Афганистанын уцlурбы йикlел’ водунбы

Гьар сен февральни вуза Совет гьоlкуматын эскерар Афганистангъанчее хъигъечlыйн йигъ алгъайгьен аlдат водун.  Гьайни сен 31-ъэсын сен быкырехьи манче йишин эскерар хъигъебчlыйн. Афганистан душманаршике темизаъанкъа, хаlббанани Совет оlлкайни эскерарше иштиракау. Манбышди аlрайл’  ахтыйни кьаlгьраманни доюс лайикьба къавджуйнбы, есирба кlябкlыйнбы, гьабтlыйнбы, итбатувхьайнбыбы вухьайнбы.  Феврал’ни 15-чил’ гыргыба манбы йикlел’ хъаваляаъа. Гьабтlыйнбышилхъа  раlгьмат кьухооли, авхуйнбышис сагъвалла аlрзааъа.

  Афганистан душманаршике темизаъан вурушбы геед дагаъамынбы ыхьа. Советни эскерарше манчихъа ил’дяакы, джони гьийд илезырыйн мисалабы аlхырейхъамее быкырауйнбы. Манбышее азгъунувхьайни душманаршин оlги явашауйн, фыкреедынбы быкырхьес гьассыр деш.

  Йицlыхьвад сенна цlыцlавхьайни даlвъийн нениджад сурас хайир ады деш. Манче садджу инсанаршини йикlбышее уцlурый, даддешийвалла гьабсыр. Къийна аlрейнче хаlдда сенбы адкlынейид, Афганистан хъетlуйн зарбабы йикlел’ водунбы. Мааъана вазият мееб динджаба дешда. Душманарше гьар йигъыс джурабаджурайн терактбы гьааъа. Гьар ыхьайни терактыке хаlбба тахсир дешин инсанар гьабатlа. 

Хыллийба цlыцlавхьайни даlвъейиб Дагъыстанейнче гьабкlынни джавнаршин иштиракбыд  гьауйнбы. Манбышди  аlрайл’ йихъбышин гадебыб вухьайнбы. Манбышди хаlббананбышди гьаlкее ши йишди кlазетее одкlунийн. Мана  иш гьаlшдеб вуккекка вобна.  Къийнийна йишда гаф манбышди санкъуни гьаlкlена вобна. Мана Мишлешни  хивейнчена Къоджаев Магьач Рамазанна дих ворна.Махач 1967-ъэсди сен сувал’ни Мишлешни хивее къуллухчыйни хизанее едике ыхьа. Манбы гуджанада сувалин хивар инкишафаъан сенбы ыхьа. Хивын тасарруфатбы такьатыква гьихъа аlл’гьааl ыхьа. Манчис сикlы инсанаршин ешайишбыд писда ыхьа деш.  Едике ыхьайни сабара сенбышиле Магьач хизаныква саджигее Рутулхъа кочмишхьа. Билиг, ацlаал’ алятlасдимее мана цlеддыйни сыныфейхъа  1974-ъсди сен Рутулни хивни №2 йыlкьнекни мактабейхъа аркlын. Мактаб югда быкырауйле хъийгъа, санаъаlтбы Магьаlчкъалайни хивни тасарруфатни техникумейхъа хъуво. 1986-ъэсди сен техникум таамау. Гьаманижад сен мана Ватан къорамишааъас эскерейхъа аркlын.  

Манбы гуджнада Афганистан даlвъый ал’гьааlн сенбы ыхьа. Магьаче сабар вахтна гьаlзирийвала илгъебчlыйле хъийгъа, Афганистанхъа йаlххъыл’ гьау. Мана цlеррийни йигъыкеджар душманаршика вуршмишехьи гиргъыл’.  Манкъуква  саджигеее эскерийвалле вухьайни гьамбазаршини увгьойка, мана геер дирибаш, джомард эскерний. Мана ненкеджар дагъамийвал’бышиле хъаlйкъанна дешдий. Гьаммаше цlеррийни джаргеени эхьи.

Магьач Афганистан душманаршике темизаъаани хаlдданани вурушбышда иштиракчий ыхьа. Командирарше, гьамабазарше  манкъуни игитийвалис гьаммаше ахтына кьийматний гьоолена. Манчика багълыда командирарше Магьачни хизанылхъа таlрыфын кагъызбы ойкlан ыхьа.  Манчиле савагьийда, вурушбышее югда иштиракауйхъа гора, мана хьулехьее медальбышис, нишангагьбышис лайикьра къаджы. 1988-ъэсди сен Ватаннни гьийд адамей хьинне бордж хъуво, Магьач Ватанылхъа саркlыл’. 

Мана гьаlкlена кьаlгьраман хьинне районее къаршаламишау.  Къоджаеваршини хизанын, дих Афганистьангъанче сагъра-саламтра хъарыйхъа гора,  хивыс хаlбна дават гьуво. Эскерейнче хъарыйле хъийгъа, мана ишлемишехьи гиргъыл. Мана сабара сенбына районее хъыгъааlни «Животновод» кlазетее корреспондентна  ишлемишхьа. Манкъвее районни экономикайка, инсанаршини ешайишика, хиваршее гьаъани ишибышике багълыда кlазетейхъа джурабаджура макьалабы гьели ыхьа. Магьаче одкlунийн  макьалабы инсанарше марахуква хъаlдаххъа ыхьа.  Кlазетее ишлемишехьени сенбышее Магьачее хизан къурмишавъу.  Уфтанни аилейна ийесси ыхьа. Анджах манчиле гуянмишхьесда кьисмат Аллагье гьуво деш. 2000-ъэсди сен мана, джаванни ешбышее, раlгьматыхъа аркlын. 

 Къийна мана вудж дехьейир,  манкъуна игитийвалла  гьаммаше гугьар гьамбазаршини, достаршини йикlел’ водун.