МаскIавни шагьарейдын горушбы

ОIтмишхъайни уIлджимее йизда йаIхъ МаскIавни   шагьареехъа гибхьы. Мана йизда  сафар, зы къооджени ишыква девхьейиб зы  маа сабара горушбы алгъаъгьуйнбы.

Масалан, мани йыгъбышее ВДНХ хивни тасарруфатыс ва парникIбышее эзани биткибышис  къадсырийн выставка ыхьа. Мааъад зы иштиракьаъы.

Мааъад зы «Агромир РФ» донана федерал журнал ва мани журнале чапгьавъуна Сувал’ни магьаIлыс къабсырна «Цахурская долина уникальное место Дагестана» макIалейн презентация гьаъы.

Мани макьалее йишди сувабышди уфтанийвалике, туризмайни ва джахъа абайлени туристаршди гьаIкIее, гойнед туризм яратмышгьаъасди шараъатбышди гьаIкIее одкIун ыхьа.

Выставке Россиейни хаIдданани регионбыше иштракаъы ва цIаIхбышди гьакее, йишди табиятни гьакее одкунна журнал манбышис гьуво ва йишди сувалхъа аблева увгьо.

Мани горушбыше закасана йишда йыхъий МагьаIммад Эминов ыхьа ва зас мааъад манкъве кумагау.

Сайид йизын горуш МаскIавни  шагьарее ешемишехьени йишди миллетна миз, таарих, маданият гьуваджени ва чини балээ ахвани са джавныква Эл’брус Магьмудовука ыхьа. 

Эл’брус Азербайджанни Гуд’барагни  хивенче ворна ва мана хаIдда сенбы водeнбы МаскIавни шагьарее ешемишехьен. Манкъвее интернете джурбаджур социал сетбышее цIаIхбышда миз гьуваджесын ишбы къеджи ва йишда миз джаванаршди аIрее еймишааъа. Манкъвее гьар сен садджу джус джад деш, сабара йыхъбышисыд миллетын «НУР» донан кIазет ойкIанан. Эгьес эйхьи, мана йишди кIазетна МаскIавна шагьарейна нумаенде ворна. Манкъуквасана  зы саджигее гьийд къаджесди ишбышди гьаIкIеyf  гаф вукку.

МаскIав захъад сайид горуш мааъад мани йыгъбышее ВДНХ ал’гьаани «Движение первых» донани джаванаршди фестивале иштиракаъани Lагъыстанни командайква ыхьа. Мани фестивале йишди республикайни сабара районбышенче ва шагьарбышенче абыйни джаванарше иштиракаъа ыхьа ва манбы гееб шадебхьа заквани горушиле. Зы манбышис угъурбы арзуламышаъы ва джокасана шикыл’бы цIыцIъы.

Мани горушбышле савгьийда медын хурун горушбыд захъад мааъад ыхьайнбы, амма зас гьаман эгьес ыккан: МаскIавни шагъарее ещемишоохьени йыхъбышкан хаIдын горуш алгъагьас заке аIхыI деш наъас увгьее  махъа гьаркIынна максад мебна вухьа.

Ин ша Аллагь сайир гьаркIынинкъаI, маIгьдын  горуш шагьгьарее ешемишоохьени йыхъбышква алгъагьасын!