Миххьей, Дагъыстан Республикайна, Рутул районеена цIаIхбышда хив вобна. Мана ЦIаIхни администрациехъа гёохьа. ЦIаIхни администрациейни сиягьыйква Миххьейни хивее хьодваIшмеегана инсан оркIун ворна. Анджах гьаIшде манбышин хаIббананбы медни дагъыстанни районбышее, шагьарбышее , Урсиятни вилаетбышил’  ешемишоохьи вобунбы. Миххьейни хивыхъад йиссейн , кIоран таарых водун. Мани хивеенче доюкван маъаIллимар, дохтурар, устадар, ишкарар хъигъебчIу. Къийнад манбыше йишди миллетын до ахтывале гьуваджес чалышмишоохьи вобунбы.

АIхреени сенбышее мани хивни джегьилерше сент’  хаIдни бизнесылхъа аххъы водун. Эгьес эйхьи, мани карее манбы энки гьаIракатнанбы вобунбы. ЗаIгьматыс сикIы , барыб манбыше алябатIана.

Хил’дже сенбына гьихъа, Миххьей хаIбна хив вухьа. Мааъад 80-90 хав ыхьа. Хивее йыIкьнекин мактаб, ФАП, кIлуб, китабхана, дукан ва медын ташкилатбы ыхьа. ГьаIшдед манчин сабарабы мейид водунбы. Анджах сен- сениле хив кIыл’хъувхьа аIл’гьаа вобна. Джегьилер аахва деш. Манчихъад хаIдда багьнабы ва сабаббы водунбы.

Нена няаъар ешемишехьи ыхьейир, гьар цIаIхийгъалийн бордж водун джуна Ватан кIеливхан гьидявъуй. Агар имканбы водхьее , джуни хивее хайбы, манзик  аляуй; йаIхъбы, вейхбы, йыIгъар, гармабы хъауй, Мааъаб джони деккяршин, едяршин, дидершин, адершин някьвбы водунбы. Мааъад джони архабышин рыIгь водун илийкIар.  Миххьейни хивыхъаб маIгьдын имканбынан инсанар хаIбба вобунбы.

ГьаIдис вобна: « Ненкъвейий гьайни дюнйейл’ акваа меегана манзик алявъу, Аллагье манкъус гьаIкIени дюнйейл’ дааира аляъас».

Къийнийни йигъылхъамее, мани сардан, Миххьейни хивын аIзабыйвалла цIыцIааъа вобна.  ЗакIле ацIан, са мани хивее  джуIма манзик дешобна.

Гьайни Рамандини вуза, Миххьейни хивее маНзик аляаъасда мислягьаIт вухьа. Хивеехъа Воронежни шагьарее  ешемишехьена ишкар Махач Сафаров джуни чоджиква Мустафайква абы.   Гимгеехъа  манчини гьаIкIеена мислягьаIт гьааъас хивын агъсаххъалар, адамер сабы. Мани маджлисее ЦIаIхни администрациейни хааIрункъвее Вагиф АIлиеве, ЦIаIхни дерайни имаме Эл’дар Сулейманове, ЦIаIхни хивни манзикни имаме Джалалиддин  гьаIджее, Гыл’мецIни хивни имаме АIсадуллагь гьаIджее, Миххьейни хивни дибыре Джелий гьаIджее ва мебынбыше иштрак гьаъы.

МислягьаIтеехъа хъабыйнбы Миххьейни хивее манзик тезелемишааъас. Ман харджийбы джулхъа Махач Сафарове алеетIу. Мана гейб суваабыквана ва аIхратыл’ хайир хъетIасда иш вобна.

Гьел’бедти, хивни джамаъаIтыныд, имканбы водни гыргыни йишди миллетни мусурман-чоджарше  мани ишее кумаг гьелес ыккан.

Хивна баракат – кубар гьаъани джамаъаIтыква гявцIуна манзик вобна.

Ин ша Аллагь, гьар цIаIхийгъалийс мааъаб кубааъас  кьисматувхьена. Аамин!