Воскресенье, 15 декабря 2019, 22:12

Войдите в свой аккаунт

Пользователь
Пароль
Запомнить меня

Миллетин игит духйебы

Автор Рафаель Алиев Пятница, 22 ноября 2019, 13:06 388
Миллетин игит духйебы Миллетин игит духйебы Миллетин игит духйебы
||||| ||||| |||||

Миллетин до игитни  духйебышейий йишбыше аIршелхъа къалхымишаъа.  Шукур Аллагьылхъа, цIаIхбышихъаб( йихъбышихъаб) манбы гьар вахтал' вухьайнбы. ЦIаIхбы ( йихъбы) терсинани сиясатыква кьоIнахъауйн миллет ыхьейид, манбышди джанее са эб ивийкар вобна, манбышихъаб са миз', са таарых, са Ватан водунбы. Манчихъа гора,  гьаарни йихъийни гьаIракатбышиле, югни йигъбышиле ши садибба шадоохьи, писинчиле садибба пашманоохьи. Къийна шахъаб шадувхьесда сабаб вобна.  Йишда макьаале  спортни  гьаIкIеена вухьес. Йишди йихъее самбойкени дюнйейни чемпионын до алетIу.

   Ноябрьни 16-чил' йишди гьоIкуматыл' самбойква маIшкьулоохьени спортсменаршин Йигъ водун.  Гьел'бедти, шахъабыб мани гьичIобкурийка  маIшкьулоохьен гьам спортсменар, гьам дараджайкван тренерар вобунбы.  Манбышда сайир сувагылий АIлимов Манаф Кьурбанна дих ворна.Ноябрьни 16-чил' йишди гьоIкуматыл' самбойква маIшкьулоохьени спортсменаршин Йигъ водун. 

  Гьел'бедти, шахъабыб мани гьичIобкурийка  маIшкьулоохьен гьам спортсменар, гьам дараджайкван тренерар вобунбы.  Манбышда сайир сувагылий АIлимов Манаф Кьурбанна дих ворна.Гьайни дёлесийвале ЦНКА-на садры Рафаэл' АIлиев МаскIавни шагьаре самбойни тренерыква Манаф АIлимовыка, РФ-ни Президентни ишбышди управление  ишлемишехьени дохтурыква Къазиханов Кенан ГьаIсанни дихыква горушмышхьа. Мани горушее сайир йихъый Физулий ыхьа. Марказни са кафе гивъур  Р. АIлиеве манбышиква джони ыIмрени, ишни , угъурбышди гьаIкIеена гаф гьавъу:
   Р. АI.: -Ассалам алейкум! Къийна, ноябрьни 16-чил', ши МаскIавни шагьаре йишди йихъбышиква гаф гьааъа вобна. ЦIеррыйна ийишда гафчий самбойна тренер, гьам судье Манаф АIлиев ворна. Мана едике Сувагыл'ни хивее ыхьа. ГьаIшде Санкт-Петербургни шагьаре ешемишехьи ва маани «Олимпиец» донани спортклубе ушахар самбойни оIюныке гьичIокарас хаIбхъааъа. Манкъуни шигыртарше Россиейни , Европайни,  Дюнйейни самбойкени чемпионатбышее гьаIракатыкван иштракбы гьаъа. Манбышди аIрее ахтыйн джигабы аххъыйн шигыртарыб вобунбы . Гьайни дёлесийвале манкъуна джегьилийвалена мурад быкырывхьа – Манаф чодж самбойни устадаршини аIрее илгъечIуйни дюнйейни чемпионате 1 джига авхъу, дюнйейна чемпион ыхьа. Ши мана мани ахтыни дараджайква табрикаъа.  Манкъус хааишаъан йишин кIазет хъаIдаххъанбышис  манчини гьаIкIеедын быкырын маIълумат гьелес.
  М. АI.: - Сагъул чоджий, гъу ши къийна ши къаршламишавъуйс.  Ноябрьни 16-чил' йишди гьоIкуматыл' самбойква маIшкьулоохьени спортсменаршин Йигъ водун. Мани байрамыс къассырыйн баIстбы МаскIавни  мактаббышди санчее илгъечIу.  Зы йизди шигыртаршиква махъа иштыракаъас ары. Манчер вассахъа ихтелетис ары. Сагъул,  зы табрикауйс. Дюнйейна чемпион ыхьай йизда мураад вухьа. Гьайни сен мана быкырывхьана. Эгьес эйхьи, кьоIбле мураад быкырывхьа – гьам зы дюнйейна чемпион , гьамыр йизда шигырт дюнйейна чемпион ыхьа. Самбойни устадаршини  аIреедын дюнйейн чемпионат гьайни сен Кипр гьоIкуматни  Лимосолни шагьарее  илгъечIу. Махъа джон самбойн  гьунарбы гьагас 300 спортын устадар  13 –ни оIлкайле абы. Зы 62 кило чекеени,  55-59 ешеени спортни устадаршиква 2 элейс гьичIоркул'. КьоIни элейсыр судьебышди садибни мислягьаIтыква гъамхьана. Манчиле хъийгъа зас къизлен медал гьуво.  ГьаIшде зы Санкт- Петербург хизаныква ешемишехьи ворна. ЫIмыр зы самбойни оIюныс къабсыр ва манаб зас йикIес хошба хъабы. Йишди джегьилершисыд зы хааишаъа, спортука маIшкьулувхьева. Манчин гьам джан тавул' аххаххъа , гьамыб игитийвалла утIумааъа.  Гьел'бедти , зы няаъар ешемиш ыхьейир, нишиква маIшкьул ыхьейир, Ватан, ед'на миз, йишин аIдатбы, йишин таарых кIелиханаъа деш. Манчин зас ыIмрелхъан гьавас ачухаъа.

