сен маIгьадни конкурсбышее Калел’нийий Теземуслагъни йыIкьнекни мактаббышди шигыртарше иштыракбы гьаъа ва ахтыйн джигабы аххъаххъа. Маныд мани мактаббышди директораршин ва маъаIллимаршин гьаIракат ва гьунар водун.

Анджах Рутул районеени не цIаIхбышди, не рутулбышди мактаббышди шигыртарше иштыракбы гьаъанбы дешки. Мани сардан манбы эн далыйл’ни джаргее вобунбы. ОIгийл’ багьна вобний – МаIгьачкъалайке аIкьана ешемишухьай. Бес гьаIшде нена багьнане вухьа ???.  Гыргыни мактаббышее интернет водун. Гьел’бедти, ман  хаIдын саIгьф водун районни хъаIдхъийни управлениейн.

Гыргынбы едини мизяаршини Йигъыква табрикааъа. АцIахье, едина миз’ ши гьидваадже, миллет батмишхьесын. Юрд , ватан шахъаб вухьес деш. Манке, миллетын до гьихъа гьувы, къуллучера, депутатар вухьес деш не сечмишааъасыб деш. Ман джуваббы къийна шавукIле джад къайиххьес ыккан деш….