Воскресенье, 23 февраля 2020, 07:15

Войдите в свой аккаунт

Пользователь
Пароль
Запомнить меня

ЦIаIхбышди джамаъаIтна мавлид

Автор Курбан Омаханов Пятница, 06 декабря 2019, 12:10 500
ЦIаIхбышди  джамаъаIтна мавлид
||| ||| |||

Ноябрьни 30-чил', Раби-ул'-Аввал'ни вузани  сифтийни  йигъыл', Хушетни хивни йыlкьнекни манзикее цlаlхбышди (йихъбышди) джамаъаlтна маджлис- мавлид вухьа. Исламни диныс ыlбаадат гьаъас ва ааlлимарше гьелени  ваlъазбышихъа кlырыгьелес махъа 150-ле агъаллан инсанар сабы. Маджлис-мавлидыс гьаlракат, батlраалла, маlргьамат , куват гьелес Дагъыстанни  динегьлершини управлениенче ааIлимар, медни манзикбышин имамар абы.  Манчина  метлеб вухьана  цlаlхбышин Исламни динылхъан инам гьалед утlумауй. Мавлид   йишди Пейгъанбар Муlгьаммадыс  (с.аIл.с.) къабсыр ва мана вудж едике ыхьайни вуза Раби-ул'-Аввал' алгъавгьу.

 Мавлид вухьесва инсанаршилхъа оlгийле- оlгийлхъа  хабар гьувона. ОIгилийни сенбышихъа илякканкъаI гьайни сен маджлисеехъа инсанар хаIбба абы. Анджах хаlббанан джони къелил' аблес вааlхасын йишин динын чубара, йичибы  абы деший.  Ацlа деш мана сабаб нишиква багълыба вухьай, анджах ман хаlдын саlгьв водун. Маlгьабна маджлис кьаlсинбыше  ярашугъеехъа абадчи, амма мани йигъыл' тека-сейракбайий йишин ешлибы абы. 

Саъаlт 15-чил' манзикехъа сабыйни мусурманарше  йыlкьыгьлийна джамаъаlт куб гьавъу. Куб таамувхьайле хъийгъа, маджлис –мавлид гибгъыл.    Мана Исламни динни гьаlкlеена ааlлимна дараджа алебтlуйни  цIаIхни дерайни имаме   Эл'дар гьаIджийе ачухавъу. Джуни чыхышее манкъве маджлис-мавлид къабсырна сабаб ашкаравъу ва динни гьаlкlеедын маlълумат гьуво. Гьаммашийна хьинне, мавлид цIаIхбышди гьаIфизе АIбдул-ахад АIшдиеве Къуръан хъаIбаххъа гибгъыл.

Эл'дар гьаlджийе Исламни динни гьаlкlеена ваъаlз' гьевлес Дагъыстанни муфтийни маIъвыныс Майранов МугьаIммад гьаlджийс   хааишау.

Манкъвее  мусурманийлхъа бирмишауйн фарзбышди гьаlкlеена ваlъаз гьуво. Аlсас мана даянмишхьана кубни гьаlкlени фарзыл'. Манкъве увгьойн : « Эн цlеббыйна ва аlсас  фарз  мусурманийлхъа бирмишавъуна - йигъыс хьобле куб вахтал' гьавъуй вобна. Гьаммашийни дюнйейлхъа аркlынийнкъа цlеддыйн суал манчини гьаlкlеедын ихьес. Чубара, йичибы хъидоора шу иманылхъа. Аллагьни йаlххъылхъа савале. Шолхъа маджбырауйн фарзбы быкыреъэ». А1рее-а1рее мадрасайни шигырташе  сесеква Кьуръаненчен суррабы хъаlдхъы. 

