ОIтмишхьайни йыгъбышее сувабышил’ гуджнан гёгъийбы ыхьа ва манчин дамабы дашмишаъу, селеер гьаъы. Масалан, Самур дамайни  хьинен Гыл’мецIни ва Лекни хивеехъана йаIхь итIумавъу ва махъа не инсан нейид машин ийкарасда мумкум вухьа деш. Сувалхъа кочис хъооIни сурийбышисыд манчин геебна дагъамийвалла гьуво.

Хьойикни хивее Къоейн хьян хаIдхъыхъа, малбы оIрушбышейхъа гьайкIанна йаIхъ хьинен гьобгъул. Хивни адамерше имааджий гьавъу къаебышке бенд алявъу, хьинен оIги къацIатIкIун.

Гёгъийбыше хиваршди аIреени машинени йаIхъбышисыд зиян гьувойн. ХаIдданани джигабышее къае хъооI ыхьа ва йаIхъбы одкIул

Хиваршини чIакIынбышди увгьохъа гора,  ыхьайни фалякатбыше джамааIтни хайбышис ва медни аляуйни карбышис зиян гьуво деш, саджу сабара джигабышее ыхьайни долубыше мейвабы кIяъу.

Гегъийбы явашхьамее районни йаIхъбышди  идарайн техника ишлемишехьи гидгъыл.

Синоптикаршди увхьойка, делесийвал’бышее сувабышее гегъий бы мед ихьес мумкум вобна ва манчихъа гора, йаIхъбышил’ аIгьдият гьааъас вукканва манбыше тапширмишаъы.

Сувабышее ыхьайни гёгъийбыше селеер саджу йишди районе джад деш гьаъы, Дагъыстанни ва Азербайджанни сабара районбышейид ыхьайбы ва манче инсанаршди хайбышис, эзуйбышис зиянбы гьуво.