Апрельни 12-чил’ доюкани цIаIхбышди шааирыс 75 сен быкырхьа. Манкъвее цIаIхни адабиятни таарыхе кIорана гов гьабсыр. АIбдураIгьим Дадашев цIаIхбышди классик адабиятыс диб гиххьыйнбышда са ворна.
ХХ–ъэсди асырын аIхир ва ХХI -ъэсди асырын къом цIаIхни адабиятни сардан гейд гьаIракатын ыхьа. Кок дешда йив воохьена дешки. Йиссейда цIаIхбышихъад джон адабият ыхьа. Ман аIрабни , фарсни, тюркни мизел’ одкIун. Анджах ман таарыхни уммане батмишхьайн. Шалхъа манчин тикабы гьидхьыр.
ЦIаIхни адабиятын тезе нафас цIаIхни мизел’ ойкIанан язы яратмишауйле хъийгъа алеетIу. Эгьес эхьи, 30-35 сенбышди аIре , ман фолькорылейий аIшукьаршини поэзиейле классик адабиятылхъа садкIыл. Мани сенбышди аIрее 40-50 цIаIхни адабий мизелин поэзиейн ва прозайн китаббы чапыке хъигъечIу. АIреенче тезе-тезе шааирар, язычер хъигъебчIу. Дагъыстанни язычершини союзе ва ДДУ-ни едяршин адабиятбы ахтармишаъани марказее цIаIхни адабиятын секциебы ачмышхьа. ЦIаIхбышди шааираршин ва язычершин асарбы дагъыстанни, урусни ва хаариджий мизяршилхъа сакIалаъа гибгъыл. Манбы джурабаджур МаскIав, МаIгьачкъале, Пятигорск, Ростов, Дербент ва медни шагьарбышее чапыке къайиккыйни антологиябышеехъа гядкIу.Йишди шааираршини ва язычершини китаббыше чIакIни китаббышди гьагуйбышее иштыракау. Къийнад ман цIаIхбышди адабиятын чарх гьаIракатыква илийкIар водун.
ЦIаIхбышин адабият къелилхъа сугъоцаъас, гьаIракатеехъа адчес ва манчикIле ачухна йаIхъ гьаагвас йишда доюкана шааир АIбдураIгьим Дадашев чалышмишхьа. Манкъвее джун до цIаIхбышди адабиятни таарыхе къизлени гьаIрфбышиква гьадсыр. Апрельни 12-чил’ йишди шааирыс 75 сен быкырехьи. Гьамыр мана йишди кIазетна дост ворна. ХаIдданан манкъун асарбы «Нуре» чапау.
АIбдураIгьим Дадашна дих 1948-ъэсди сенни апрел’ни 12-чил’ Гыл’мецни хивее едике ыхьа. Молидъэсын сыныф Гыл’мецIни мактабее таамау, мана Дербентни педагожи училищехъа иккечIу. Гьамаа хъаIдаххъани вахтал’ поэзиейква маIшкьулехьи гиргъыл’ . Адабиятылхъан аIшкь, гьавас манкъун джуни джегьил’ урусаршини маIъаллимае Мария Фиактисовне ачухау. 1969-70 сенбышее Ватанысын бордж хъувы. АI. Дадашевыхъад мани вахталийс къадсырыйн шечIбыд водунбы. 1979-ъэсди сен манкъвее ДДПИ –ын математикайн факультет таамау. Гыл’мецIни йыIкьнекни мактабе математикайн дарсбы ыккы, организатор ыхьа, гойне хил’дже сенна директорна ишлемишхьа.
1982 сен хивни джаIмаъатын мана Гыл’мецIни сельсоветыс хаIбвалла гьааъас гиххьы. Мани сенбышее манкъуни регьберийваликва Гыл’мецIа, Лека хаIдда хайирыкван ишбы къадже. Мани вахтас къабсырна манкъухъаб поэма «Зы ва вахт» («Я и время») вобна. Хъийгъа манкъвее мед мактабее ушахаршис математикайн дарсбы гьели гиргъыл’. ГьаIшдер маъаIллимна ишлемишехьи ворна.
МаъаIллимна иш къулайква вуккийхъа гора, мана наградабышис: «Отличник народного образования», «Заслуженный учитель Республики Дагестан» лайикьау.
АIбдураIгьим Дадашевыхъаб хаIбна, муIгьуббатыквана хизан вобна. Манкъвее гыргын джун ушахар эвлемишавъуйнбы. Манбышихъад джон хизанбы водунбы. Деккин , един тербие манбыше къелике авхъа гьели деш.
АIбдураIгьим Дадашевыхъад Аллагьыке хъооIн баджарагъ водун. Мана поэзиейна устад ворна. Манкъвее чапыке китаббы: «Уста РаIгьимна хаIне», «Йихъистан», «Сувабы вергъек авуд», «Ну как молчать» къайиккы. Мани китаббышени поэзиейни асарбышда тематика гьар джурайна вобна. Мааъад муIгьубни, заIгьматни, табиятни, инсаныйвал’ни, игитийвал’ни, тербиейни, философиейни гьаIкIеедын шечIбы хъызахха. Манчин хаIддананбы джуни миллетиква алаакьанбы водунбы. АI. Дадашеве джун шечIбы гьам цIаIхни , гьам урусни мизел’ ойкIан. Манкъухъад Азербайджанни мизел’ къошмишауйн шечIбыд водунбы. Манкъвее цIаIхни мизелхъа дагъыстанни , урусаршини, хаариджий шааираршин, язычершин асарбы сакIалау.
АIбдураIгьим маIъаллимын сабара шечIбы цIаIхни мизел’ни дагъайдни сыныфбышди китаббышеехъа гядкIу. Манкъун асарбы Къузайл’ни Кавказни поэзиейни, прозайни антологиябышеехъа, сборникеехъа «Шааираршина маджлис» ва Фазил Дашлайни китабеехъа «Два крыла»эчIу.
Гьаммаше манкъвее поэзиейни маджлисбышее иштырак гьаъа. Хьодле сенна гьихъа МаIгьачкъалее манкъуни китаббышин презентация ыхьа. Манке утагъ манкъуни поэзиейни гьаваскараршиква гяцIы.
Дадашев АIбдураIгьим Дадашна дих Россиейни язычершина уIзвы ворна.Къийнар йишда шааир кьаламыква ишлемишехьи ворна.
ГьуIрматыквана йишда шааир, хааIрна чодж, дост АIбдураIгьим маъаIллим, вас джанана сагъвалла йикIена шадвалла аIрзуламишааъа! Тезе сюжетбышикван тезе китаббы чапыке къайиккас вас кьисматхьен. Поэзиейн гьаваскарар вахъаб хаIбба вухьенбы. Йигъна кьалам гьаммаше экIба вухьена!
