Ватан дареенанкъаI душманыке къорамишавъуй гьар инсанын бордж водун, няъас увгьее мааъад йигъын хав водун; мааъаб йигъна ушахийвалла абкIын; мааъаб йигъын декий ед’ ешемишоохьи; мааъаб йигъын ушахар мактабеехъа авайкIан; мааъад хизан доламишааъасын къык аляатIа. Ватаныб гьар инсанни къайгъвее аахвас вуккан. Девлетни маIъданбышикеб, мааъаб ешемишоохьени инсанарше хайир алеетIас ыккан.
ХаIбна Ватанна даIвъий таамувхьайн 78 сен аIрайле адкIын. Мани даIвъийн милйонбышиква инсанар дюнйейни акьвале вукку, мысвалла , мыкIаалла, етимийвалла абы; джегьилер инвалидарна гьавъу. Энки хаIдын иштыракыд, зияныд Совет гьоIкуматыс ыхьа.
Къийнад манчин гьувойн ярабы, уцIурбы хъувадкы дешодунбы. Ши фашистаршиле, нацистаршиле гъамувхьейиб, мани азарын кокбы манке юзмишау деш. ГьаIшде манчин мед «зогъбы» Украине гьели гидгъыл. Манчисда «йаIхъыб», «къаIныд» Америкайн ва джони Авропеени десмал оIлкабыше гьели водунбы. Йигъыс манбыше цIаехъа шишааъа вобна.
ХаIбни Ватанни даIвъийе, менни миллетбышиква саджигее, цIаIхбышед иштырак гьауйн. Манбыше джона игитийвалла вурушбышее гьаагу. ХаIббананбы даIвъийе гьабтIу, авхуйнбыб яра-парайква сабкIыл хъабы. Манке маIгьабна хизан вухьа деш, даIвъийн хаджалат гьидёвуна. Садджу ЦIаIхни хивеенче махъа 240 джегьил’ махъа душманыква вурушмишхьес аркIын. 70% манбышин Ватаныс джан гьувы, сабкIыл деш. Къийна манбышике сагъра ахуна дешда. Манбыше джона ыIмыр йишин геледжагъ югун ихьеджинва гьувы.
Мани даIвъийн дарсбы дюнйейл’ ешемишоохьени инсанаршике алеетIас даIхийнбы. ГьаIшде меб дюнйейлхъа фашизм, нацизм, аIйибаIджарийвалла мебни либасе абы. Манчике дюнйе мед ярахыква къорамишаъас гидхьу.
Сеныле гьеххана вахт вобна Украинее СВО аIлгъаан. Манчина метлеб мааъаб ешемишоохьен инсанар мани азарбышике хъувабкавъуй вобна. Анджах, мани чIырвалин кокбы еймишхьа водунбы, аIсас машрыкьни Украинее ешемишоохьени джегьилершини маIгьбышее.
Шени даIвъийе хьинне, гьини СВО-йид йишди цIаIхбышди джегьилерше иштыракаъа водун. Манбышеб джони баба-дидерше хьинне игитийвалла гьаагва вобна. ЙыIкьын уцIур ыхьейд, манбышди аIрее Ватаныс джан гьувойнбыб вобунбы.
Ши чалышмишоохьенбы гьар кIазетни нумрее мааъад иштырак гьаъани джегьилершини, джони хизанбышди гьаIкIеедын маIълумат гьелес. Манбышин ешайиш гьагвас, кумагаъас ва вобхьее, дагъамийвалла ашкарааъас.
Къийнийна йишди макьалейна кьаIгьраман, СВО иштыракаъана контрактник Джелилов Мурад МагьаIммадна дих ворна. Мана ЦIаIхни хивее едике ыхьа. ЦIаIхни мактабын 9 сыныф таамаы, мана хъаIдхъаIс МаIгьачкъалайни промышленно — экономикайни колледжехъа иккечIу. 2004 сен ман къадтитхьын ва финансистын санаъаIт алеетIу. Гамани джар сен эскерехъа хъортIул’. 2004-2006 сенбышее манкъвее ПУВО, Свердловскни вилаетыл’ни Верхняя- Пышма донани шагьаре танкистна пеше гьавъу. Ватаныс бордж хъувы хаахъа хъары. 2008 сен Мураде Дагъыстанени са военный частиква контракт одкIун ва манкъус БТР-на наводчик ихьес теклиф гиххьы.
Мааъар ишлемишехьени вахтал’ Мурад Джелилове Дагъыстане , Чечне ыхьайни вурушбышее , спецоперациебышее джуни эскер-гьамбазаршиква иштырак гьаы. МаIгьад манкъвее джуна игитийвалла гьаагу ва гьамбазаршини аIрее гьуIрмат къазанмишавъу.
2014 сен мана ишлемишхьес медни частилхъа илгъечIу. Мана мааъар эскераршис палтарбы, мал къеккани искIалатее ишлемишехьи гиргъыл’. Къийнар мани частина эскер Мурад ворна.
Гьайни сенни январьни вуза мана Украинее аIлгьаани СВО-хъа командировать гьаъы. Мааъар мана ойхьанни карани искIалатни хааIрункъуна кумагчий ыхьа. Джони частини эскераршис ва яныл’ни эскераршис охьанасын кар къайиккы. Манбышди частин Запорожьейни вилаетыл’ Украинайн нацистаршиква вуруш ыккы ва Миноборонайн аххъыйн торпахбы, шагьарбы, хивар, бинаабы къорамишау. Апрельни аIхрее мана бадалаы, истирагьаIт гьаъас хаахъа къайиккы .
Мурадни увгьойква, къийна СВО иштыракаъани эскераршихъаб са мураад вобна — Украина нацистаршике темизявъуй. Манбыше джони гуджилхъа , командираршилхъа инам гьаъан, гьийб гивхьуна месала гьаIллааъасда ва гъамувхьесынбы. Манкъуни джуваббышиква ойхьанан кар, аляъан палтар, ярах джохъад еттыгъда водун. Далыйлхъа хъувхьай, фыкрееджад дешин. Душманын силибы вурушее гьакьвараъас гьазирба вобунбы.
Ши, ооъад увгьойн, мани СВО хаIбба цIаIхбышин джегьилер вобунбы. Манбы сана-санкъулеб мугъаетоохьенбы, манбыше сана-санкъукван телефоныкван алакьабы гьувадженбы. Манбышин хаIббананбы гьоIкуматни наградабышис, медалбышис, орденбышис лайикьавъу вобунбы.
Ши садджу аIрзуламишаъан, СВО экIда таамхьа, гъамувхьа, маабын джегьилер джони хайбышеехъа сагъба-саламатба хъаваленбы. Аамин!
