СВО хаIбба цIаIхни миллетни офицерарше, прапорщикарше, эскерарше, мобилизациейка абкIынни джаванарше иштырак гьаъа. Манбыше джони гьаIракатыкайий игитийвалика миллетчерше аххъыйн республикабы, вилаетбы, шагьарбы, районбы, хивар темизяъа водунбы.
Къийнийна йишда гаф миххьегIни хивейнчени АIлиев Акимни ва Расулов Рамазанни гьаIкIее вухьес. ХааIрна лейтенант АIлиев Аким Межмединна дих 1988-ъэсди сен едике ыхьа. Манкъве йыIкьнекин мактаб едике ыхьайни хивее быкырауйле хъийгъа, санаъаIтбы ДДТУ хъуво. Аали мактаб югни кьийматбышиква быкырауйле хъийгъа, мана эскерийвалейхъа хъортIул. Эскерийвалла быкыравъуйле хъийгъа, мана джуни частыль аху. Акиме югба хидмат вуккуйхъа гора, сабара вахтале манкъус офицерын хаIнебы гьуво.
А.АIлиев СВО гидгъылыйни цIеддийни йигъыле гьамбазаршика саджигее махъа йаIххъыляу. Мана Россиейни АIкьанани Машрыкьыл’ни гьарбы кьуввабышика Ватан миллетчершике къорамишаъас хъары. Акимни увгьойхъа гора, водни дагъамийвал’бышихъа ил’дяакы, джо цIеддыйни йигъбышил’ Киевна вилает авхъу вухьа. Манчиле хъийгъа, Харьковнийий Херсонни вилаетылхъа йаIхъ авхъу. Мааъаб гуджнани вурушбышика растына хъабы. Амма шавукеджад джон оIги ыIхас аIхы деш. Миллетчер хъаIбкьын кьаIсынбышдийий ушахаршини йыIкьал’ дюгулебхьа вухьа.
Къийна Акимын до югни офицераршини джаргее водун. Мана реактивный артиллериейни батареейна взводна командир ворна. ГьаIшде мана джуни гьамбазаршика саджигее Запорожьейни вилаетил’ ворна. Манбыше джони командирарше гьагуйн тапшырыгъбы быкыраъа. Мана гьагуйни игитийвалис сакIы «Боевое отличье» медалыс лайикьра къаджы.
Акимыхъаб уфтанна хизан вобна. Мана хааъар хьунащее, кIынни йище, деккейий едей, делесынбыше гозетяъа ворна. Манкъуни деккее — Межмедин дайе, едее — Къизилгул’ баджее увгьойн: «Аким СВО гидгъылийле хъийгъа, са элеес истирагьаIтыс хъары. Вахт вухьайнкъаI, манкъве зенгбы гьаъанбы, хизаныкен хъидгIынбы гьаъанбы. Йишда мураад СВО экIда таамхьай вобна. Маабын гыргын джаванар хайбышейхъа сабкIылый гозетяъа.
Расулов Рамазан Асланбекна дих, 1989-ъэсди сен едике ыхьа. Манкъве Къызларни районее ДДТУ-ыйн филиал таамау. ХъаIдхъый быкырауйле хъийгъа, эскерийвалейхъа аркIын. Манар Россиейни АIкьанани Машрыкьыл’ни частбышди санчее хидмат гьааъа. СВО гидгъылыйка мана махъа хъары ворна. Манар реактивный артиллерийский батареейна хааIрна ворна.
ХааIрна лейтенант Расулов Рамазан шаца февральни вуза Киевни вилаетылхъа иккебчIыйнбышди аIрайл’ цIеррийна ыхьа. Манчиле хъийгъа манкъве хаIбвалла гьааъан батарея Харьковни вилаетеехъа иккебчIы. Гойне хьинне манбыше Херсонни вилаетее’ сабыйн миллетчершин масканбы темизяъу. ГьаIшде Рамазан Запорожьейни вилаете ворна.
Рамазанни гьамбазаршикIле мана геер дирибаш командир хьинне ацIа. Мана дагъамни вурушбышда иштыракчий ворна. Манкъве джуни эскераршис зарар хъитIедесдимее гьар элеес тактика бадалаъан.. Манкъухъад гьагуйни игитийвалис сикIы алятIуйн хаIдда наградабы водунбы.
Рамазаныхъаб гееб уфтанна хизан вобна. Хьунащее, кIыл’ни духее мана хааъар гозетяъа ворна. СВО аркIынийле хъийгъа мана са йаIххъее хааъар ыхьа. Манкъуна дек’ Асланбек дайей ед’ Шагьпери халее духайн хаахъа хъарый хаIм-йигъна гозетяъа водун. Манбышди увгьойка, Рамазане джо кIеливханааъа деш. Ши хаджалат гьидяуйниме, зенгбы гьаъанбы. Джуке хабар гьооли, шаке хъидгIынбы гьаъанбы. Манчихъа ил’дяакы, деккинайий ед’на мураад мана экIра хаахъа хъарый вобна. Рамазан хьинне СВО хаIбба эскерар вобунбы. Манбышди гыргынбышихъаб гозетяаъанбы вобунбы. Манбышед ши хьинне дилягбы гьеххъа водунбы.
Офицераршини делесинбыше гьауйни ихтилетыс зынад кьувват гьооли вобна. Шинад йишди сурале гидгъылыйн СВО экIда быкырхьа, маабын эскерар сагъба-саламатба хайбышейхъа, хизанбышисахъа сабкIылый гозетяъа водун.
