Къийна СВО иштырак гьаъан эскерар, мобилизациейхъа гябкIыйн джаванар сура вузас истираIгьатыс хайбышейхъа къоокка гибгъыл. Манбы сабара гагьна хизанбышиква вухьайле хъийгъа, меб йыIкьаIлхъа савкIалас. ИстираIгьатыс къавуккуйнбышди аIрайл’ Калел’ни хивее ешемишехьена Къараев Тарлан АIлийна дихыр ворна.

— Тарлан, хошгелди! Гъу сагъра-саламтра къаджийле ши шадба вобунбы.  ГьаIшде кIазет хъаIдаххъанбышис танышийвалла гьевле…

— Зы 1983-ъэсди сен Калел’ни хивее едике ыхьа. Бабаюртыл’ни Калел’ни хивни йыIкьнекни мактабее хъаIдхъы. Манчиле хъийгъа эскерийвалейхъа гьаркIын.  Ватанни гьийдын бордж хъувойле хъийгъа, сабара гагьна хивни тасарруфате ишлемишхьа. Хъийгъа контракт одкIун ишлемишхьес Чечнейлхъа аркIын. ЦIеддыйн контракт быкырхьайле хъийгъа, эскерна пеше таргавъуна. Мобилизациейхъа аляртIассе гьихъа маншруткайка инсанар гьахъа вухьа.

 

— СВО командирарше нена ишне  тапширмишавъу?

— Зы Каспийскни флотилейнче СВО оIтирау.  Республикайни хаIдданани районбышейнче хъобтIулыйн гадебы цIебба махъа савъу. Мааъад  шас сабара гагьна гьаIзирийвалла вуккы. ГьаIшде зы инженер-сапёрни къуллухул’  ворна. Йишда иш душманар гьуIджумыс гьидябсырыйниме противопехотайн, противотанковый минабы гийхьи водун. Йишин эскерар гьихъа ааIнкъаI, ши манбы авакIанааъанбы. Манбы илгъебчIыйле хъийгъа, минабы мед тезеданда  гийхьенбы. Мани сардан йишди дестейн хаIбна иш вуккека вобна. Къийна зы Запорожьейни виалетыл’ ворна.

— Вакасана мебын йишди элин джаванар вобунбыне?

— Заквасана мааъаб йишди эл’на молюйре джаван ворна. Манбы контрактникарый мобилизациейхъа гябкIыйнбы вобунбы. Йизди дёлесийвалей  мишлешбышда ГьаIсанов Рустам, муслагъбышда  Сулейманов АIзиз, йишди хивна Улуханов Малик воохьи. Манбышика экIба-экIба хъызаханбы,  хъидгIынбы гьаъанбы.

 

— ГьуIкуматын, мобилизациейхъа гябкIыйнбышди хизанбышис джурабаджура кумагбы гьели. Манчике вас пай вухьанане?

— Зы СВО аркIынийле хъийгъа, хаахъа кьоIни элеес Калел’ни хивни администрациейна кумагчий ары. Манкъвейид са элеес йицIыд аазыр манат пылына абы. Манчиле савагьийда, йизди хизаныкIле ненджад кумаг къаджы деш. Молюбле вазна зы СВО ыхьа. Мани вахтал’ акка аахъы, хизаныке шу наIгьбый, шохъад гьиджоо дагъамийваллабы водунбува хъидгIын гьаъана ыхьа деш.  Зас гьуIкуматын гьувона ваIщ аазыр манатыб аIрейнче хьейибле ваз абкIынийле хъийгъа хъабы. Гьувойн пыл алятIасдимее,  зы хаIдданани дагъамийвал’бышика растына хъары.  Манчин тахсиркарарыб хивни администрациейн къуллухчер вухьа… Ахуйн маIъашбыд гьар вуза алятIанбы.

 

— СВО иштыракаъани джаванаршихъаб нишикена кеситийвалла вобна?

