Майни вуза садджу байрамбы джад деш йишди гьIокуматыл’ алгъайгьи, манчиле гъайре байрамбышис къадсырыйн спортын оIюнбы илгъечIи.
АIдатеехъа гидхьу, сенис цIаIхбышди джегьилерше джони ХаIбни Ватанни даIвъийе иштыракауйни, гьаIшде раIгьматыххъа абкIынни, ветеранаршис къадсырыйн футболын турнир алгъайгьи. Гьайни сенид ман аIдат гьуваджийн.
Майни 14-чил’ МаIгьачкъале, «Спарта» стадионни кIыл’ни футболни майдамбышее, футболын байрам гидгъыл. Мани спортни байраме иштыракаъас цIаIхни миллетин джегьилер, Дагъыстанни муфтиятын, республикайни минспортын, цIаIхни дерайни ветеранаршини ташкилатын эл’чера, фонд «Инсанын» хиваршини администрациебышин чIакIынбы, мактаббышин директорар, журналистар ва мебын тамашечер сабы.
Мана хаIбна спортына маджлис ЦIаIхбышди джегьилершини союзын ва спонсорарше ташкилявъу ва Сулейманов Юсуфе вуккы. Мана къулайква алгъаагьас кумаг ДР-ни муфтиятын, фонд «Инсанын», ишкарарше, СМИ-ше гьувы.
Турнире ЦIаIхни дерайле, Бабаюртни, Къызларни районбышеенче, Тюбейнийий Хушетни хиваршенче, МаIгьачкъалайни , Ростовни, Астарханни шагьарбышеенче адыйни 16 –ни командабыше: «Мирное», «Гельмец», «Оригинал», «Аттагай», «Хатай-спорт», «Хорай», «Ихва», «Кизляр», «Тюбе», «Цахуры», «Курдул», «Самур», «СПК Мишлеш», «Биг-бен», «ФК Хушет», «Мишлеш — Цахурская долина» иштыракаы.
Гьайни сен командабышее гьар хиваршенче хъигъебчIуйн джегьилер гьуваагы, йаIъни баIстбы хиваршини аIреедынбы деш ыхьа, манбы командабышди аIреедынбы ыхьа. Командабышее аликкыйн состав гьувагы.
МичIеедийке гёгъани гёгъуйхъа ил’дяакы, увгьойни вахтал’ турнир гидгъылыйн. Жюрийн, судьебыше, маджлис вуккекканкъве джон ишбы сербестда ыккыйнбы.
Махъа абыйнбыйни мигьманаршис, гьувааганбышис, тамашечершис фонд «Инсанын» илёгъас симаварын къуIман чейбы, оохьанас- болба, иттуна плав гьазиравъу. Манбыше са сутIкана гьихъа гьазирыйвалла къооджи гибгъыл. Манчиле гъайре, бирданхьессе хатаа мехьеджинва гьувааганбышис, дарманбы, бинтбы гьазирау. Махъа кумагаъас абыйнбышди аIрее дохтурарыб вухьайнбы.
Турнир, аххъыйни пIланыква илгъечIу. Командабы десте-дестена пайлемишхьа цIедда гьувагы. Гьар дестеенче кьоIбле команда, кьоIдъэсди туреехъа хъигъебчIу. 16 командайке 8 команда авху. Хъийгъа ман командабы кьоIни дестейлхъа джурахьа сана-санкъуква гьувагы.
1/4 финалеехъа 4 команда хъигъевчIу. ГьаIкIебад манбыше югун футболын оIюнбы гьагу. Кьисматыкед, гьаIракатыкед хаIдданан кар аIслыда водун. Анджах, нена командайий югба гьуваагы, ненбышихъадый хаIдын гьаIракатбы ва гьавас ыхьа, манбы финалеехъа хъигъечбчIу. Финалеехъа джон спортын гьунарбы гьагвас командабы «Аттагай» ва ФК «Гельмец» хъигъечIу.
Финалын оIюн ихьессе гьихъа, 3 джигайни аллан оIюн ыхьа. Мани спортыни баIстее «Цахуры» команда гъамувхьа. Мани командее гьар цIаIхбышди хиваршин джегьилер гьуваагы.
Энки гозетяаъана вахт финалын оIюн гидгъылмее хъабы. ГьаIкIедад ман оIюн «АIттагай» — ФК «Гельмец» финалык’ аваакIыйн оIюн ыхьа. Гьайни элейс кьисмат «Аттагайни» сурал’ вухьа. Манбы гъамувхьайнбы.
Агар аIкьда алеетIе, мааъаб достыйвалла гъамувхьа. Ман спортын оIюн байрамылхъа садкIыл. Наразийба авхуйнбы вухьа деш. ЦIаIхбышин джегьилер сана-санкъуква танышивхьа, саджигеехъа сабы.
Футболын турнир таамхьамее, пайбы гьелена маджлис гибгъыл.
Къирагъыле абыйни мигьманарше маIърафатыкван, тербие гьелен, билигыкван чыхышбы гьау. Манбыше илгъевчIийни спортни маджлисна метлеб йишонавъу. Джегьилер ватанылхъан, динилхъан майил’, аIшкь утIумаъас манбыше хъобтIул.
Чыхышбы гьаъанбышди аIрее олимпиадайна чемпион ГьаIйдарбек ГьаIдарбеков, Дагъыстанни муфтийна маIъвын, муфтиятна каатиб ГьаIсан эфендий, ЦIаIхни дерайни ветеранаршини ташкилатна хааIрна НезирмаIгьаммад АIгьмадов, ЦIаIхни дерайна имам Эл’дар Сулейманов, ЦIаIхни дерайл’ни фонд «Инсанна» хааIрна АIсадуллагь Рамазанов, Мишлешни администрациейна хааIрна Ислам Ибрагьимов ва мебынбы вухьа.
Гойне мани эл’черше призбы битIалау. Хьебыдъэсда джига авхъуйни «Цахуры» командани оIюнчершис капширын медалбы ва грамотабы, кьоIбъэсда джига авхъуйни «Гельмец» командайс нукIранын медалбы ва грамотабы гьувы, цIеббыйна джига авхъуйни «Аттагай» командайс, къизлен медалбы, грамотабы ва кубок гьувы.
Гойне манбышди гьаар командайс, авхъуйни джигайс сикIыйн пыл гьувы.
ИлгъечIуйни футболни турнире энки югра гьувагана оIюнчий РаIгьимов Руслан (Аттагай») гьыIсабаы. Манкъус пайис статуэтква ва 5 аазыр пылна гьувы. Энки югра гьувагийни варатарыс Ибрагьимов Шерифыс статуэткайий 5 аазыр пылна пайис гьувы.
Манчиле гъайре, «АС-Мед» клиникайни хааIрни директоре АIгьмадов АIбдулнасир Семедни дихее джуке 1 джига авхъуйни «Аттагай» командайс 50 аазыр пылна, 2 джига авхъуйни ФК «Гельмец» командайс 30 аазыр, 3 джига авхъуйни «Цахуры» командайс 20 аазыр пылна гьувы.
Турнир къурмишауйнбыше ва оIюнчерше А.АIгьмадовыс баракат ва джанана сагъвалла агъмишавъу.
Н. АIгмадове джуни ташкилатыке турнир къурмишайни цIаIхни джегьилершини ташкилатни хааIрункъус Руслан Алхасовыс диплом гьувы.
ХаIбни Ватанни даIвъийни ветеранаршис къадсырыйн футболын турнир едигарыс саджигее цIыцIауйни шикыл’бышиква таамхьа .
