Мишлешни хивее аlхырейни сенбышее хаlдда югни суралхан бадалхьайбы ыхьа. Манбы гыргыда хивни джамаъаlтнимеега гьауйн ишбы водунбы. Къийнад хивни аlрайл’ мани саягъыл’ ыккеккан ишбы камехьи дешинбы. Гьини элейс хивни администрациейн хивеена йиссейна гимга абрелхъа аббачи вобна.
Мишлешни хивеена йиссейна гимга манзикни маlгьаллее вобна. Сабара сенбына гьихъа хивын адамеер сабайлен джига тезелемиш гьаъу, салтапын даха бадалау. Гьаlшде устадарше магьаlллейхъа уфтанын плиткlа кlяаъа. Хивни администрациейни хааlрынкъуни Рамазан Къубалыевни увгьойка, манзикни магьаlллайс плиткlа кlяъас кумаг хивыле къырагъыл’ ешемишоохьени джаванарше гьуво. Манбы Рамазанов Магьаlррамый Мамедов Агъаширин вобунбы.Манбыше гьинчиле сабара вахтна гьихъа гьааъасди ишбышда смета авхъу. Манчис лазымын тикинтийн материал алищесын кумаг гьуво. Къийна устадарше манчис сикlыйн ишбы ыккекка водунбы. Тикинтийн ишбы хивни доюкани устаде Джуlмаев Ризване ыккекка. Манкъуни увгьойка, хылехъа алябтlуна иш аlхырейхъамее быкыраъасдимее джохъад гьеххаликван тикинтий материалбы водунбы. Манчис лазымын гыргын кар гьийгъанче-гьихъа алищы водун. Хивни администрациейни хааlрынкъве Р. Къубалыевейий мишлешни джамаъаlтын хивна гимгайий манзикна магьаlлла уфтан хъааъава гыргынбы гееб шадба вобунбы. Манбыше ман ишбы ыккейс кумаг гьувойнбышис миннатдарийвалла агъмишааъа. Р. Къубалыевни джуваббышихъа гора, устадаршис гьааъасда са-кьоlни йигъысда иш авху вобна. Гьаваабы югда адкlынее, манаб вахтал’быкырааъасда.