  Р.АI.: -Сагъул йихъий . Вас ши джанана сагъвалла ва чIакIын угъурбы арзуламишаъа.  Йизди къаршее коIръэсда йишда мигьман Кенан Къазиханов гюъур ворна. Манар ши  гуянмишоохьена , йишда са чодж  ворна. Манкъунаб ыIмрена йаIхъ спортыква алаакьаба вобна.  Кенан чодж МаскIавхъа хъарыйн хаIдда сенбы водунбы. Мана санитарыле ишлемишехьи гиргъыл', билигыквани дохтурни дараджайлхъа гьирхьыл'. Кенан Къазиханов  къийна  РФ-ни Президентни ишбышди управление  ишлемишехьена дохтур ворна. Махъар ненахьее деш гьийхьар.  Йишда йихъый джуни ацIааликва, хылени къулайка маIгьабна къуллых гьааъас ыIгьтибарехъа эчIу. Чоджий , вас хааиш гьаъа йигъни ыIмрени гьаIкIеедын шас маIълумат гьеле. Няане гъу хъаIдхъы, няане ишлемишхьа?  Джегьилершис йаIхъ хаIбхъееъэ, нягьаIрий ахтыйни къуллухылхъа гьихьарас..
  К.Къ.: -Сагъул,   джуваб гьувойс ва ши аIрсее гьавъу хъобтIулыйс. Эвелее, зынар гьогьар  Манаф дюнйейна чемпион ыхьайква табрикаъа. Чемпионар гьаарункъуке деш,  ва гьар элейс деш воохьенбыки. Мана хаIбна йишди миллетни меегана  гьааIдиса вобна. Чемпионат алгъааIни джигеехъа вуIххъас девхьейиб, ши манкъуни гьичIоркулийбышихъа телевизоренче иляакы. Манкъуле ши гуянмышоохьенбы,  джус тезе угъурбы аIрзуламишаъа. Зынар спортыке аIкьанара дешорна.  Мактаб таамау, зы эскерийвалеехъа аркIын.  Ватанысын бордж хъуво, эскереенче къаховуйка  (направлениейква) зы хъаIдхъас МаскIавни физкультурайни институтеехъа хъары. Мааъад хъаIдаххъанкъа зы куштакурни , сибыкни атлетиквайни спортыква марахламышхьа. Манке зы соревнованиебыше иштыракбы гьау ва джигабы аххъы. Хьодъэсди курсе йишин институт академиейлхъа сакIалау. Йизын санаъаIт спортни медицинайква алаакьада водун. Ман таамау, кьоIдле сенна зы тренерна ишлемишхьа. Гойне зы илгъечIуна ишлемишхьес МаскIавни Склифософскийни дойил'ни больницехъа. Мааъар цIерра зы санитарна ишлемишхьа , хъийгъа массажист ыхьа, гойне хъувабкааъани  физкультурайква маIшкьулхьа. Мааджар ЛФК –на дохтурна  ишлемишехьи гиргъыл' . Йизда иш операциебы гьауйле , гьадкьурыйн баркIвбы , чурынын  цIыIцахьайн таммар хъауйле хъийгъа, джан тавеехъа хъаляъани    массажбышиква, упражениебышиква багълыба вобна. Шахъаб чIырына хъуваркаъана программа вобна. ОIгунмишехьена хьинне мехьеджин,  йизын гьаIракатбы къадже, са таныш дохтурни теклифыква хъортIул'на ЛФК-на дохтурна ишлемишхьес РФ-ни Президентни ишбышди управлениейхъа. МаIгьабна имкан са элейс воохьи, манчихъа гора зы мана къавуккы деш.  Махъа документбы хъувы, комиссиебышике  илгъечIу. Иншеаллагь, декабрыле  зы мааъар ишлемишехьи гигъалас. 
  Р.АI.: Чубара, шос къийна шаквани горушееехъа абыйс сагъул. Зы инам гьаъан, гьайин аIхреедын деш ихьес. Шу йишин миллет ахтыхъаъан игитер вобунбы. Шос джанана сагъвалла аIрзуламишааъа!. Манаф чодж, йигъна гадер сагъра-саламатра эскеренче хъалес кьисматаъана. Шоке ши гьаммаше югун хабарбы гозетяъас. Санкт-Петербург ешемишоохьени йихъбышилхъа хаIбна салам. Шунаб сенее кьоIни- хьебни элейс саджигеехъа сабы, хайирысын мислягьаIтбы къаджее  гьалед югда ихьес. Ассалам алейкум ва раIгьматуллагьу ва баракату.   
Гаф Кьурбан Омаханове  обкIун
  P.S.  ЦНКА-ни садре Рафаэл' АIлиеве вахтале - вахталхъа йишди миллетни эл'чершиква горушбы МаскIавни шагьарее  алгъайгьи. Чалышмишехьена йишди миллетын дагъамийвал'бы  ашкараъас ва манбы гьIаллаъас. Манчиле гъайре манкъвее йишди СМИ-кан алаакьабы гьувадже.  Манкъвее джуни имканыс сикIыйн  джурабаджур маджлисбы алгъайгьи.

