Ши  вахт-вахтале манбышди гьаIкIее маълумат гьелен ва манбы кIеливханааъа деш. Гьайни йыгъбышее йишди хиваршейхъа сабара  эскерар отпускIабышис хъабы ва джони хизанбышиква, делесынбышиква горушмишувхьа. Манбышди аIре  Османов Кьурбан МагьаIммадна дихыр ворна.

Кьурбан Рутул районни Лекни хивее едике ыхьа, гойне Азербайджанни Агъезийни хивее ешемишхьа. Ахрейни сенбышей кочмишхьа хъарна Хушетхъа ва къийна манкъуна хизан маа ешемишоохьи вобна.

Мобилизация гидгъылмее Кьурбан повескайква эскреехъа хъортIул  спецоперациехъа танкистхьинне иштыракаъас аркIын. КьоIдле уIлджумна Чечнее гьазирыйвалла къавджейле хьийгъа, манкъвее Донецкни республикайл’ аIлгьааIни вурушбышей иштиракгьаъу, гойне сабара вахтыле  Запорожьейхъа хъары.

Хьобле ваз вухьайле хъийгъа  Кьурбан са 10 йыгъыс хаахъа отпускайс къайиккы ва хизаныква, делесынбышиква  горушмишхьа. 

Зы манкъус хошгелдийс гьаркIынийнкъаI, мааъар Агъйезенче арна джуна ед’ Назпери баджийыр къайджена.

Манбы Агъйезее йишин къоншубы вухьа, ва геейб муIгьуббатыква ши сана-санкъуква вухьа. Агъезийни хивейхъа хъабыйнкъаI, Къурбан, джуна чодж Загьид ва хьебыйре йичибы хуруба вухьа.

Манбыишда дек’ МагьаIммад джаванра джар рагьмаIтыххъа аркIын ва манбы джони едее Назпери баджее чакIыхъавъу. Къоншибыше, гогьарбыше вахт-вахтал’ мани хизаныс кумагбы гьели ыхьа. Къийна манбsшди  гыргынкъухъад джон аилебы водонбы.

Къурбан кочмишхьа Дагъыстанейхъа хъары ва Хушет ишлемишехьи гиргъыл’. Къийна мана джуни елдашиква Малинайка ва кьооIни ушагъыква кираныс хав аххъы ешемишоохьи вобонбы.

Кьурбынквани гафее сакар ашкархьа: вудж эскерейхъа аркIыныйле хъийгъа, джуни хизаныс кумаг саджу МагьаIчкъалайни хааIрынкъуни сурале ыхьа, амма вудж мобилизациейхъа хъортIулни Рутул районни сураке не арына ыхьа деш не кумаг гьелена ыхьа деш.

Манкъуни увгьойква, вудж эскрейхъа ал’гьаанкъаI, джука ишлемиш воохьени достарше ва мебел’ гьаъани цехни хаIрункъе Радик кумаг гьуво, сайид хивни маъаIллимарше пылыква кумаг гьуво.

Экерийвал’ни гьаIкIее манкъве зас кIылда маълумат гьуво, амма джуни увгьойква джон отхьунийыд, авхан джигад геейд югда водун.

«Къийна ши мубариза украинайни миллетыква деш вуккейка вобна, манбышихъад тахсир дешин,  ши манбышди америкайс джон миллет, гьуIкумат масса гьувойни марионеткабышиква, ва гыргыни Россиейс душманба хъигъебчIуйни гьуIкматбышиква вурушмишоохьи

 вобонбы. Нимеега дагъамда ихьейид, ши манбышиле гъамебхьесынбы ва хаахъа къамебхьа хъавалес»,- Кьурбан Османове закани гафе увгьо.

 Кьурбан хьинен кьаIгьраман игитеер йишди милетыхъаб гееб вобонбы, манбыше къийна Украинее душманаршиква вуккейкани мубаризее иштирак гьаъа водон. Мобилизациейква ва джони хааишыква  махъа 20 хааIрра  йишди миллетна джаван аркIын ворна. Манбышиле савагьийба, 150 меегана контракт одкIун абкIынийнбыб вобонбы.

Умуд гьааъана, манбы гыргыба душманыле гъамеебхьа сагъба, саламатба хаахъа хъавалесынбы.

Йишди кIазетын гьайин номра хъыIгъаани йыгъыл’ Кьурбан отпускайна вахт быкырувхьа мер Украинейхъа аркIын. Манкъус угъурбы аIрзуламышаъа ва сагъра - саламатра хаfхъа сакIалас кьисматхьен. Амин!