ХъаIдхъийни ва ыIлимни министрыкван горуш

Мартни 15-чил’  РИА «Дагъыстанни» пресс-конференциебы илгъечIени майдама Дагъыстан Республикайни хъаIдхъийни ва ыIлимни министрыкван ЙаIъе Бучаевыква  республикайни СМИ-бышди журналистаршин горуш илгъечIу.

Мана маджлис  РИА «Дагъыстанни» директоре  М. МагьаIммадове вукку.

Манкъвее  абыйн къуллухчера ва журналистар саламыква къаршламишавъуйле хъийгъа, джуваб  Й. Бучаевыс гьуво:

«  Шацыйн сен ши хаIдда ишбы ыккы. Манчина  аIсас метлеб вухьана — республикайн  хъаIдхъий гьаIракатеехъа адчий ва югни сентелхъа ман гявгьуй.  ЦIебба ши гибгъылыйнбы маъаIллимар аттестовать гьавъуйле, йаIъни манбышин ацIаал’, билиг ва педагожи къулай, вардешбы  ашкарауйле.

Ман ишбы ыккесдимее,  ши гыргыни муниципалитетбышиква мислягьаIтбы къадже. Мани ишее шас хыл’ республикайни хааIрункъвее Сергей Меликове  авхъу. Ман проект  ши 100 % быкырауйн.

2022 сен республике 191 мактаб  тезелемишау.  АлетIуйн ишбы аIхреехъа гьихьараъасдимее , хъаIдхъийни сфере ишлемишоохьени инсанарше чIакIын заIгьматбы гьаы. Манбышди гыргынкъукIле сагъулва эйгьи.

Ушахаршин хъаIдхъий ва маъаIллимаршина иш вахарий хъааъасдиме,  цифровой сервисбышиквана  хъаIдхъийна тезе платформа кьабылявъу. Манчин ушахаршис няаъад хъаIдаххъа ыхьейид, няаъар ешемишехьи ыхьейир, джун ацIаал’ артымишаъасын имканбы гьели водунбы, — министре увгьо.

Министрыквани горушее  полиомиелит чIырваликва багълыданан  суалбы къалхымишау. АIхреени вахтал’ соцсет’бышее манчини гьаIкIее джураба- джур нягьаIкьын хабарбы къийхьи.  Сабара ушахаршис манчикен вейбар ыIхыйнбы, сабара ушахаршини деккяаршейий едяарше манбы ыIхас гьайсар деш.  Вейбар ыIхийн ушахар  шенсанбышикве джурааъанбы. Ушахар, джон деккяар, едяар чешмишивхьа авху вобунбы. Шавухъамы кIыры гьелес ацIа деш.

Министре мани сардан вуккеккани ишни гьаIкIеена гаф гьавъу. Манкъуни увгьойка,  минздравни, хъаIдхъийни ва ыIлимни министерствайн, журналистарше   джамаъаIтыквана иш вуккейс вуккан. Манбышис хъобкуна хабар гьевлес вуккан ва  вааджибыйвалла ашкарааъас вуккан.

Гойне журналистарше едини мизяршиква, китаббышиква багълыданан суалбы къалхымишау. Министре суалбышис джаваббы хъеленкъаI увгьойн:  « Един мизяар гьуваджий  ва манбы артымишаъасын имканбы гьувой , мактаббыше  дарсбы пIланыква ыккый,  министерствайн вуккеккани ишина са иш вобна. Мана иш джигабышил’ – мактаббышее  маIгькамааъас вуккан, гойнеб хизанбышее.  Дагъамийвал’бы водунбы, анджах манбы гьаIллаъас эхьен  дагъамийвал’бы водунбы. Мани сардан  министерствайн республике тезе ГОСТ – бышиква уйгъунын программабы, проектбы  одкIун, тезе китаббы ойкIан ва чапыке къекка водунбы. Гьайни сеныд фыкрее водун едини мизяаршин ва адабиятни хъаIдхъийн  китаббы  мактаббышис алищуй. Манчиле оона иш вуккекка вобна. ..»

Й. Бучаеве медни суалбышисын джаваббыд хъувойнбы.  Сенни аIхрее иляакасынбы, манкъвее  джун джуваб аIхреехъаме  гьуваджие.

Гьайин 2023 сен наIсигьатчийний   маъаIллимын  сен водун.  Манбышди гыргынкъус ши джанана сагъвалла ва ишее югун гьаIракатбы аIрзуламишаъа