Оцените материал
(5 голосов)
Последнее изменение Пятница, 22 ноября 2019 13:12

Читайте также

Глава Дагестана встретился с представителями старейшин города Буйнакск…

дек 15, 2019 Общество

...................................................................................................

В дагестанском Буйнакске Главе Дагестана презентовали молодежные проек…

дек 15, 2019 Общество

...................................................................................................

Владимир Васильев в Буйнакске общался с жительницами города

дек 15, 2019 Общество

...................................................................................................

Глава Дагестана Владимир Васильев посетил новый сквер у фонтанов в Буй…

дек 15, 2019 Общество

...................................................................................................

Глава Дагестана побывал в центре инклюзивного образования особенных де…

дек 14, 2019 Общество

...................................................................................................

Глава Дагестана ознакомился с ходом реконструкции центральной площади …

дек 14, 2019 Общество

...................................................................................................

В Гумбетовском районе в рамках проекта «Сто школ» открыли Тляратинскую…

дек 13, 2019 Общество

...................................................................................................

Роспотребнадзор по Дагестану предупреждает о новых видах мошенничеств…

дек 13, 2019 Общество

...................................................................................................

В селе Ингиши Гумбетовского района по проекту «Мой Дагестан - мои доро…

дек 13, 2019 Общество

...................................................................................................

В пригороде Кизилюрта открыли новый сквер

дек 13, 2019 Образование

...................................................................................................

glrd

 

nsrd

 

prd

Ad Sidebar
Нур - сетевое издание © 2014. Все права защищены.

Яндекс.Метрика

Top.Mail.Ru