АIхреени вахтал’ редакциехъа йишди кIазет’ хъаIдаххъанбышике шикаятбы хъадайли. Ши борджлыба вобунбы манбышин шикаятбы ашкараъас, манбышин дагъамийвал’бы гьагвас ва джигайлхъа гьихьараъас. ШакIле манбыше эйгьен: « Шу гьаммаше садджу кIазетее югун хабарбы вод ойкIан ва гьаммаше къуллухчера воб оIгунмишааъа. Анджах иш терсинаба вуккеккан ташкилатбы, къуллухчера танкьитIяаъа дешоб. Миллетин дагъамийвал’бы ашкарда гьагва дешод….».
Шахъаб, цIаIхбышихъаб, месала вобна: « ГьинягьаIд гьаъа – дек’ хъекIа, шагьаIд гьаъа – ед’ хъеекIа». ЦIеддыйке шокIле ацIахьес ыккан, гьуIрматыкван йишин кIазет хъаIдаххъанбы, кIазет гьоIкуматын къеккан водун. Манчин гьоIкуматын тераф аххъас лазымда водун. КьоIдъэс, гьоIкуматын ташкилатбы ва мааъаб иш хъобкуба вукдеккан къуллухчера танкьитIяаъасдимее, шахъаб хъобкуна сабаб вуккан. Хьебыдъэс, инсанаршин ихтиярбы ва борджбы цIеддыйни джаргее ыккан. Нишисне шоле дюгыляъас , сасса вахтал’ йишдаб хыл’ гьивийхьар деш.
ЦIаIхбы кIылин сайнан миллет водун. Гыргына сана-санкъукIле ацIана. Ненахьее ненкъуна дост, гогьар, чодж, йичи ворна. Бирданхьес санкъуни гьаIкIее нягьаIкьын одкIунее, лап ацIаджад ыхьее, гьаман хъодкуйн водун, тохум джаб эксина хъилёкван. Лазым дешин ихтелет’бы кIазетни, мааъаб ишлемишоохьени инсанаршини гьаIкIее еймишаъа гивийгъал. КIазет идёйкIан гивийгъал. Манчихъа ил’дяаку , ши чалышмишоохьенбы инсанаршина дагъамна вазият гьаагвас, манбышди шикаятбышихъа иляакас. Ши шикаятбы гьаIллаъан ташкилат дешодун, мана ашкарааъан водун.
ГьаIкIебаб къийна Сувал’ни маIгьалыл’ хаIдда гьаIлла гьидяуйн дагъамийвал’бы водунбы. Манбы медицинайква, йаIхъбышиква, тIокIани ишхеква, хъаIдхъийква, хивни тасарруфатыква , телефонни алаакьайква багълыдананбы водунбы. Зы гьале эйгьи деш медни до водни , йиджбы ишлемишджад дехьени ташкилатбышди гьаIкIее.
ГыргынанкъаI деш гьоIкумат тахсиркар водун. ХаIббанани джиге тахсиркарар джигайлин къуллухчера, гойнеб джоке иш тIабал гьидяаъан джамаъаIт.
«Хылен хыл’ гьойгъал, хыленыд акьва гьойгъал» месала, йишди джиге ишлемишоохьи деш. Гьаарункъвее джуна инсан къорамишаъа. Къуллухчерше джон дёлесинбы ишилхъа гивийххьи. Гойнед ши эйгьен, хиваршее джегьилер аахва деш.
Сувал’ни маIгьалылин ташкилатбы саъаIт хьинне ишлемишхьес ыккан, «йизда», «йигъна» гьаъас ыккан деш. Манчихъа гора шахъар министерствабышее чIакIни къуллухбышил’ инсанар деш, депутат деш, ва медни джамаъаIтын суалбы гьаIллаъани ташкилатбышее инсанар деш. Къийна са миллетыква багълыданан суал къалхымишаъана ва гьаIллаъана дешда. Мед зы эйгьен, ман йишинджад тахсир водун. ГьаарункъукIле садджу вудж, джуна хизан, джун гогьарбы къооджи.Гыргына миллетна «девхьайваллаб» гьаманче гивийгъал.
Сабара вахна гьихъа мигьманна йишди редакциехъа цIаIхни миллетна ватанпарас, хаIбни хизанна саIгьыб ГьаIджиэфендий КIамазов ары. Манкъуна са дих Украинее аIлгьааIни СВО ворна. ГьаIджиэфендий чоджий хаIдда сенбына кIалхозее, гойне мактабее, хъийгъа больницее шофирна ишлемишхьа. Няаъар ишлемиш ыхьейир , манкъвее джуна иш хъобкуба гьааъа вухьа. Джуле наразийба вухьесын кар мысаджад гьаъу деш. ГьаIшде мана пенсиее ворна, анджах миллетиква багълыданани ишбышее мана гьаммаше гьийдни джаргее эхьи. Джанана тав, саламатыйвалла йыIкьба вухьейиб, мана чалышмишехьена югни- писди вахтал’ джамаъаIтыква саджигее ихьес.
ГьаIджиэфендий КIамазов ЦIаIхее ешемишехьи. МанкъукIле Сувал’ни маIгьалылин гыргын дагъамийвал’бы лап кокале ацIа водунбы. Манкъуни увгьойква , са дагъамийваллаб медицинайква багълыбанана вобна. « Къийна Сувал’ни маIгьалыл’ джан ыIгьтибараъасын дохтурар лап сейракба вобунбы. ЧIырынбышис хъодкуйн диагноз гиххьес ва маалидже гьаъас аIха деш. Районни больницайни суракеб мани дагъамийвалилхъа кIорана фыкыр гьооли деш. Инсанар маджбырба воохьи дохтураршисахъа шагьарбышеехъа вуIххъас. Манбыше гьагуйни дарманбышиква маалидже гьаъас. Хъийгъад, дамарбышеехъа вейбар ыIхас аIханбы, капельницабы гиххьес аIханбы сейракба. Хиваршеени амбулаториебышее, больницее дохтурар, медсестрабы, фельдшерар джигайл’ сасса вахтал’ авааки деш. 30 сенна зы хаIм-йигъ гьидяу «Скорая помощь» машнее ишлемишхьа. Къийна зас дохтурын кумаг лазымдананкъаI, чини вахтал’ авааки деш», — Гь. КIамазове эйгьи.
Манкъвее дохтураршилена шикаят деш гьааъа, дагъамийвалла ашкарааъа.
ГьаIмагьдын дагъамийвал’бы мактаббышейид, хиваршини администрациебышди медни ташкилатбышейид водунбы. Манчике хатир деш ахвас ыккан, дарс алеетIас ыккан. Гьаарни къуллухчее джуна иш гьааъас вуккан, манке йишин дагъамийвал’бы кIыл’хъихьесынбы.
