Къийна СВО хаIббани цIаIхни миллетын джаванарше иштыракаъа водун. Манбыше джони игитийваликва Ватан къорамишааъа. Къийнийна йишда гаф Коршни хивейнчени Давудов Нариманни Халилни духайни гьаIкIеена вухьес. Гьайни йигъбышее мана «Нур» кIазетни редакциейна мигьман ыхьа.
— Нариман, хашгел’ди гъу. Ши гееб шадба вобунбы, гъу сагъра-саламтра йишди яныл’ къаджейс.
-Шунаб сагъбы вухьенбы. Зынад йишди гыргыни СВО иштыракаъани гадебышис сагъба вухьай аIрзаъа водун. Зы 1985-ъэсди сен Коршни хивее едике ыхьа. ЦIедда Коршни хивеедын дагъайдни сыныфбышин мактаб быкырау. Гойне хьинне, йизын хъаIдхъий ДжинаIгъни мактабыква багълыда ыхьа. Алидын сыныфбы МагьаIчкъалайни шагьарее быкырау. Мактаб быкырауйни сен санаъаIтбы Дагъыстанни девлет педагожи университетейхъа хъуво. 2007-ъэсди сен универститетын геграфиейн факультет таамау.
— АцIахьес ыкканий, няъасый гъу маъаIллимын санаъаIт эскерни санаIтыква бадалау.
— Манчихъад джурабаджур сабабы водунбы. ЦIеббыйна сабаб эскерийвалла адамийс аваакIыйн санаъаIт водун. Гойне хьинне, мани сенбышее хаIббанани джаванрше контрактбы ойкIан ыхьа. Зынар манбышихъа иляккы, 2014-ъэсды сен цIеддыйн контрак одкIын. Эскерийвалла вуккейс къонши Чечнейни республикейхъа аркIын. Сабара сенбына гьихъа, зы хьебыдъэсын контракт одкIын. Маныд хъооIни сен апрельни вуза быкырехьи водун. Сагъвалла вухьена, манчиле хъийгъыйн контрактыд окIанасын.
— ЗакIле ацIан, гъу СВО цIеддыйни йигъыке иштыракаъа водун.
— СВО гидгъылыйни йигъыле къийнийлхъамее кьоIни элейс зы мааъар ыхьа. ЦIерра молюбле вазна, кьоIдъэсди элейсыд йихьыбле вазна мааъар ыхьа. Частылхъа саркIыл’на сабара вахт вобна. Сабара вахтаке мееб махъа вуххъаIсынбы. Къийна ши частыл’ манчис гьаIзироохьи вобунбы. ЦIебба ши СВО гьабкIынийнкъаI, сабара дагъамийваллабы ыхьайнбы. ШакIле маадын шагьарбы районбы, хивар югда ацIа ыхьа деш. Къийна шахъаб магьаIбна дагъамийвалла дешда. Джурайн операция ыккеккани джигабы шас танышда водунбы. Чалышмишоохьенбы йишда аIгьтият гозетаъас. Гойне хьинне, къийнийна даIъвий нимеехьей дагъамба вобна. Нацистарше джурабаджура тактикабы ишилхъа адаччи. Манбышин гьаIаракатбы ши гьийгъанче-гьихъа аххъаххъанбы.
— Гъу нени вилаетыл’не эхьи? Зы йизди гьамбазаршика Херсонни вилаетыл’ ворна. Ши маъад инсанаршина сакитийвалла гьувааджи. Манчиле гъайре, йаIхъбы, йыIгъаIр, социал объектбы къорамишаъа. Зы шос са кIылин эпизод йишонаъас ыккан. Херсонни шагьарее са йигъыл’ ехламабы ыккекка ыхьа. Мана шагьар ши махъа хъавалессе гьихъа нацистаршини хыле вухьа. Ши махъа икIебчIымее, манбы гьейбхыйнбы. Манбы аахвани сангарбышее хаIдда джурабаджур ярахый гуллебы авайкы. МаIгьад ярах дюгул’ гьауйн джигабы шасахъа экIда-экIда растына хъайли. Манчиныд гьагванки, нацистар Россиейква вурушбы ыккейсдимее гьинчиле хаIдда сенбына гьихъа гьаIзирувхьай.
— Нариман, Коршни хивейнче вале гъайре хьулени эскере СВО иштыракаъа?
— ЗакIле ваацIанбыджаб молийре инсан ворна. Мумкум вобна, манбышин сай сыкIылдад хаIдда ихьес. ЗакIле ваацIанбы манбы вобунбы.
— Ваквасана йишди элин мебын гадебы вобунбыне?
— Вобунбы. Манбы йизди частылин гадебы вобунбы. Манбы ДжинаIгъни, Гыл’мецIни, Калел’ни, Аттални хивейнче игитер вобунбы. Манбышиле гъайре йишди частыл’ хаIбба Дагъыстанейнчен мебын джегилерыб вобунбы. Ши экIба-экIба сана-санкъуква горушмишохьенбы, вазият ваацIохьена.
— Нариман, гъу СВО-къаI, хаабынбышиква алаакъа гьуваджес аIханне?
— Гьихъа мани сардан сабара дагъамийваллабы ыхьайнбы. ГьаIшде маIгьдын дагъамийваллабы дешинбы. УIл’джумее са элес хаахъа зенг гьаъан. Манбышда вазият ваацIоохьена. Хаабынбышда сакитийвалла, йиздаб сакитийвалла вобна.
— Вахъаб хизан вобнане?
— Вобна. Зы хьебни ушахна дек’ ворна. Манбышин геладжагъ югда, динджида хъалесдимее ши йишин оIлка нацистаршике темизяъас ыккан. Къийна Россиейн ыккеккани СВО макъсадыб эле гьамана вобна. ГыргынкъукIле ацIахьеджин, шахъаб са Ватан, Россия, вобна. Манаб къорамишавъуй йишди гыргынкъун бордж водун.