— Нишикенаджаб кеситийвалла дешда. Гьар кар гьеххаалика водун. Охьанасын кар, аляъасын палтар гьокуIматын гьеххаалика гьели водун. Зы аркIынни мол’ни вуза кьоIни элеес палтарбыйий къелилинбы тезелемишау. Охьанасыныд еттигъда гьелен. Манчиле савагьийда СВО зонэхъа хаIдда кумагбы инсанрше йаIххъыл’ гьааъа. Ши воохьени частылхъа экIда-экIда кумаг  Дагъыстанейче хъадайли

 

— Тарлан, къийнийна СВО вазият ваацIавхьес вукканий?

— (Йизди суалыс джаваб хъеленкъаI, манкъве кIооралейнче нафас алятIу – Ю.Б.) СВО иштырак гьауй сибыкна иш дешобна. Гьел’бетде, дагъамийваллабыд хъадыйнбы, сабара гагьна мысваллаб вухьана.  ЗакIле манбы гыргыда къаджейнбы. Къийна ушахаршикIлед СВО ши ыккеккан вурушбы телевизорейнче къеджен. ШакIле ацIан, ярахын сеснани джигее сакитийвалла дешда. Къийна шалхъа магьаIбна пай хъабы. Йишда иш Ватан миллетчершике темизявъуй вобна.  Ши адамейрше хьинне командираршин амырбы быкыраъанбы.

 

— Къийна Россиейл’ юххьанийн джаванаршин эскерейхъа хъобтIулый гуджнака аIлгьаа водун. Сабара джаванар эскерийвалике дюгул’ воохьи…

— Ман адамийс идвак1ыйн гьаIракат водун. Йишди гыргынкъуна Ватан Россия вобна. Мана гьуваджий йишин бордж водун. Къийна ши мана къорамиш гьидявъуей, шале хъыйгъынбыше шас багъышаъас деш. ГьаIшде шас гьуIкуматыке гьар кар ыкканан, амма оIлка дарейхъа гидхьуйнкъа, гьейбхас вуккан деш. Йишди халкьыхъаб уфтанна мисала вобна: «Дихнанкъуна дих эскерейхъа гьайкIаннаки, йищнанкъынар йиш адамийс гьеленаки».  Йизин ихтилет, мумкум вобна, сабаранкъус кьабыл’хьес деш. Гьарункъухъаб джуна фыкыр вобна. Йизда фыкыр мани сардан темизба вобна.  Повестка алятIумее, закер дюгул’хьес аIхайий. Амма йизди ламусын манчис имкан гьуво деш. Зы увгьойни вахтал военкоматейхъа  гьирхьыл’на.  Авхуйнбыб СВО иштыракаъани гадебышик акар вухьес вуккан. ШакIле ацIан, эскерейхъа тезеба хъоотIаланбы махъа  деш алябатIа. ХъыIдябкьын эскерийвалейхъа ал’гьааIс вуккан.

 

— Тарлан,  сабара вахтаке йигъын истирагьаIтыс гьувойн йигъбы таамехьенбы. Гъу мер СВО сакIалас. Хаабынбыше гьиджоойий эйгьи?

— Хизан йиздимее аIзизба вобна. Манбы зы мысаджаб кIеливханааъа вухьа деш. Вахт вухьайнкъа зенгбы гьаъа ыхьа. Къийна зы манбышиле  шадехьена.  Йизын ушахар хурба вобунбы. Манбы зы къеджесдимее цIиялывухьайий. Гьар карахъад чин къайда-кьанун водун. Ушахаршини яныл’ вухьай гьаар деккинайий едина мураад вобна. Са кар кIелиханаъасм ыккан деш, заква  СВО воохьени гьамбазаршихъабыб хизанбы водунбы. МанбышикIлеб ушахар къавджес вуккан. Зы саркIылийле хъийгъа манбы истирагьаIтыс аIлгьаас.

 

-Тарлан, йишди суалбышис джаваббы хъелес вахт тIабалавъуйхъа гора, сагъра ихьена. СВО экIда таамхьа, гыргына  хаахъа хъалес кьисматхьен.

-Шосуд сагъул, зы кIелихан гьидяу, аIрсей гьауйхъа гора. Зынар вушди фыкырбышда тарафдар ворна.