Дюнйейлхъа инсан арына метлеб вобна хъобкуба ыIмыр вуккый ва джуле хъийгъа насыл гьувааджий вобна. Гьаарни инсаныхъад джун Аллагье одкIунийн язы водун.

 . Манчике къирагъылхъа хъихьес шавукеджар аIхас деш. Эн хаIбна деккейий едее джони ушахаршис гьайни дюнйейл’ гьавайсарна девлет — маIърафатыкван тербие. Гьаарна инсан  чалышмышехьена джони ушахыс джони сагъвалее тербие, хъаIдхъий гьелес, даватбы гьаъас, къыкына-гуртына гьаъас.  Месала урусаршихъаб вобна: « Адамий ихьесдимее, гаде ухас ыккан, хав аляъас ва йив оозас вуккан». Гьелбедти, мана месала гьаммаше деш хъобкуба воохьи. Къийнийна йишда гаф   хьойиккелий Элескерни хизаныкена вухьес. Элескерыс даватбы хаIдда сенбына гьихъа гьау. Анджах хил’дже сенбына манкъус кул’фатна пай гьуво деш. Джун ушах хыляхъа алеетIуй манкъуна йикIена мурад вухьа. Аллагьее манкъун дилягбы кьабыляу, хьебыдле сенна гьихъа дюнйейлхъа манкъус дих  къахувы. Манчиква инсанаршис аIянауйн, Аллагьни караматбышихъад сергьат дешда. Инсаныхъаб гьаммаше умыд вухьес вуккан. Аллагьыке гьеххъан кар, Манкъвее мысахьее гьелен.  Элескерыс, джуни хьунащее Эмнехатуне ухойни духайс, до АIл’джан гьуво. Манбышди хизаныква барабарба гыргын джон гогьар-гьамбазар, Сувал’ни маIгьалын джамаъаIт мани эвлияни дойил’ни гадейле шадхьа. Шадебаххьенбышди аIрее гыл’мецIалий шааир АIбдураIгьим Дадашев ыхьа. ШакIле ацIан шааирарше джона шадвалла шечIбышди къайдайл’ гьаагва. АIбдураIгьим маъаIллимее АIл’джаныс  шечI «АIл’джан» къабсыр. Мана манмееега къулайкана вухьа, са манзил’ни аIрее шечI джамаъаIтни маIънийлхъа сабкIыл. Къийна хаIдданани дават-давлатее мана маIъний йишди артистарше гьоокIа. Мана гыргыни цIаIхбышди миллетни мизел’ вобна. Гьайни дёлесийвалее хьойиккелий Элескер джуни духайква мигьманыйвалис Гыл’мецIахъа шааир АIбдураIгьимысахъа  гьабкIын. Шааире, джуни хааъаб гьаммашийни адабыква мигьманар къаршыламишавъу . Мааъаб манкъвее джуни сесеква шечI «АIл’джан» хъаIбхъы, гойне саджигее мани маIънийква абыйни мигьманаршиква мыкIар гьау. Абыйни мигьманаршис шааире джун чапыке къайиккыйн китаббы пайис гьуво. Гьел’бедти, Элескерыр «кьа­Iра­ни» хылеп­бышиква гьаркIын деш. Манкъвее Къуръанни хьатIыква одкIунийн уфтанын саъаIт шааирыс пайис гьуво.Агар хъодкуда увгьее, шааирни меега  эн хаIбна пай джуни асарбышихъаб гьаваскарар вухьай вобна. Мани йигъыл’ гьам Элескерын , гьам шааир АIбдураIгьимын йикIбы шадда ыхьа. Манбыше едигарыс саджигеедын шечIбы цIыцIау. Ши, АIл’джаныс шадна, хыллийна ыIмыр, шааирыс тезе китаббы чапыке къайиккас ва хаIбба джуни поэзиейн гьаваскарар аIрзуламишааъа.  Кул’фат дешинбышис, Аллагьыке диляг гьеххъа, манбышисыд айдынныгъбы ачмишаъанбы.