Къийна СВО ааIни джигее хаIбба цIаIхни халкьын джаванар вобунбы. Манбы гьихъа котрактыка ишлемишувхьайнбы, мобилизациейхъа гябкIыйнбы, джони хаишиква махъа абкIынийнбы вобунбы. Манбышди сабаранбышди гьаIкIее ши кIазетни гьийдни нумрабышее макьалабы гьувоний. Къийнийна йишда гаф Аттални хивейнче СВО иштыракаъани джаванаршини алла вухьес.
ГьаIшде мани хивейнче СВО 12 джаванын иштыракаъа водун. Манбы Асланов Айдын, Асланов Кьурбан,Лезгиев Рамис, ЫIсаев МутIалиф, ЫIсаев Надир, ГьаIсилов МагьаIмад-шефи, Атаев Махач, ДжуIмаев МагьаIммад, Лезгиев Насих, ДжуIмаев Рауф, ЫIсаев МагьаIммад-салам, Раджабов Малик вобунбы. Манбышин гыргыба контрактыка эскерийваллла гьааъанбы вобунбы. Къийнийна йишда гаф манбышди сабаранкъуни гьаIкIее вухьес. Авхуйнбышди гьаIкIее хъооIни нумрабышее окIанас чалышмишивхьесынбы.
Асланов Айдын едике 1983-ъэсди сен едике ыхьа. 2014-ъэсди сениле хъийгъа манкъве котрактыкана къуллух гьааъа. Мана СВО гидгъылни йигъылее мааъар ворна. Манкъве джуна эскерийвалла Запорожьейни вилаетил’ вуккекка. Къийна Айдын истирагьатыс къайиккы, хизаныка ворна. Мана аилейка Бабаюртни «Ленини» бинайл’ ешемишехьи. КьоIни ушахна дек’ ворна. Айдыне СВО къаджейнчике гаф гьааъанкъаI, увгьойн: «Эскерийвалла адамийс аваакIына иш вобна. Гьинчиле хаIдда сенбына гьихъа контракт ойкIананакъаI, закIле ацIаний, геледжагъыл’ гьааъасди ишина дагъамийвалла. Къийна йишда иш Ватан къорамишавъуй вобна. Маныд адамийс авакIынна иш вобна. СВО ши нимеехье такьатыка вобунбы. Ши Гъамувхьесынбы! Азгъунувхьайни миллетчершикIле йишин гьунар къеджи водун».
Хъийгъыйна йишда игит Асланов Кьурбан ворна. Мана 1987-ъэсди сен Аттални хивее едике ыхьа. Манкъве джуна ыIмыр эскерийвалика 2013-ъэсди сен къабсыр. СВО гидгъылни йигъыл мана махъа аляртIу. Мана хаIдданани вурушбышда иштыракчий ворна. Кьурбане Запорожьейний Херсонын вилаетбы миллетчершике темизяъани вурушбышее вуджее вудж гьаIкIена джомард эскер хьинне гьагу. Манкъуни игитийвалис командирарше, джуни гьамбазарше гьаммаше ахтына кьиймат гьооли. Хьулехье Кьурбан гирхьуйни дагъамни вазиятенче хъигъечIуна. Къийнар Кьурбан гьуIкуматын, командирарше гьагуйни ишил’ ворна.
ДжуIмаев Рауф 1995-эъсди сен едике ыхьа. Манкъве 2012-ъэсди сен Калел’ни хивын йыIкьнекин мактаб быкырау. Сабара вахтна эскерийвалла вуккуйле хъийгъа, контрактийвалла гьааъа гиргъыл’. Къийна мана СВО иштыракчий ворна. Рауф эскерейхъа ааIссе гьихъа, геер бадажарухуквана джегьил ыхьа. Манкъуни гьаIкIее гаф гибхьыйнкъаI, хивни джамаъаIтын эйгьен: «Ши гьаммаше Рауфни гьаIракатыс, ацIаалис югна кьийматный гьоолена. КIыл’валике джад манкъуни фыкрее контрактна эскерийвалла гьавъуй вухьа. Рауф геер дирибашна джегьил ыхьа. Къийнад манкъве джуна дирибашийвалла Ватан къорамишаъанкъаI гьаагва вобна». Манкъуни гьаIракатыс, тактикайс командирарше югна кьиймат гьооли. Вуджыр ненкеджар чIаIкынбышди джувабыле хъигъечIи деш. Манбыше гьагуйн тапшырыгъбы гьар вахтал’ аIхырейхъамее быкырааъанбы.
ЫIсаев Надирее котракт одкIунийн хаIдда сенбы водунбы. Манкъуни увгьойка, гьайни сен эскерийвалла гьааъана 13 сен быкырхьес. Мана джуни хивынбышди аIрайл’ цIерра котракт одкIунна гьыIсабехьи. СВО хъарына сабара вахтаке са сен быкырхьес. Надир военныйн къулай ацIана эскер ворна. Мана хаIдда джурабаджура операциебышда иштыракчий ворна. Манкъуни увгьойка, СВО гидгъылни йигъыле джокIле махъа алябтIас вухьай ацIа ыхьа. Джо воохьени частын эскерар гьийгъанче гьихъа гьаIракатыква гьаIзирааъа вухьа. Къийна Россиейн тезе вилаетбыйий республикабы миллетчершике темизяъани вахтал’ манке ыккыйни гьаIзирийваллабышин хаIдын кумаг гьели. Миллетчерше фыкрее аххъыйн тактикабышин оIги ши явашаъан. Манбышихъад гьеххан гьаIракатаъасын имканбы гьайсар деш. Надире сечмишавъуйни санаъаIтыле зигаара гьааъа деш. Мана манчиле гуянмишехьена. Авхуйнбыб мани саягъыл’ вухьес хъоотIал.
Эскераршиквани гафее манбыше джони къийнийни йигъыкеб гаф гьавъуна. Манбышди увгьойка, гьаIшде джохъаб нишикенеджаб кеситийвалла дешда. Охьанасыний илёгъасын, аляъасыний къалябкIасын гьар джура имканбы водунбы. Манчиле гъайре бандитаршике гъамувхьесдимее ярахыд водун.
Атталбышин хьиннен СВО иштыракаъан джаванар йишди гыргыни хиваршее вобунбы. Манбыше къийна ши, йишда ватан бандитаршике, хаариджийле хъидебтIул’ абыйни душманаршике къорамишааъа вобна. Эскераршиква вуккеккани горушбыше манбышда гумрагьийвалла ваацIоохьена. Манбышди фыкрее торпахбы экIда хылелхъа сауй, миллетчер манче авакIанавъуй водун. Мани карее ши манбышис угъурбы аIрзаъа.
СВО иштырак гьаъанбы экIба гъамувхьа хайбышейхъа савкIалас кьисматаъан. Манбышди делесынбышис, гогьар — гьамбазыс, дост-танишес, аилебышис сабырбы гьеленбы.
Материал гьаIзирааъанкъаI, атталбышди ооъад добы агъмишауйни хаIббанани эскераршиква СВО вухьайхъа гора, алаакьа аххъас аIхы деш. Хъийгъийни нумрабышее манбышди игитийваликейий джомардийвалике окIанасын.