Маджлис вуккекканкъвее ваlъаз хъаlбхъас   Дагъыстанни динэгьлершини ташкилатенче аруйни  муфтийни гунайл'ни кумагчийс ГьуIсейн Гьаlджиевыс   хааишаъу.  Манкъвее йишди Пейгъанбарни (с.аI.с) гьаlкlеена ваъаlз гьуво. Манкъвее джурабаджура Пейгъанбарыква ( с.аI.с) багълыданан хабарбы, гьаlдисабы йишонау. Асхабаршини гьаlкlеедын хабарбы гьау.  . Манкъве джун аlшкь Исламылхъан ва муlгьуб Пейганбарылхъан (с.аI.с) билдирау.

 Мана Аллагьни оlгеени мусурманийни гарданани   борджбышди гьаlкIе йишонхьа. Манкъвее фарзнайий суннайна джураалла  гьаагу. Аlдаббышди гьаlкlеедын маlълумат гьуво.

Манкъуле  хъийгъа, цlаlхни мизел' ваъаIз' Гыл'мецIни манзикни имамее АIсадуллагь  гьаIджее  хъаlбхъыl.Эл'дар гьаlджийе  аlрее-аlрее  инсанни хасиятбышди гьаlкlена гаф вукку. Манкъуни увгьойка, эн писин кар дюнйейлин,  пахырийвалла вобна. Манчин инсанаршини аlреедын аlрабы ахвалаъа, писин-писин зинаабы адляъа. Гыргын даlвъийбы, къалмагъалбы, гьыlдчатбы манчика багълыда водунбы.

 Маджлис гьаlракатеехъа хъабымее, ааlлимарше, имамарше Исламни динни гьакlени суалбышис джаваббы хъуво. Суалбы гьар джурайлинбы ыхьа. Манбы аlсас байрамбышиква, хизанука, тербиейква , иманыква, шариатыква , даватбышиква багълыдананбы ыхьа. Суалбышис джаваббы хъувойле хъийгъа, манзикее зикыр гьау.

Маджлисни аlхрее конкурс илгъечlу. Мааъад Исламни динни гьа1к1еедын ма1ълумат маджлисеехъа сабыйнбышин ёхламишау. Суалыс хъодкуйн джаваб хъувойнкъус Исламни динни гьа1к1еедын дискбы, китаббы, журналбы пайис гьуво. Манчин шакlле гьагван сен-сениле динилхъан аlшкь хаlдхъыхьай ва манчикен ацlаал' хаlдхъыхьай.Мавлид-маджлис таамувхьайле хъийгъа, хаIнелна куб саджигее  гьавъу. Абыйни инсанаршис садакьа битlалау. Аллагье гыргынкъус сабыр, иман ,баракат  гьеленбы! Аамин!

 

Оцените материал
(0 голосов)
Последнее изменение Пятница, 06 декабря 2019 12:18

Читайте также

В Махачкале подвели итоги конкурса по родным языкам

фев 22, 2020 Образование

...................................................................................................

В высокогорном районе Дагестана построят футбольный стадион

фев 21, 2020 Общество

...................................................................................................

В Дагестане обсудили разработку Стратегии-2035

фев 21, 2020 Политика

...................................................................................................

В Дагестане планируется открыть высокотехнологичную медицинскую клиник…

фев 21, 2020 Политика

...................................................................................................

Рустаму Мурадову присвоено звание генерал-лейтенанта

фев 21, 2020 Общество

...................................................................................................

Глава Минобрнауки Дагестана напишет ЕГЭ вместе с родителями выпускнико…

фев 21, 2020 Образование

...................................................................................................

В Махачкале пройдет презентация антологии «Работайте, братья!»

фев 21, 2020 Общество

...................................................................................................

Проект «Местные инициативы» реализуется в нескольких селах Буйнакског…

фев 21, 2020 Общество

...................................................................................................

Президент России назначил в Дагестане трех районных судей

фев 21, 2020 Политика

...................................................................................................

Дагестан перейдет на прямые выплаты работникам по обязательному социал…

фев 21, 2020 Политика

...................................................................................................

glrd

 

nsrd

 

prd

Ad Sidebar
Нур - сетевое издание © 2014. Все права защищены.

Яндекс.Метрика

Top.Mail.Ru