Йихъбышди джаванарше аlхырейни сенбышее хаlдын гьавас эскер санаъаlтылхъа гьагва водун. Манбыше Россиейни делеснийий акьаlнани шагьарбышее къуллухааъа, йишда Ватан къырагъылени гичlыке къорамишааъа, адамейрше хьинне джо сечмишавъуйни пешейс хидматааъа.

 

Гьаlджиев Малик Гьаlзратна дих эскерын санаъаlт хаlдхъаъани аали мактабна телеба ворна.  Мана Джинаlгъни хивее едике ыхьа. Йыlкьнекин мактаб едике ыхьайни хивее югни кьийматбышиква таамауйле хъийгъа, Маскlавни общевойсковой Военный училищейхъа санаъаlтбы хъуво. Къийна манкъве хаlдни гьавасыква эскераршин санаъаlт алятlа водун. Малик военныбышди хизане хаlр хъыхьа. Манкъуни деккейий едее мани пешейс къуллух гьааъан хаlдда сенбы водунбы. Манбышди увгьойка, Маликыхъад военный ихьесдимее кlыл’валике хаlдын гьавас ыхьа. Сабара сенбына гьихъа мана джуни мурадылхъа гьирхьыл’. Мана джуни ацlааликва ва гьаракатыква военный училищейхъа кьабыл’хьа. Манкъус дарс гьувойни маъаlллимаршед Маликыс ахтына кьиймат гьооли. Манбышди джуваббышихъа гора, Малик хъаlдхъыйлхъа гьавасукана ыхьа. Мана гьаммаше дарсейхъа гьаlзирхьаний хъарайлена.  Мактабеени меедни ишбышилир мана цlеррийнаний эйхьи.Къийна Малике хизанын, мактабын,  едике ыхьайни хивын до ахтывалее гьуваджи водун. Манкъуни гьаlракатыле, хъаlдхъыйле, санаъаlтыс гьагвани гьавасылее военный училищейн маъаlллимар разийба вобунбы. Гьайни делесийвалей Малике джун делесынбыйий училищейн командирар шадавъу. Манкъве Маскlавни шагьарее  аали мактаббышди аlрайл’ илгъечlуйни гьичlоокаранбышди  чемпионате иштиракау. 75килойни чекейни спортсменаршини аlрайл’ манкъуква хъооlна ыхьа деш. Манкъве цlеббыйна джига авхъу. Малике мани чемпионате джуни такьатыка едике ыхьайн Джинаlгъын, Дагъыстанын до ахтывалейхъа къалхмишау. «Нур» кlазетын Маликыс геледжагъыл’ гьам хъаlдхъее, гьамыд спорте угъурбы аlрзуламишаъа.