Июнни 1-чил’ дюнйейл’ Ушахар къорамишааъан йигъ алгъайгьи. Шадын ушахаршин акьвабы къаджейква, манбышди аIхъанабышин сесбы къайихьыйква авадкьырыйн  югун кар дюнйейл’ дешин.

Х

ив абыреехъа мани бинаабыше, ташкилатбыше, йаIхъ-кьыIтин, йыIгъарше абадчи. Хив ярашугъеехъа каамилин насигьаIт гьелени агъсаххъаларше хъаваляаъа. Хивын геледжагъыд далыйле вуIххъаIн ушахар вобунбы. Манбышис ши гьиджо тербиейий ацIаал’ гьувее, манчис сикIына бар алебтIас.

Гьар деккинайи едина мурад вобна джуни ушахын югун къаджей ва манкъус югун геледжагъ аIрзуламишаый.

Йишин регион хаIбба ушахар вухоохан Россиейн регион водун. Сен-сениле шагьарбы, хивар чIакIы хъехьи. Гьел’бедти манчика санад инсанаршин сай хаIдхъехьи. Дагъыстан эн джегьилер хаIббанана, даватбы хаIдда гьаъана, хизанбы къурмишаъана республика вобна. ОIгийл’  гьиняъаб гьар хизанее кIылба 6-7 ушах ыхьа. ХХ-ъэсди асырни аIхрее вухохани ушахаршин сай йишди республикеейид кIыл’хъыхьа. Анджах сабара сенбышиле, программа « Материнский капитал» кьабылявъуйле хъийгъа , мед вухоохани ушахаршин сай кIылда-кIылда хаIдхъехьи гидгъыл. Гьел’бедти, вухоохани ушахаршини аIрее вахт дена воохьенбыб вобунбы, чIирынбыб вобунбы. ГьоIкуматын бордж водун етимба авхуйни, чIырыни ушахаршис кумаг гьувой, хыл’ авхъуй. Манбышле оодун назарат гьаммаше гьуваджес ыккан. 

Сенис ушахар къорамишааъс къадсырыйн байрам джурабаджур майданбышил’ илгъечIи. Мани йигъыл’ чIакIын къуллухчера пайбышиква инвалид, етим  ушахарнани хайбышеехъа гьавайкIан. Мани йигъыл’ джурабаджур ушахаршин ихтиярбы гозетяъан маджлисбы илгъечIи.

Йишди республикейид ман Йигъ гьаIракатыква илгъечIи. Шагьарбышее, районбышее, хиваршее ушахаршис байрамбы , конкурсбы, тамашебы, гьоокIуйбы къурмишаъа.

Сенис цIаIхни дерайл’ ман байрам алгъасын харджийбы фонд «Инсанын» джолхъа алетIа. Шакле мани фондын вуккеккана иш ашкарба къооджена. Манчини гьаIкеедын маIълумат  «Нур» кIазете, интернет сайтбышее, дестебышее вахтале-вахталхъа гьелен.

ЦIаIхни дерайл’ни фонд «Инсанни» хааIрункъуни АIсадуллагь гьаIджийни увгьойква , ушахар къорамышааъсди йигъыс къадсырыйн акцие ишкарашини кумагбышиква алгъайгьи.

Июнни 1 чил’ мактаббыше, ушах бахчебышее, хивни майдама гыргыни хивни ушахаршис ширинныгъ, мороженыйбы, сокбы битIалаы. Ман ушахаршинимеега, шадын йигъынджагъ ыхьа. Ушахаршина шадвалла нишил’хьее иляаака. Югун гьаъасдимее, хаIдын харджийбы ва заIгьматбы лазымехьи деш.